PSF mu nyigo yo kwimurira Expo i Gahanga mu myaka iri imbere

Yanditswe na Ishimwe Israel
Kuya 11 Kanama 2017 saa 09:40
Yasuwe :
0 0

Mu rwego rwo kwagura ibikorwa by’imurikagurisha mpuzamahanga ribera mu Rwanda rikarushaho kwitabirwa n’abantu benshi biganjemo abamurika, Urugaga rw’Abikorera (PSF) rwatangiye gukora inyigo yo kwimurira ibikorwa byaryo ahantu hagutse kurusha aho risanzwe ribera kuri Expo Ground i Gikondo.

Imurikagurisha mpuzamahanga rizwi nka Expo ni kimwe mu bikorwa ngarukamwaka bihuriza hamwe abantu b’ingeri zose baturuka mu bihugu bitandukanye ku isi.

Icyifuzo cyo kwimurira ibikorwa bya Expo ahantu hagutse cyatanzwe na Minisitiri w’Intebe Anastase Murekezi ubwo yafunguraga ku mugaragaro imurikagurisha mpuzamahanga (Expo Rwanda) ku nshuro ya 18 mu 2015. Icyo gihe yasabye ko umwaka ukurikiyeho wa 2016 wazasanga ryarimuriwe ahandi hantu hagutse abishingiye ku kuba Expo imaze kumenyekana ku rwego mpuzamahanga ku buryo yitabirwa n’abantu benshi mu gihe aho ribera ari hato cyane.

Minisitiri w'Intebe, Anastase Murekezi n'uw’Ubucuruzi, Inganda n’Ibikorwa by’Umuryango wa Afurika y’Uburasirazuba, François Kanimba bafungura ku mugaragaro imurikagurisha mpuzamahanga mu 2015, iki gihe ryabaga ku nshuro ya 18

Ubuyobozi bwa PSF butangaza ko nta mbogamizi zabayemo zatumye ubu busabe butubahirizwa ahubwo babanje kwicarana n’inzego bireba barabinononsora nku’uko Umuyobozi ushinzwe ibikorwa mu Rugaga rw’Abikorera (PSF), Faustin Karasira, yabitangarije IGIHE.

Yagize ati “Muri ya mikoranire yacu myiza habayeho kuganira tubereka ibyari biteganyijwe bikorerwa ubugororangingo ari nabyo byatuganishije ku nyigo iri gukorwa izaba igaragaza aho u Rwanda rugeze n’icyerecyezo rwihaye.”
Nyuma y’imyaka ibiri hagaragajwe iki cyifuzo, PSF ivuga ko leta yamaze kuyiha ikibanza kingana na hegitari 13 kiri i Gahanga mu Karere ka Kicukiro, hafi y’ahazubakwa stade.

Yagize ati “Ubu ikibanza cy’ahazubakwa Expo Mpuzamahanga cyarabonetse kandi dufite n’ibyangombwa byacyo. Inyigo ijyanye n’ibishushanyo n’irebana n’umushinga w’ibizahakorerwa (Business Plan) biri gukorwa ku buryo twizeye ko uyu mwaka uzajya kurangira bigeze ku ntambwe ishimishije. Ni umushinga munini, uzasaba amafaranga menshi. Twatangiye kuvugana n’abafatanyabikorwa batandukanye ngo turebe niba twakorana na bo. Tukareba niba bashoramo amafaranga cyangwa bakagiramo imigabane.”

Karasira atangaza ko igihe uyu mushinga uzarangirira kizamenyekana nyuma yo kunoza inyigo y’igikorwa cyose.

Expo imaze imyaka 11 ibera i Gikondo

Ibikorwa bya Expo byatangiye mu 1978, icyo gihe byategurwaga na Minisiteri y’Ubucuruzi gusa yaje gufungurira imiryango ibihugu by’ibituranyi mu 1998 aho muri uyu mwaka yitabiriwe n’abagera ku 140 n’abanyamahanga 29. Icyo gihe bose hamwe bageraga ku 169, umubare wikubye inshuro eshatu.

Yatangiye idafite aho ikorera hazwi byanagiraga ingaruka ku bayitegura n’abamurika ariko yaje kugenda ikura umwaka ku wundi. Kuva mu 1997 kugera mu 2005, Expo yaberaga kuri Stade Amahoro, Lycée de Kigali no mu tundi duce tw’Umujyi wa Kigali mbere yo kwimurirwa i Gikondo mu 2006.

Mu 2016 abitabiriye imurikagurisha bari 440 barimo Abanyarwanda 269 n’abanyamahanga 171 baturutse mu bihugu 19. Muri uyu mwaka, ku nshuro yaryo ya 20 biteganyijwe ko rizitabirwa n’abamurika 760, mu gihe abantu barenga ibihumbi 270 aribo bitezwe gusura ibikorwa bizatangira ku ya 22 Kanama bigasozwa ku ya 6 nzeri 2017.

Expo ya 2017 iteguye mu buryo budasanzwe izahurirana no kwizihiza isabukuru y'imyaka 20

Kwimurira Expo i Gahanga, umuti urambye ku mpande zose

Uko imyaka yicuma bijyana n’ubwiyongere bw’abashaka kwitabira Expo nubwo aho ibera ari hato ugereranyije n’umubare w’ababyifuza. Ibi bitera igihombo Leta, PSF, abamurika, abagakwiye guhabwamo akazi ndetse n’Abanyarwanda baba bifuza guhaha.

Mu 2015, Expo yitabiriwe n’abamurika baturutse mu mahanga bagera 143 buri wese akaba yarishyuye amadorali 1350 (1 082 700 z’amafaranga y’u Rwanda) kugira ngo abonemo ikibanza, ni ukuvuga ko bose bishyuye asaga 160 239 600 z’amanyarwanda.

Expo iramutse ibera ahantu hagutse ku buryo ibasha kwakira abanyamahanga 500, yakwinjiza 541 350 000 z’amafaranga y’u Rwanda utabariyemo n’izindi serivisi bakenera zirimo ibibatunga, aho kurara, itumanaho, gukora ingendo hirya no hino n’ibindi.

Abanyarwanda bamurika buri wese yishyura ibihumbi 450 by’amanyarwanda kugira ngo abashe kubonamo ikibanza, hakaba n’ibigo biba byateye inkunga Expo byishyura agera kuri miliyoni 20.

Uretse kuba PSF ubwayo ihomba amafaranga yagakwiye kwinjiza, leta igahomba imisoro, abamurika nabo ubwabo bahomba amahirwe yo kumenyekanisha no kugeza ibicuruzwa byabo ku bantu benshi icyarimwe.

Kwaguka kw’ahabera Expo kandi bizatanga n’amahirwe yo kubona imirimo y’igihe gito ku batari bake biganjemo urubyiruko aho muri iki gihe hari abinjiza amafaranga ari hagati ya 5000-20000 ku munsi.

Expo ya 2016 yitabiriwe n'abantu benshi aho umubare w’abasuye ibikorwa wari hagati y’ibihumbi 10-15 mu minsi isanzwe n’ibihumbi 20-25 mu mpera z’icyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza