Perezida Kagame asanga amahirwe urubyiruko rufite mu buhinzi nta kindi gihe yigeze abaho

Yanditswe na Ferdinand Maniraguha
Kuya 8 Nzeri 2018 saa 02:12
Yasuwe :
0 0

Perezida Paul Kagame yasabaye urubyiruko rwa Afurika kubyaza umusaruro ikoranabuhanga n’amahirwe ari mu buhinzi muri iki gihe, bagatangira kwinjira muri uyu mwuga utunze benshi muri Afurika.

Yabitangaje kuri uyu wa Gatandatu ku munsi wa nyuma w’inama nyafurika yiga ku buhinzi, African Green Revolution Forum, AGRF 2018, imaze iminsi ine ibera i Kigali.

Muri Afurika, ubuhinzi bugira uruhare rwa 32 % ku musaruro mbumbe w’igihugu mu gihe bukorwa n’abagera kuri 70 %.

Umugabane wa Afurika wihariye 60% by’ubutaka buhingwa ku Isi.

Mu ijambo yagejeje ku bagera ku bihumbi bitatu bitabiriye iyo nama, Perezida Kagame yavuze ko nta kindi gihe mu mateka ubuhinzi bwigeze bubamo amahirwe nk’arimo muri iki gihe.

Yavuze ko ikoranabuhanga Isi ifite ari amahirwe ku rubyiruko, ku buryo rwatangira kuryifashisha rushakira ibisubizo ibibazo ubuhinzi bufite.

Yagize ati “Turasaba urubyiruko rwacu guhindura imyumvire byihuse ku bijyanye n’ubuhinzi nk’umwuga. Hakurikijwe ubumenyi n’ikoranabuhanga biriho, nta kindi gihe higeze habaho umwanya mwiza ku rubyiruko rwa Afurika wo kujya mu buhinzi n’ubucuruzi bubushingiyeho bibyara inyungu n’imibereho myiza ku muryango wose.”

Perezida Kagame yavuze ko ubuhinzi ari ibuye ry’ifatizo ry’iterambere rya Afurika haba ku mibereho myiza n’ubukungu.

Yagize ati “Uru rwego ntabwo akamaro karwo ari ugutuma abantu bagira imibereho gusa, ni narwo moteri y’ibindi byose dukenera gukora bijyanye n’iterambere."

"Benshi mu banyafurika na n’ubu babeshejweho n’ubutaka byaba mu buryo buziguye cyangwa butaziguye. Ubuhinzi bukeneye kwitabwaho by’umwihariko ku bafata ibyemezo muri Afurika, abahanga na ba rwiyemezamirimo.”

Yakomeje avuga ko iterambere ry’ubuhinzi muri Afurika ridashoboka igihe umuhinzi atitaweho ngo afatwe neza, kandi ubuhinzi bugashorwamo imari igaragara kugira ngo imbogamizi zibamo zigabanyuke.

Yavuze ko kugabanyuka kw’izo mbogamizi ari byo bizatuma benshi babwibonamo, by’umwihariko urubyiruko.

Ati “Tugomba gukora ubukangurambaga ku bahinzi kandi tukabafata nk’abakiliya. Bakeneye ubumenyi bugezweho na serivizi bigezweho kugira ngo bongere umusaruro kandi babashe guhangana n’imbogamizi bahura nazo. Ibi bizatuma akazi k’ubuhinzi kitabirwa n’urubyiruko kandi kabyare inyungu.”

Umukuru w’Igihugu yagaragaje ko urwego rw’abikorera ari ingenzi mu guteza imbere Afurika, nubwo bidakuraho uruhare rwa za Leta mu gutanga ibyangombwa kugira ngo ababukora buborohere.

Nubwo Afurika ibereye ubuhinzi, buri mwaka isohora miliyari 35 z’amadolari igura ibiribwa hanze yayo, ndetse nta gikozwe zizikuba gatatu bitarenze umwaka wa 2025.

Perezida Kagame yasabye urubyiruko kubyaza umusaruro amahirwe agaragara mu buhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza