Nyirishema ni we wegukanye imodoka muri Tombola ’Izihirwa’ ya RRA

Yanditswe na Uwishyaka Jean Louis
Kuya 10 Ugushyingo 2016 saa 12:23
Yasuwe :
0 0

Nyirishema Janvier, ni we munyamahirwe wegukanye imodoka muri EBM Tombola “Izihirwa” yateguwe n’Ikigo cy’Igihugu cy’Imisoro n’Amahoro,RRA, igamije gukangurira abantu bose gusaba no gutanga inyemezabuguzi za EBM mu gihe cyose hatanzwe igicuruzwa runaka.

Iki gikorwa cyabaye kuri uyu wa Kane tariki 10 Ugushyingo, ku cyicaro gikuru cy’iki kigo ku Kimihurura, ahanerekanwe ibindi bihembo biteganyijwe gutangwa birimo indi modoka, moto, televiziyo, telefoni, n’ibindi.

Nyuma yo kwegukana iyi modoka, Nyirishema yavuze ko ashimishijwe no kuba ayitomboye kuko ngo mu buzima bwe atigeze atekereza ko yatunga imodoka vuba aha.

Ashishikariza buri muntu uguze ikintu kugira umuco wo gusaba inyemezabuguzi kugira ngo agire amahirwe nk’ayo yagize, ndetse no kubaka igihugu muri rusange.

Ati “Abanyarwanda bakwiye kumenya ko aribo shingiro ry’iterambere ry’igihugu cyabo, kwaka inyemezabuguzi bigirira igihungu akamaro kandi n’amahirwe yagusekera, kuko njye numvise akamaro k’umusoro w’Inyongeragaciro (TVA), nitegereje ibikorwa utugezaho byaba amashuri, amavuriro n’iyi mihanda tugendamo, mpita mfata icyemezo cyo kujya naka inyemezabuguzi aho nguze ikintu hose."

Nyirishema avuga ko kwaka inyemezabuguzi igihe cyose umuntu agize icyo agura ari imwe mu nzira nziza zo kwiyubakira igihugu.

Komiseri Mukuru w’ikigo cy’Igihugu gishinzwe Imisoro n’Amahoro, Richard Tusabe, asaba abaguzi bose kugira umuco wo kwaka inyemezabuguzi z’ibyo baba bamaze kugura, ndetse bibuka no kwitabira gukina iri rushanwa.

Ati “ Iyo umucuruzi akoreresheje akamashini gatanga inyemezabuguzi ka EBM, aba yirinze kunyereza umusoro, icyo gihe agera mu isanduku ya Leta. Twashyizeho rero amahirwe kugira ngo abantu bajye bagarukirwa n’amafaranga baba batanze bajya guhaha.”

Avuga kandi ko iki gikorwa kigikomeje, agasaba abantu bose gukomeza kucyitabira bitewe n’uko ibihembo byinshi bikibategereje.

Nyirishema avuga ko yishimiye cyane iyi modoka bitewe n'uko atari yiteze gutunga imodoka vuba aha
Nyirishema avuga ko gutanga no kwaka inyemezabuguzi ari ukubaka igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244