00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Umuhanda wa kaburimbo bari kubakirwa watangiye kubahindurira imibereho

Yanditswe na Prudence Kwizera
Kuya 25 Gicurasi 2021 saa 04:17
Yasuwe :
0 0

Abaturage batuye mu bice bitandukanye by’Akarere ka Nyaruguru hafi y’ahari kubakwa umuhanda wa kaburimbo, bemeza ko batangiye kubona impinduka mu mibereho yabo n’iterambere.

Mu 2019 ni bwo mu Karere ka Nyaruguru hatangiye kubakwa umuhanda wa kaburimbo Huye-Kibeho-Munini-Ngoma ureshya n’ibilometero 66. Muri byo harimo ibilometero bitandatu bizenguruka Umujyi wa Kibeho ku butaka butagatifu. Biteganyijwe ko uzuzura muri Nzeri 2021.

Bamwe mu batutage bo mu Murenge wa Rusenge babwiye IGIHE ko kubakirwa uwo muhanda byatangiye kubahindurira imibereho nubwo utaruzura wose.

Ndayishimiye Emmanuel utwara abantu n’ibintu ku igare, avuga ko muri iki gihe akora akazi ke neza.

Ati “Mbere umuhanda utarubakwa wari umeze nabi ku buryo igare ryapfaga buri munsi nkajya gukoresha. Bakimara kutwubakira umuhanda wa kaburimbo nahise ngura igare rishya, ubu ni ukugenda neza ukanyaruka mu gihe gito kandi igare ryawe rigakomeza kuba rizima.”

Mugenzi Narcisse na we avuga ko iyo bakeneye gutega imodoka bajya mu Karere ka Huye n’ahandi biborohera kuko hashyiwemo imodoka zitwara abagenzi.

Ati “Mbere twagorwaga no gukora urugendo tujya i Huye cyangwa i Kigali kuko uyu muhanda wari mubi wuzuyemo ivumbi. Umuntu yategaga moto y’ibihumbi bitatu akagera i Huye imyenda yanduye. Kuri ubu ni ugutanga amafaranga 500 bisi igahita ikugezayo [Huye].”

Umuhanda wa kaburimbo uri kubakwa mu Karere ka Nyaruguru watumye ibigo bitwara abagenzi bitangira gukorerayo

Ndayongeje Célestin we avuga ko kubakirwa kaburimbo byatumye atangira kujya gukorera uruhushya rwo gutwara ibinyabiziga kuko ashaka kugura moto.

Ati “Kubera uyu muhanda mwiza natangiye gukorera uruhushya rwo gutwara kuko nshaka kugura moto yo kugendaho. Usibye kuba gutega imodoka bitworohera, dusigaye tugira n’abashyitsi ku buryo baduhahira. Hari n’abazungu basigaye batemberera iwacu bagenda n’amaguru bagakomeza i Kibeho.”

Sibomana Emmanuel umwe mu babonye akazi mu ikorwa ry’uwo muhanda wa kaburimbo, avuga ko yahakuye amafaranga menshi amufasha kwiteza imbere kandi yungutse ubumenyi.

Ati “Iriya kaburimbo nayikozeho mpakura amafaranga yamfashije gukemura ibibazo byinshi, ngura ibyo ari nkeneye kandi nita ku muryango wanjye. Ikindi ni uko nakoranye n’abantu benshi bafite ubunararibonye mu kubaka imihanda no gukoresha imashini, mpungukira ubumenyi.”

Bitewe n’uko mu Karere ka Nyaruguru umusaruro ukomoka mu buhinzi wiyongereye, hari n’indi mihanda ya kaburimbo iciriritse ya kilometero 34 igiye kubakwa izafasha gukura umusaruro w’abaturage mu mirima ukagezwa ku isoko. Iyo irimo umuhanda Munini-Kamana-Gatunda-Remera wa kilometero 19 n’undi wa Maraba ya Nyagisozi-Rusenge-Ngera-Nyakibanda wa kilometero 15.

Umuhanda wa Kaburimbo mu Karere ka Nyaruguru watangiye gukoreshwa n'ubwo utaruzura wose

Umuyobozi w’agateganyo w’Akarere ka Nyaruguru, Gashema Janvier, yavuze ko iyo mihanda nayo izatangira kubakwa mu gihe gito kuko ingengo y’imari yabonetse ndetse n’uwatsindiye isoko ryo kuyubaka yabonetse.

Yasabye abafatanyabikorwa kugana akarere ku bwinshi bakahashora imari kuko hari amahirwe menshi yo kubyaza umusaruro bakunguka ndetse n’abaturage bakabyungukiramo.

Ati “Turasaba abafatanyabikorwa kuza kuko hano hari amahirwe yo kubyaza umusaruro. Ibyo Leta yasabwaga yarabikoze kuko umuhanda wa kaburimbo uri kubakwa, amashanyarazi arahari, amazi arahari. Tugiye no kubaka ibilometero bitandatu bya kaburimo izenguruka umujyi wa Kibeho. Ahasigaye ni ahabo bakaza za bagashora imari.”

Umuhanda wa kaburimbo uri kubakwa mu Karere ka Nyaruguru watumye ibigo bitwara abagenzi bitangira gukorerayo kuko kuri ubu buri minota 30 imodoka ziva muri Gare ya Huye ziherekeza.

I Kibeho mu Karere ka Nyaruguru hamaze kuzura gare imodoka ziparikamo naho i Ndago hashyizweho Sitatiyo zinyweraho lisansi.

Biteganyijwe ko umuhanda wa kaburimbo Huye-Kibeho-Munini-Ngoma ureshya na kilometero 66 uzatwara agera kuri miliyari hafi 70 z’amafaranga y’u Rwanda.

Benshi biganjemo urubyiruko babonye akazi mu bikorwa byo kubaka umuhanda wa kaburimbo i Nyaruguru
Kubakirwa kaburimbo byateye bamwe umurava bayoboka ibikorwa by'ubucuruzi
Biteganyijwe ko umuhanda wa kaburimbo Huye-Kibeho-Munini-Ngoma ureshya na kilometero 66 uzatwara agera kuri miliyari hafi 70 Frw

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .