Mu minsi iri imbere umusaruro w’Ibigori uzajya ugaragaza uruhumbu uzajya utwikwa

Yanditswe na Ntabareshya Jean de Dieu
Kuya 17 Gashyantare 2021 saa 07:48
Yasuwe :
0 0

Ikigo cy’Igihugu gishinzwe guteza imbere Ubuhinzi n’ubworozi mu Rwanda (RAB) cyatangaje ko mu minsi iri mbere umusaruro uzajya ugaragaza ko urwaye indwara y’uruhumbu [Aflatoxine] uzajya ujugunywa cyangwa utwikwe kuko ari uburozi.

Aflatoxine ni ubumara butera uruhumbu, rugira ingaruka ku buzima bw’abantu.

Iki kigo cyatangaje ibi mu rwego rwo gukangurira abahinzi kwanika umusaruro w’ibigori wanarumbutse mu mwaka ushize.

Mu mwaka w’ingengo y’imari wa 2019/20 hari hateganyijwe miliyari 11 zizifashishwa mu kubaka ibikorwaremezo birimo ubwanikiro bugeze kuri 600 mu Gihugu, kubaka ubuhunikiro 60, kugura ubwanikiro bwa kijyambere(bwimukanwa) 10, ubwanikiro bwumisha ibigori ku makoma 6 mu kumisha umusaruro ukiva mu murima.

Umuyobozi wungirije ushinzwe ubuhinzi no gukusakaza ibyavuye mu bushakashatsi mu Kigo gishinzwe Ubuhinzi n’Ubworozi (RAB), Dr Charles Bucagu yabwiye IGIHE ko abaturage bakwiye kwitabira gukoresha ubwanikiro kugira ngo babashe kwirinda iyangirika ry’umusaruro wabo.

Ati “Muri iki gihe cyo gusarura no gufata neza umusaruro dukangurira abahinzi kwitabira kwiyubakira ubwanikiro bw’igihe gito. Turatekereza ko dufatanije ubu buryo bwose bw’ubwanikiro buzongera n’umusaruro mu gihugu.”

Bucagu avuga ko abaturage bagomba gufatanya bakumisha umusaruro kuko mu gihe kiri imbere umusaruro uzajya ugaragaza ko urwaye Aflatoxine uzajya ujugunywa cyangwa utwikwe.

Ati “Nta kibazo gihari cy’imyumvire, kuko abagura umusaruro iyo basanze urwaye aflatoxine ntibawugura. Ni ukuvuga ngo mu gihe kiri imbere umusaruro uzaba ugaragaza ko utarwaye aflatoxine uzajya ujugunywa cyangwa utwikwe kuko ni uburozi bushobora guteza ikibazo cy’indwara mu Gihugu, ubwo rero hazabaho ingamba zo gutuma uwo musaruro utagurishwa cyangwa ngo ugezwe mu nganda.”

Dr Bucagu avuga ko amwe mu makosa yagiye agaragara mu gufata neza umusaruro cyangwa umusaruro ubura isok, RAB iri gukorana n’abahinzi, abagura umusaruro n’abawukusanya kugira ngo hirindwe ibihombo bigenda bigaragara ku musaruro ukomoka ku buhinzi mu Rwanda.

Uyu muyobozi avuga ko bari gukorana na ba rwiyemezamirimo kugira ngo ubwanikiro bwongerwe mu gihe abaturage bagasabwa kurushaho gufata neza umusaruro wabo biyubakira ubwanikiro bw’igihe gito.

Raporo y’Ikigo cy’Igihugu cy’Ibarurishamibare mu Rwanda (NISR) ku buhinzi mu mwaka wa 2020 (upgraded seasonal agricultural survey 2020 annual report), igaragaza ko kuri hegitari imwe nibura umuhinzi yejeje toni 1,5. Umwaka ushize mu gihembwe cya mbere cy’ihinga habonetse toni z’ibigori 353.999 kuri hegitari 221.521 naho mu gihembwe cya kabiri haboneka toni 94.634 ku buso bungana na hegitari 72.918.

Umusaruro w'ibigori uzajya ugaragaza uruhumbu uzajya utwikwa cyangwa wangizwe mu bundi buryo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .