Mu mezi atandatu ya 2018, u Rwanda rwohereje hanze ibifite agaciro ka miliyoni 463 z’amadolari

Yanditswe na Ferdinand Maniraguha
Kuya 2 Nzeri 2018 saa 01:24
Yasuwe :
0 0

Banki Nkuru y’Igihugu (BNR) yatangaje ko ibyo u Rwanda rwohereza hanze byiyongereho 23.2 % mu mezi atandatu ya mbere ya 2018, bigera kuri miliyoni 463.16 z’amadolari bivuye kuri miliyoni 375.91 $ byariho mu mezi nk’ayo umwaka ushize.

Byatangajwe kuri uyu wa Kane tariki 30 Kanama 2018 ubwo BNR yamurikaga uko ubukungu bw’igihugu bwari buhagaze mu mezi atandatu ya mbere y’umwaka wa 2018.

Imibare ya BNR igaragaza ko ikinyuranyo cy’ibyo u Rwanda rwohereza hanze cyagabanyutseho 2% mu mezi atandatu ya mbere ya 2018 ugereranyje n’igihe nk’icyo mu 2017, aho cyavuye kuri miliyoni 677.86 z’amadolari kikagera kuri miliyoni 664.

Ibyo u Rwanda rutumiza hanze byiyongereyeho 7% kuko byageze kuri miliyoni 1 127.4 z’amadolari bivuye kuri miliyoni 1 053.8 z’amadolari.

Kuzamuka kw’ibyoherezwa hanze mu rusange, BNR ivuga ko kwaturutse ku izamuka ry’ibyoherezwa hanze gakondo nk’ikawa, icyayi, amabuye y’agaciro,ibireti n’ibindi byazamutseho 28.7%.

Ibyoherezwa hanze biva mu nganda nk’ibiribwa, ibinyobwa, ubukorikori byazamutseho 19.1 % naho ibibanza kongererwa agaciro byazamutseho 22.2%.

Iri zamuka ry’ibyoherezwa hanze kandi ryavuye ku izamuka ry’ibiciro ku rwego mpuzamahanga.

Ibyoherezwa hanze nk’ikawa, icyayi, amabuye y’agaciro, ibireti n’impu byinjije miliyoni z’amadolari 150.29 avuye kuri miliyoni 116.74.

Ikawa yonyine yinjije miliyoni 21.11 z’amadolari avuye kuri miliyoni 15.86. Icyayi cyinjije miliyoni z’amadolari 51.09 avuye kuri miliyoni 47.45.

Amabuye y’agaciro yoherejwe hanze yinjije miliyoni 73.43 z’amadolari avuye kuri miliyoni 48.34. Impu n’ibizikomokaho byoherejwe hanze bifite agaciro ka miliyoni z’amadolari 2.69 bivuye kuri miliyoni 4.04.

Kumanuka kw’amafaranga aturuka mu mpu kwatewe no kugabanyuka kw’ibyoherejwe kwageze kuri toni 1.49 bivuye kuri toni 3.31, bitewe no guhagarika imirimo by’agateganyo k’uruganda rwa Kigali Leather Company rwatangaga umusaruro mwinshi.

Ibireti byoherezwa hanze byageze kuri miliyoni 1.98 z’amadolari bivuye kuri miliyoni 1.05 z’amadolari.
Ibikomoka ku nganda z’ibinyampeke byinjije miliyoni z’amadolari 33.8 % bivuye kuri miliyoni 18.2, naho indabyo zinjije miliyoni 2.6 zivuye kuri miliyoni 1.1.

Made in Rwanda yatangiye gutanga umusaruro

Umuyobozi Mukuru ushinzwe ubukungu muri BNR, Prof Kigabo Thomas yavuze ko kwiyongera kw’ibyoherezwa hanze ari umusaruro mwiza wa politiki yo guteza imbere ibikorerwa mu Rwanda.

Yagize ati “Bigaragaza uburyo politiki ya Made in Rwanda, kongerera ubushobozi ubukungu , gutanga umusaruro uhaza isoko mu gihugu no kohereza ibintu mu mahanga bigenda bibyara umusaruro mwiza.”

Yakomeje agira ati “Indabo nazo ubona ko uyu mwaka zinjije amafaranga atari make, imyenda […] usanga mu by’ukuri ibiva mu nganda bitangiye koherezwa hanze mu buryo bushimishije cyane cyane muri iyi myaka ibiri.”

Ubukungu bw’u Rwanda uyu mwaka biteganyije ko buzazamuka kuri 7.2% buvuye kuri 6.1% bwariho umwaka ushize.

Prof Kigabo Thomas ushinzwe ubukungu muri BNR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza