MINICOM yiyemeje gukemura ikibazo cy’umusaruro w’ibikomoka ku buhinzi wabuze abaguzi

Yanditswe na Ntabareshya Jean de Dieu
Kuya 19 Gashyantare 2021 saa 07:33
Yasuwe :
0 0

Minisiteri y’Ubucuruzi n’Inganda yatangaje ko igiye gushakira igisubizo bidatinze ikibazo cy’umusaruro wagaragaye mu bice bitandukanye by’igihugu ukaburirwa isoko, abahinzi bakavuga ko byabahombeje.

Umusaruro byagaragaye ko wabaye mwinshi ukaburirwa isoko ni umuceri mu Karere ka Rusizi mu Gishanga cya Bugarama n’ibitunguru bihingwa mu Karere ka Rubavu.

Mu maganya yabo, abahinzi batakambaga bavuga ko n’ubwo bagize amahirwe yo kweza ariko bahuye n’igihombo gikomeye cyo kubura isoko ry’ubagurira umusaruro ngo babashe kumva uburyohe bw’isuka.

Nko mu Karere ka Rusizi abahinzi b’umuceri bararira ayo kwarika bavuga ko biri kubagora kubona amafaranga yo guhingisha imirima bitewe no kubura ubagurira umuceri basaruye, ikibazo cy’ingutu kuri bo.

Bamwe mu baganiriye RBA bavuze ko n’uwabonye isoko agurirwa ku giciro kiri hasi cyane ugereranyije n’ibyo umuhinzi atakaza kugira ngo abone umusaruro.

Umwe muri aba bahinzi yagize ati “Ukurikije ibishoro umuntu aba yashoye mu buhinzi n’igiciro kiba cyagenwe haracyarimo igihombo.”

Undi na we yabishimangiye agira ati “Amasoko yo turayabona, araza ariko ibiciro byo ntabwo bidushimishije nk’abahinzi.”

Umukozi Ushinzwe Ubucuruzi bw’Imbere mu Gihugu muri Minisiteri y’ubucuruzi n’Inganda, Karangwa Cassien, yagaragaje ko intandaro y’umusaruro uri kugaragara ku isoko uterwa ahanini no kuba abaguzi banini, nk’amashuri n’amahoteli batari gukora nk’uko bikwiye.

Ati “Biraterwa n’uko na wa musaruro inzego zakoreshaga wagabanutse cyane bitewe n’uko izo nzego zitari gukora nk’uko bisanzwe. Amashuri muzi igihe amaze afunze, n’ubwo mu ntara biga ariko muri Kigali ntibari kwiga, hoteli, Restaurants, utubari hose warakoreshwaga. Muri iyi minsi rero kuko bimwe bitari gukora hari umusaruro umwe n’umwe wiyongereye.”

Karangwa avuga ko Minisiteri iri gukurikirana iki kibazo ku buryo nta gihombo abahinzi bazagira.

Ati “Nko ku musaruro ubikika ni ukuvuga umuceri, ibigori n’ahandi nta kibazo kindi kizaba. Turimo turafatanya n’inzego zitandukanye ku buryo ahari umusaruro utaragurwa watangira ukagurwa. Abaturage bo icyo nababwira ntabwo twabatereranye ahubwo icyo turi kubashakira igisubizo ku musaruro bagifite.”

Impuguke zo zisanga ikibazo gihora kigaragara ku isoko ribereye umuhinzi inzira nziza yo kugikemura ari uko Leta yafasha abashoramari bari mu rwego rwongerera agaciro ibikomoka ku buhinzi hitawe ku kureba inyungu igihugu kizungukira muri uwo mushinga.

Impuguke mu buhinzi akaba Umushakashatsi n’Umwarimu muri Kaminuza, Dr Ukozehasi Célestin, yavuze kandi ko abahinzi na bo bakwiye kutazategereza isoko mu gihe cy’umusaruro ahubwo ko bakwiye gutangira umushinga wabo wo guhinga bazi neza ko bafite isoko ry’umusaruro.

Ati “Niba umuhinzi agiye gukora ubuhinzi bwe nk’umushinga, ntiyakabaye atekereza isoko nyuma yo guhinga. Tuvuge niba umuhinzi agiye guhinga kuri hegitari ebyiri ibitunguru, umuhinzi yagatekereje umuntu uzamugurira ibyo bitunguru agatangira akamushaka.”

Mu mwaka wa 2020, Ikigo cy’Igihugu cy’Ibarurishamibare mu Rwanda (NISR) cyashyize ahagaragara raporo igaragaza ko ubuhinzi bwinjije amafaranga y’u Rwanda miliyari 419, umusaruro uzamukaho 5% bijyanye no kwiyongera k’ubuso buhingwa no guhuza ubutaka.

Abahinzi b'ibitunguru muri Rubavu bavuga ko umusaruro wabo wabuze abaguzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .