00:00:00 IGIHE NETWORK KN KINYARWANDA EN ENGLISH FR FRANCAIS

Miliyari 1.2 Frw agiye gushorwa mu bikorwa byo guhangana n’amapfa

Yanditswe na Ntabareshya Jean de Dieu
Kuya 16 Ugushyingo 2021 saa 08:15
Yasuwe :
0 0

Mu gihe ibice byinshi mu bice by’Intara y’Iburasirazuba bikomeje kwibasirwa no kubura imvura muri iki gihembwe cya mbere cy’ihinga cya 2022, Minisiteri y’Ubuhinzi n’Ubworozi yatangije ibikorwa byo kuhira imyaka muri iyi Ntara bizatwara miliyari 1.2 Frw mu rwego rwo guhangana n’amapfa.

Ubusanzwe Intara y’Iburasurazuba ikunze kugenerwa ingengo y’imari izakoreshwa mu bikorwa byo kuhira cyane ko ikunze kurangwa no kubura imvura.

Muri uyu mwaka yari yagenewe ingengo y’imari ya miliyari imwe y’amafaranga y’u Rwanda agamije guhangana n’ibura ry’imvura binyuze mu kuhira imyaka.

Nubwo bimeze bityo ariko muri ibi bihe Intara y’Iburasirazuba imaze iminsi abahinzi bataka kubura imvura ku buryo byashoboraga no gukuriramo kwangirika ku musaruro w’ibikomoka ku buhinzi muri iyi ntara izwiho kweza cyane.

Mu rwego rwo guhangana n’aya mapfa, Minisiteri y’Ubuhinzi n’Ubworozi ku wa 15 Ugushyingo 2021 yatangije ibikorwa byo kuhira bidasanzwe biteganyijwe gutwara asaga miliyari 1.2 Frw kuko hazuhirwa ubuso bungana na Hegitare 450 kuri site 162 mu Ntara y’Ibirasirazuba.

Minisitiri w’Ubuhinzi n’Ubworozi mu Rwanda, Dr Mukeshimana Geraldine yavuze ko kuba ihindagurika ry’ikirere ryabaye mu Ntara y’Iburasirazuba bidasobanuye ko hari icyahindutse ku musaruro ku rwego rw’Igihugu.

Yagize ati “Imihindagurikire y’ikirere iri kuba mu gice kimwe cy’igihugu ntabwo ari mu gihugu hose bivuze ko ku rwego rw’igihugu umusaruro utajegajeze, ariko na none Leta y’u Rwanda ibana n’abaturage bayo. Dukorana n’inzego zitandukanye kugira ngo tubaze uko abaturage bameze kugira ngo haramutse hari ubufasha bukenewe bube bwatangwa.”

Yakomeje avuga ko aho byagaragara ko ihindagurika ry’ikirere ryagize ingaruka zikomeye ku musaruro, abaturage bakabura ibiribwa kubera amapfa cyangwa imvura nyinshi, Leta yiteguye gufasha abagizweho ingaruka nabyo.

Ati “Nta bwo ari ubwa mbere Leta itanga ubufasha mu gihe hagaragaye ikibazo mu bijyanye n’ibiribwa rero aho byagaragara mu kigega cy’igihugu hahoramo ibiryo byafasha abantu.”

Muri iki gikorwa gihuriweho n’uturere ndetse na Minisiteri y’Ubuhinzi n’Ubworozi, ibinyujije mu Kigo cy’igihugu gishinzwe guteza imbere Ubuhinzi n’Ubworozi mu Rwanda (RAB), ibizibandwaho ni ukuhira imyaka y’ibigori, ibishyimbo, soya, n’ibindi kuri site zegereye amazi.

Hari kandi gutera ubwatsi bw’amatungo ndetse no gukangurira abahinzi n’aborozi bo mu bice byatinze kugwamo imvura gutera imyaka yera vuba n’ibasha kwihanganira izuba, gutera ubwatsi bushobora guhunikwa, hamwe no kubyaza umusaruro Nkunganire ya Leta mu kuhira ku buso buto ku bikoresho byo gufata amazi no kuhira aho bishoboka.

Minisiteri y’Ubuhinzi n’Ubworozi kandi yahamagariye abacuruza ibikoresho byo kuhira gukomeza kurangura byinshi kugira ngo buri muturage ubikeneye abashe ku bibona bitamugoye.

Abapolisi nabo bari babukereye mu gikorwa kigamije kurwanya amapfa
Abaturage basabwe kutagira impagarara muri ibi bihe by'ibura ry'imvura
Abaturage nabo bagaragaje ko bishimiye kuba Leta ikomeje kubaba hafi no mu bihe by'amage
Habayeho no guhinga imbuto y'ibijumba
Abaturage bashishikarijwe gutera ubwatsi bw'amatungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .