Lina Higiro yagizwe Umuyobozi Mukuru wa Banki Nyafurika y’ubucuruzi mu Rwanda

Yanditswe na Evariste Nsengimana
Kuya 10 Nyakanga 2018 saa 10:15
Yasuwe :
0 0

Umunyarwandakazi, Lina Higiro, yagizwe Umuyobozi Mukuru w’Ishami rya Banki Nyafurika y’Ubucuruzi (CBA) rikorera mu Rwanda, asimbura umunya-Uganda, Edigold Monday.

Higiro asanzwe afite ubunararibonye mu bijyanye n’amabanki kuko guhera muri Nyakanga 2016 yari Umuyobozi ushinzwe ibikorwa byo kugenzura iterambere ry’ubucuruzi, ikoranabuhanga, guhererekanya amafaranga n’ibindi muri AB Bank, ishami ry’u Rwanda.

Mbere y’iyi mirimo, Higiro yabaye Umuyobozi w’ishami rishinzwe igenamigambi no kumenyekanisha ibikorwa muri banki y’ubucuruzi ya I&M Bank Rwanda, naho guhera muri 2007 kugera mu 2011 yari ashinzwe gukurikirana ibikorwa by’imishinga mito n’iciriritse mu yahoze ari Fina Bank, kuri ubu isigaye yitwa Guaranty Trust Bank.

Uretse ubwo bunararibonye akesha imirimo y’amabanki yagiye akora, Higiro anafite impamyabumenyi mu bijyanye n’amabanki yagiye akura mu mashuri akomeye zirimo; iy’icyiciro cya gatatu cya Kaminuza (MBA) yakuye mu ya Liverpool mu Bwongereza n’iy’icyiciro cya kabiri yavanye muri Afurika y’Epfo.

The New Times yanditse kandi ko Banki Nkuru ya Kenya yemeje ko Kayaboke Julius, aba Umuyobozi ushinzwe gukurikirana abakiliya n’imishinga mu kigo cy’imari cya Equity Group Holdings Limited mu bihugu byose gikoreramo birimo n’u Rwanda.

Kayaboke nawe asanzwe afite ubunararibonye mu bijyanye no kumenyekanisha ibikorwa, ari nabyo yari ashinzwe mu ruganda rukora ibinyobwa mu Rwanda rwa Bralirwa, mu gashami karwo gakora ikinyobwa cya Heinekein guhera mu 2011, ndetse akaba yaranakoze mu bihugu bitandukanye muri Afurika no mu Burayi.

Kayaboke yavuze ko mu gihe Banki iri kugendana n’ikoranabuhanga azibanda ku gukwirakwiza ubutumwa bugamije gutuma ibyiciro byose by’abatibonaga mu bikorwa bya banki bibonamo ku mpande zose.

Lina Higiro yagizwe Umuyobozi Mukuru wa CBA mu Rwanda
Julius Kayaboke yagizwe umuyobozi muri Equity Group Holdings Limited

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza