Kwamamaza

Leta igiye gushakira umuti ikibazo cy’imyanda ituruka mu ruganda rw’impu mu Bugesera

Yanditswe kuya 21-09-2016 saa 22:28' na Mukaneza M.Ange


Nyuma y’aho bigaragariye ko uruganda Kigali Leather Ltd rutunganyiriza impu mu Karere ka Bugesera rufite ikibazo kijyanye n’uburyo imyanda iturukamo itunganywa ku buryo hari impungenge ko yakwangiza ibidukikije, Leta y’u Rwanda igiye gufatanya n’izindi nzego zose bireba mu gukemura iki kibazo.

Ubwo kuri uyu wa 21 Nzeri 2016, yasuraga uru ruganda ruherereye mu Murenge wa Ntarama, Minisitiri w’Ubucuruzi n’Inganda, François Kanimba yavuze ko kiriya kibazo bakizi ndetse hashize iminsi bakiganira n’umushoramari.

Ati “Ikizwi ku isi ni uko izi nganda zitunganya impu koko zigira imyanda izivamo, kuyitunganya bisaba amafaranga menshi kugira ngo ushobore kubaka ikimoteri gitunganya imyanda kitagize iyo kijugunya hanze cyangwa se ngo habe haba n’imyuka mibi yagenda isa naho ihumanya abantu baturiye hafi y’aho inganda ziri.”

Yakomeje avuga ko nubwo ikoranabuhanga ryo kubikora rihari, usanga rihenze cyane ku buryo nta mushoramari wemera kubigiramo uruhare wenyine ahubwo basaba za guverinoma kubashyigikira.

Yongeyeho ko mu Rwanda bafashe igice kimwe mu gace kagenewe inganda mu Bugesera, aho hegitari 15 zizashyirwamo inganda zitunganya impu, leta ikazabafasha gushyiraho uruganda ruzatunganya imyanda izajya izivamo.

Kanimba yavuze ko ariko kuri uyu mushoramari w’umushinwa watangije uruganda Kigali Leather Ltd bitoroshye kuko yubatse yarahawe ibyangombwa ndetse leta ikaba idafite ubushobozi bwo kumwubakira nk’uko bisanzwe bigenda ku zindi nganda.

Ati “Twabonye rero rwose icyoroshye ari uko nka guverinoma, mu gukomeza gushyigikira uyu mushoramari twaza tukicarana nawe tukiga uburyo uruganda yashyize hano rutunganya imyanda rutujuje mu by’ukuri ibipimo by’ubuziranenge mpuzamahanga, twafatanya nawe kugira ngo tubitunganye.”

Ambasaderi w’u Bushinwa mu Rwanda, Pan Hejun yavuze ko iteka iyo inganda ziri gutangira zigenda zihura n’ibibazo, ariko leta n’izindi nzego zitandukanye zikaba zigomba gukorana kugira ngo zibishakire umuti.

Yakomeje avuga ko iterambere ntacyo ryaba rivuze igihe ibidukikije bitabungabunzwe, akaba ariyo mpamvu igihugu ahagarariye kizakorana n’u Rwanda mu gushaka umuti w’ikibazo kigaragara mu ruganda Kigali Leather Ltd.

Inkunga y’ibihumbi 860 by’amadorali niyo ikenewe ngo uru ruganda rubashe kubahiriza ibipimo bijyanye no kutangiza ibidukikije.

Uruganda Kigali Leather Ltd rwatangiye mu mpera z’umwaka wa 2014, rukaba rumaze gutunganya toni 1000 z’impu no guha akazi abanyarwanda bagera ku 100.

Uru ruganda rufite intego yo kutagarukira ku gutunganya impu gusa ahubwo rugatangira gukora n’inkweto ziri hagati y’igihumbi n’ibihumbi bibiri ku munsi.

Abakozi nabo ntibarabona imyambaro yabugenewe
Imashini ikoreshwa mu gukura ubwoya ku ruhu
Minisitiri Kanimba na Luan Yuming, uyobora Kigali Leather Ltd
Icyobo gitunganyirizwamo amazi ava mu ruganda
Imashini zitandukanye zikoreshwa mu ruganda Kigali Leather Ltd

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved