Leta ibereyemo abaturage umwenda wa miliyari 400 Frw z’ingurane

Yanditswe na Evariste Nsengimana
Kuya 26 Kamena 2019 saa 11:40
Yasuwe :
0 0

Minisitiri w’Ibikorwa Remezo, Amb. Gatete Claver, yatangaje ko Guverinoma yafashe ingamba zikarishye zigamije gukemura ikibazo cy’abaturage bimurwa cyangwa abafite imitungo y’ahagomba gushyirwa ibikorwa remezo nk’imihanda, amazi n’umuriro bagatinda guhabwa ingurane zabo.

Minisitiri Gatete yabitangarije Inteko Ishinga Amategeko, kuri uyu wa 25 Kamena 2019, ubwo yayigezagaho ibisobanuro mu magambo ku bibazo byagaragaye muri raporo y’ingendo abadepite bakoreye mu mirenge yose y’igihugu.

Izo ngendo zakozwe muri Mutarama na Gashyantare 2019 mu rwego rwo kugenzura ishyirwa mu bikorwa rya gahunda zo guteza imbere abaturage no kubakura mu bukene.

Mu bibazo bakirijwe harimo icy’abaturage batinda guhabwa ingurane z’imitungo yabo yangizwa hakorwa ibikorwaremezo.

Perezida wa Komisiyo y’Ingengo y’Imari n’Umutungo by’Igihugu mu Nteko Ishinga Amategeko, Prof. Omar Munyaneza, yavuze ko abaturage bagaragaza ko kugira ngo bishyurwe ingurane bitwara igihe kirekire.

Ati “Harongera hakibazwa ngo ni iki cyakozwe kugeza ubu ngo gukemura ibi bibazo no kwirinda ko iby’abimurwa n’abangirizwa imitungo ku mpamvu z’inyungu rusange bikomeza kugaragara.”

“Mu myanzuro [y’ibaruwa Abadepite bandikiye Minisitiri w’Intebe] yasabaga Mininfra kurangiza ibibazo by’ingurane zihabwa abimuwe ahagiye gukorerwa ibikorwa by’inyungu rusange.”

Mu bisobanuro yatanze, Minisitiri Gatete yavuze ko ikibazo cy’abaturage bagaragaza ko batinda guhabwa ingurane cyakunze kugaruka inshuro nyinshi mu itangazamakuru n’ahandi ndetse n’abaturage bakunze kubigaragariza Perezida wa Repubulika iyo yabasuye.

Muri rusange uteranyije umwenda w’ingurane Leta itarishyura abaturage mu bijyanye n’amazi, amashanyarazi n’imihanda usanga ugera nibura kuri miliyari 400 Frw ariko amenshi ashingiye ku hakorwaga imihanda.

Minisitiri Gatete yavuze ko gutinda kwishyurwa biterwa n’uko nta byangombwa by’ubutaka abaturage baba bafite, abandi badakorana n’ibigo by’imari, ikibazo cy’ikoranabuhanga mu Mirenge Sacco n’ibindi.

Ati “Kugira ngo uhabwe ingurane ni uko uba wemera isesengura riba ryakozwe kugira ngo herekanwe igiciro cy’amafaranga y’ingurane bagomba kuguha. Ikindi ugomba kuba ufite fotokopi y’icyangombwa cya burundu kigaragaza ko ubutaka ari ubwawe n’indangamuntu y’uhabwa ingurane na konti.”

Gusa ngo hari n’abatinda kwishyurwa bitewe n’amakimbirane imiryango yabo ifitanye ku butaka cyangwa uburyo bwo kugabana ingurane bazahabwa.

Ati “Ikindi kigaragara kiri ku ruhande rwacu nka Leta ni aho usanga akenshi iyo mwemeranyije ibintu byose bimeze neza, ujya kwishyura ugasanga amafaranga ahari ntabwo ahagije. Amafaranga yacu ava mu misoro, mu nguzanyo, mu baterankunga ariko ugasanga igihe ahagerera n’igihe agomba kwishyurwa akenshi biratinze.”

Minisitiri Gatete yabwiye Abadepite ko amafaranga y’ingurane z’imitungo yangijwe mu gukwirakwiza amazi, amashanyarazi n’imihanda, leta imaze kuyishyura ku gipimo kiri hejuru ya 90% hamwe na hamwe.

Ati “Ku bijyanye n’amazi, miliyari zirenga 3.3 Frw z’amafaranga ajyanye n’ingurane gusa ariko amaze kwishyurwa arenze miliyari 3 Frw, ari muri Ministeri y’Imari n’Igenamigambi izigomba kwishyurwa ni miliyoni 110 Frw, hari n’andi na none ari mu isuzuma ariko wajya kureba ugasanga amafaranga asigaye ni miliyoni 188 Frw.”

Ku bijyanye n’imitungo yangijwe mu gukwirakwiza amashanyarazi igomba gutangirwa ingurane, Gatete yavuze ko muri miliyari 6.5 Frw, hamaze kwishyurwa miliyari 4.7 Frw.

Ati “Hari iziri muri Minecofin [Minisiteri y’Imari n’Igenamigambi] miliyoni 640 Frw, hari n’izindi usanga zigisuzumwa kuko nibwo zikihagera. Ugasanga noneho ugiye kureba, kwishyura ntabwo ari ikibazo cyangombwa kidutwara umwanya munini ahubwo ikigoye cyane ni ukugira ngo twumvikane n’isuzuma ryo kureba ko umuntu yujuje ibyangombwa byose.”

Ku bijyanye n’ingurane zigomba kwishyurwa abaturage z’ibyangijwe hakorwa imihanda, Gatete yavuze ko umwenda wose wari miliyari zisaga 335.7 Frw ariko zimwe zamaze kwishyurwa.

Ati “Izimaze kwishyurwa ni miliyari 22 Frw zirenga, hanyuma izirimo gusuzumwa zigera kuri miliyari 13.5 Frw.Ugiye kureba rero, akazi karakomeza gukorwa ariko icyo umuntu yibazaga ni kuki bigumaho, ni kuki bitarangira?”

Hafashwe ingamba zikarishye

Minisitiri Gatete yavuze ko inzego zibifite mu nshingano zikomeza kubiganiraho zishaka uburyo icyo kibazo cyarangira, cyane hashakwa uburyo ibyo bibazo bituma batishyurwa birangira.

Ati “Ugiye kureba nk’imihanda, ingamba zafashwe mu by’ukuri ni ugukurikiza itegeko ry’uko ugomba kuba wahaye abaturage ingurane mbere y’uko utangira akazi ariko ufashe nk’umuhanda […] hagenda havuka ibindi bibazo.”

Muri ibyo yavuze ko uretse nk’abantu bavuga ko batanyuzwe n’agaciro kahawe umutungo wabo hari n’ibindi bigenda byangirika nyuma bitarabateganyijwe birimo nk’inyubako zishora kwiyasa mu ikorwa ryawo n’ibindi bitateganyijwe mu ngurane zateganyijwe.

Minisitiri Gatete yavuze ko hashyizweho komite zishinzwe gukurikirana ibyo bibazo by’ingurane z’ibyangijwe byose mu gukwirakwiza amazi, amashanyarazi no gukora imihanda.

Hari na gahunda yashyizweho y’uko uwahawe umushinga wo gukora igikorwa runaka, yemererwa hamaze kugenzurwa niba nta kibazo na kimwe ufite harimo n’iby’ingurane zigombaga guhabwa abari bahafite ibikorwa.

Minisitiri Gatete yasobanuye ko hari ibigo bimwe byanashyizeho ikoranabuhanga rifasha abaturage gukurikirana aho dosiye zabo zijyanye no kwishyurwa uwo mwenda zigeze atiriwe asiragira.

Ati “Mu Mirenge Sacco aho usanga zidakoresha ikoranabuhanga, umuntu ashobora kwishyurwa ariko ntanabimenye kubera ko nta makuru za banki zitanga. Ubu hari umushinga wo kwinjiza ikoranabuhanga muri za Sacco.”

Minisitiri Gatete yavuze ko ku bantu bishyurwa amafaranga make, basabwa gutanga konti kugira ngo bishyurwe, ugasanga ntazo bagira.

Ati “Turimo kuganira na Minisiteri y’Imari n’Igenamigambi kugira ngo turebe uko dushobora kuba twaborohereza kuko nacyo cyagiye kigaruka inshuro nyinshi. Naho ubundi kuri ibi birarane byose icyo twateganyaga ni ukugira ngo muri uyu mwaka w’ingengo y’imari byose birangirane no kwishyura kuko amafaranga arahari.”

Inteko Rusange yanzuye ko inyuzwe n’ibisobanuro yahawe na Minisitiri Gatete ariko yiyemeza ko izakomeza gukurikirana no kugenzura ko amakosa yagaragaye akosorwa.

Minisitiri w'Ibikorwaremezo, Claver Gatete, ubwo yagezaga ku Nteko Ishinga Amategeko ibisobanuro ku bibazo by'ingurane z'ahashyirwa ibikorwaremezo
Abadepite basabye Minisiteri y'Ibikorwaremezo gukora ibishoboka abaturage bakajya bahabwa ingurane ku gihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza