Kwamamaza

Leta mu rugamba rwo gufasha abahinzi guhangana n’imihindagurikire y’ibihe

Yanditswe kuya 15-11-2016 saa 09:43' na Jean Pierre Tuyisenge


Ingaruka z’imihindagurikire y’ibihe zateye ibibazo byinshi mu bikorwa bitandukanye birimo ubuhinzi, n’ubworozi bitewe ahanini no kutagira igikorwa mbere yo gutera ibihingwa.

Iyo imvura iguye ari nyinshi ibihingwa bitwarwa n’umwuzure, ndetse no mu gihe haba habaye izuba ryinshi, ibihingwa biruma bigatuma habura umusaruro, ikibazo gituma habaho ibura ry’ibiribwa.

Minisiteri ishinzwe gucyura Impunzi no gukumira Ibiza, MIDIMAR, ivuga ko hagati ya Mutarama na Nzeri 2016, ibyangirijwe n’ibiza bitandukanye biturutse ku mvura nyinshi bibarirwa muri Miliyari 27 z’amafaranga y’u Rwanda.

Ibyangiritse birimo inzu 4,611 zasenyutse na hegitari 5,388 z’ibihingwa. Mu bindi byagizweho ingaruka n’ibiza byibasiye igihugu, harimo amatungo 1,882 yapfuye, imihanda 26 yatengutse, ibiraro 41 n’ibyumba by’amashuri 47 byarasenyutse.

Hagati aho ingo 59,854 zagezweho n’amapfa cyane mu Ntara y’u Burasirazuba. Inyigo yakozwe na Minisiteri y’Ubuhinzi n’Ubworozi muri iyo ntara, yagaragaje ko hagati ya Nzeri 2015 na Kamena 2016, izuba ryinshi ryibasiye hegitari 16,119 zarimo ibihingwa ndetse byanakomeje mu gihembwe cya mbere cy’ihinga cya 2017 nkuko The New Times ibitangaza.

Ikigo cy’Igihugu cy’Iteganyagihe mu Rwanda, kivuga ko ibikorwa by’ubuhinzi burambye bisaba gukirikiza inama z’iteganyagihe kugira ngo hazagerweho umusaruro nyakuri ahanini, hibandwa ku kuhira imyaka, gukoresha inyogeramusaruro, imiti yica udukoko kugira ngo haboneke umusaruro ufatika.

Ni gute Meteo Rwanda ihangana n’ibi bibazo?

Umuyobozi ushinzwe iteganyagihe muri Meteo Rwanda, Mbati Mathieu Mugunga, yavuze ko kugira imvura ikabije cyangwa izuba ryinshi bituruka ku kuntu imiyaga iba ihuha ku Isi.

Yavuze ko mu minsi 10 ya mbere y’Ukwakira haguye imvura nyinshi yaherukaga kugwa muri ubwo buryo mu myaka 30 ishize. Yatanze urugero nko muri Kigali, imvura yaguye yari kuri mm 57 mu gihe nk’icyo mu myaka yabanje hari haguye ingana na mm 24.7.

Mugunga avuga ko iki kigo kigerageza kubwira Minisiteri y’Ubuhinzi ku bijyanye n’ingano y’imvura iba igiye kuzagwa mu gihe runaka, bigafasha mu gufata ibyemezo mu rwego rw’ubuhinzi.

Ati “ Iyo bamenye ko hazagwa imvura nke, bakangurira abahinzi kudatera ubwoko runaka bw’imyaka kuko iyo mvura ntacyo yabafasha, urugero, aho gutera ibigori, Minisiteri ishobora kubabwira bagatera ibishyimbo kuko bidakenera amazi menshi.”

Mugunga yavuze ko iyo ibyo bidatanze umusaruro hashakishwa uburyo hakorwa ibikorwa byo kuhira imyaka, atanga urugero rwo mu Ntara y’u Burasirazuba, hatangijwe uburyo bwo kuhira mu rwego rwo gufasha abahinzi.

Iki kigo gifite sitasiyo 72 gipimiraho imvura n’ubushyuhe, kikagira ibyuma bipima imvura bigera 100 bihagaze (automatic) n’ibindi bigendanwa (manual) 144. Yavuze kandi ko ibyo byose bifite ubushobozi bwo kuvuga ibizaba mu mezi atatu ari imbere.

Umukozi ushinzwe ibihe n’imihindagurikire y’ikirere muri Minagri, Bisangwa Innocent, yavuze ko ihindagurika ry’ibihe rikunze kugaragara cyane mu duce two mu byaro.

Bisangwa avuga ko gukora amaterase no gusasira imyaka ari bimwe mu byo Minagri yifashisha mu kurwanya isuri itembana ibihingwa biba biri mu mirima.

Hari gahunda yo guhangana n’izuba rikabije

Bisangwa avuga ko hari igishushanyo mbonera cyo kuhira imyaka kijyanye n’ingamba iyi Minisiteri yashyizeho. Ni uburyo bworohereza abahinzi baciriritse ku buryo Guverinoma imwishyurira 50% y’ibikoresho byo kuhira imyaka, ni igikorwa Minisiteri ivuga ko kizafasha abahinzi batarenza hegitari 10 z’ubutaka.

Ikigo cy’Igihugu gishinzwe guteza imbere Ubuhinzi n’Ubworozi (RAB), gitangaza kandi ko mu gihugu hose hegitari ibihumbi 45 zimaze kuhirwa, muri zo ibihumbi 30 ziherereye mu Ntara y’u Burasirazuba, mu gihe Guverinoma yiyemeje ko mu mwaka wa 2020 hegitari ibihumbi 100 zizaba zaruhiwe.

Imvura nyinshi yaguye yangije byinshi mu mezi icyenda ya mbere y'uyu mwaka

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved