KCB Bank igiye guhuza abacuruzi bo mu Rwanda n’abo mu bihugu birimo u Bushinwa

Yanditswe na Akayezu Jean de Dieu
Kuya 2 Kanama 2019 saa 10:28
Yasuwe :
0 0

Banki y’Ubucuruzi ya KCB Bank Rwanda Plc yatangije gahunda ya Biashara Club izafasha abacuruzi bo mu Rwanda kubona amahugurwa ku byo bakora no kubahuza na bagenzi babo mu bihugu byo mu Karere n’ibyateye imbere mu bucuruzi nk’u Bushinwa na Vietnam.

Biashara Club ni uburyo bwo guhuza abacuruzi bo mu Rwanda na bagenzi babo bakamenya amakuru y’uburyo bworoshye bwo kwegera abakiliya, bagahura n’abacuruza ibyo bakeneye kurangura na za banki zibafasha mu bikorwa byabo bya buri munsi.

Ibirori byo gutangiza iyi gahunda ya Biashara Club byabaye ku mugoroba wo ku wa Kane tariki 1 Kanama 2019, byitabirwa n’abasaga 300 biganjemo abasanzwe bakorana na KCB Bank.

Kugeza ubu KCB Bank ikorana n’abacuruzi babarirwa mu bihumbi 100 barimo abakora ubucuruzi buciriritse n’ubwo ku rwego rwo hejuru.

Umuyobozi Mukuru wa KCB, George Odhiambo, yavuze ko gahunda ya Biashara Club isanzwe iri mu bihugu bya Kenya, Sudani y’Epfo, Uganda n’ahandi kandi yagiye ifasha abacuruzi mu iterambere ryabo ari nayo mpamvu bashaka ko abo mu Rwanda na bo bagera ku iterambere.

Ati “Abakiliya bacu bakeneye gutera imbere, twe rero dushaka kubashyira hamwe tukaborohereza tubafasha kumenyana na bagenzi babo bateye imbere mu byo bakora, bakabigiraho bityo bakava ku rwego rumwe bajya ku rundi. Ikindi kandi dushaka kuzamukana na bo kuko iterambere ryabo niryo ryacu.”

Ibisabwa kugira ngo umucuruzi yemererwe kujya muri Biashara Club, ni ukuba uri umucuruzi kandi uri umukiliya wa KCB Bank, kwishyura amafaranga ibihumbi 100Frw y’ubunyamuryango buri mwaka cyangwa ibihumbi 12 Frw buri kwezi.

Abacuruzi baganiriye na IGIHE bavuze ko biteze kwagura ibikorwa byabo, ubumenyi no kwigira ku bandi bashoramari bo mu bihugu bitandukanye bazajyanwamo na KCB Bank.

Bigirimana Jean Bosco ufite Horizon Express itwara abantu yagize ati “Tuzunguka ubumenyi mu bijyanye n’ingendo shuri, amahugurwa dukora n’uburyo twagura ibikorwa byacu tugendeye ku byo abandi bakoze.”

Ntakwasa Pacifique uyobora Ikigo PV Investment Group gikora mu bucuruzi bwo kuvana no kohereza ibicuruzwa mu mahanga yavuze ko Biashara Club bayitezeho kunguka ubumenyi no kubahuza n’abandi bacuruzi bo hirya no hino.

Yagize ati “Uretse kuba basanzwe baduha serivisi zo kuduha amafaranga natwe tukabaha ayacu bakayatubikira, rero kuba hajeho ikintu cyo kuduha ubumenyi tugakora ubucuruzi kinyamwuga bizadufasha cyane.”

Umuyobozi Mukuru w’Urugaga rw’Abikorera mu Rwanda, Bapfakurera Robert, yashishikarije abacuruzi gukomeza umuco wo gukorana na banki kuko ariryo banga ry’iterambere ry’ubucuruzi bwabo.

Ati “Mu bucuruzi, amakuru ni ikintu gikomeye kugira ngo uteze ubucuruzi bwawe imbere, ikintu gikomeye mu gutera imbere ni ugufatanya na banki kuko iguha ubushobozi udafite.”

Bapfakurera yavuze ko kuba mu Rwanda abacuruzi bato bagize 98% , iyi gahunda ya Biashara Club ije nk’igisubizo kuko izabafasha mu kujya guhaha ubumenyi bityo bikabafasha kuzamura umusaruro.

Biashara Club Rwanda yatangiranye n’abacuruzi babarirwa hagati ya 300 na 500 bikaba byitezwe ko bazagenda biyongera binyuze mu bukangurambaga buzakorwa.

Iyi gahunda ya Biashara Club yatangiriye muri Kenya [ari nayo mpamvu izina ryayo riri mu giswahili] muri Nzeri 2008, aho kuri ubu ifite abanyamuryango babarizwa mu 18 000 muri icyo gihugu.

Ba rwiyemezamirimo batandukanye bari bitabiriye umuhango wo gutangiza Biashara Club
Umuyobozi Mukuru w’Urugaga rw’Abikorera mu Rwanda, Bapfakurera Robert, yasabye abacuruzi gukomeza gukorana na Banki
Umuyobozi wa TV1, Nkuriza Charles, ni umwe mu bitabiriye ibirori byo gutangiza Biashara Club
Nkusi Arthur ni we wayoboye ibirori byo gutangiza Biashara Club
Umuyobozi Mukuru wa KCB, George Odhiambo, yavuze ko Biashara Club igiye gufasha mu kuzamura ba rwiyemezamirimo bato
Bigirimana Jean Bosco ufite Horizon Express yavuze ko biteguye kunguka ubumenyi binyuze muri gahunda ya Biashara Club
Ntakwasa Pacifique uyobora Ikigo PV Investment Group yishimiye gahunda ya Biashara Club igamije gufasha abacuruzi kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza