00:00:00 IGIHE NETWORK KN KINYARWANDA EN ENGLISH FR FRANCAIS

Ishimwe ry’abahinzi ba kawa bungukiye muri porogaramu ibongerera ubumenyi n’ubushobozi

Yanditswe na Mukahirwa Diane
Kuya 20 Ugushyingo 2021 saa 12:22
Yasuwe :
0 0

Abahinzi n’abatunganya kawa barishimira umusaruro bagezeho nyuma yo gukorana n’ikigo cy’Abanyamerika kigura kawa Sustainable Harvest, mu mushinga wa MVP Program watumye babasha gutunganya no kugurisha kawa nziza.

Ibi babigarutseho kuri uyu wa Gatanu tariki ya 19 Ugushyingo 2021, ubwo habaga inama ihuza abahinzi n’abatunganya kawa bakorana n’iki kigo mukureba uko umwaka wagenze no gutegura uri imbere.

Sustainable Harvest ni ikigo cyo muri Leta Zunze Ubumwe za Amerika kigura kawa mu bihugu 18 byo muri Afurika na Amerika y’Amajyepfo. cyageze mu Rwanda mu 2004 ubu kikaba gikorana na koperative enye.

Mu rwego rwo gufasha abahinzi bayo bashyizeho porogaramu (MPV Program) ibaha amahugurwa, kubashakira isoko no kubafasha kubona amafaranga yo gukoresha muri banki n’ibigo by’imari, guha abayobozi ba koperative ubumenyi bwo kuyobora, kwinjiza urubyiruko muri koperative ndetse no guha agaciro abari n’abategarugori.

Bamwe mu bagiye muri iyi gahunda bavuga ko kuva bayigeramo bungutse byinshi byatumye kawa yabo ijya ku rwego rwo hejuru bituma umusaruro wabo wiyongera.

Umucungamutungo wa Koperative Abaterinkunga ba Sholi, Nshimiye Aimable, yavuze ko kwinjira muri MVP Program byatumye ikawa bagurishaga yikuba kabiri.

Yagize ati “Aho twagiriye muri MVP Program twungutse byinshi twe twatangiye dufite kontineri ebyiri zirazamuka zigera kuri enye, bagiye baduha agahimbazamusyi ko guteza imbere abagore bakiteza imbere.”

“Twabashije kugura ibikoresho by’ivuriro dufite, gutanga inka no korora inzuki, twabashije no kubaka ibyobo bifata amazi ava mu ruganda mu kurengera ibidukikije ndetse no kumenya isoko mpuzamahanga n’amahugurwa atandukanye n’ibindi byavuye muri iyi gahunda.”

Ibi abihuje na Perezida wa KOPAKAMA, Nkurikiyinka François, wavuze ko umusaruro bagurisha wazamutse ndetse n’abanyamuryango bahabwa ubushobozi butandukanye.

Yagize ati “Twageze kuri byinshi birimo gucuruza kawa kuko ubu tugeze ku kugurisha kontineri eshanu kandi twatangiriye kuri eshatu, kuko dukenera amafaranga menshi bituma banki iyaduha kuko iba ibona dufite abafatanyabikorwa.”

Yakomeje avuga ko ibi byahaye imbaraga koperative itera imbere mu buryo butandukanye kandi ashishikariza abandi bahinzi kuyoboka Sustainable Harvest.

Umuyobozi wa Sustainable Harvest muri Afurika, Rukwaya Eric, yavuze ko bahisemo kongerera abahinzi b’ikawa ubushobozi kugira ngo babashe gucuruza inziza.

Yagize ati “Tugira gahunda yubakira ubushobozi abahinzi n’amakoperative kugira ngo babashe gutanga kawa ikenewe ku isoko bitewe n’ibyifuzo by’abayinywa. Umuhinzi amenya ibikenewe ari uko umuhaye amakuru binyuze mu mahugurwa.”

Guha ubushobozi abahinzi b’ikawa bisobanuye byinshi ku bukungu bw’u Rwanda kuko iri ku isonga mu byoherezwa mu mahanga. Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB, cyatangaje ko mu mwaka wa 2020/2021, ibikomoka ku buhinzi byoherezwa mu mahanga bivuye mu Rwanda byinjije arenga miliyoni 444,8$, ni ukuvuga abarirwa hafi muri miliyari 447 Frw.

Mu 2020/21, u Rwanda rwohereje mu mahanga ibilo miliyoni 16,8 by’ikawa byinjije asaga miliyoni 61,5$, ni ukuvuga ko agera kuri miliyari 62.2Frw, akaba yariyongereyeho 1,83% ugereranyije na miliyoni 60,4$, zinjijwe mu bilo miliyoni 19,7 byoherejwe mu mahanga mu mwaka wabanje.

Abahinzi bakoranye na MVP bavuga ko yabongerereye ubushobozi mu bikorwa byabo
Abaturuka mu makoperative atandukanye bishimiye icyo gukorana na MVP byabagejeho
Amakoperative yakanguriwe kongera urubyiruko mu bo bakorana
Hasogongewe kawa zo mu bwoko butandukanye
Habayeho n'umuhango wo gusogongera kawa
Uyu munsi abahinzi bahuye baganira ku iterambere ry'ubuhinzi bwabo
Abafatanyabikorwa b'abahinzi barabasaba kongera umubare w'urubyiruko mu makoperative
Umuyobozi wa Sustainable Harvest muri Afurika, Rukwaya Eric, yavuze ko bahisemo kongerera abahinzi b’ikawa ubushobozi kugira ngo babashe gucuruza inziza
Umuyobozi w'Urugaga rw'Abahinzi b'ikawa mu Rwanda, yabashimiye uburyo bashyira umurava mu gutunganya ikawa nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .