Inzira ndende abashakashatsi bakoresha mu kubona intanga z’inka

Yanditswe na Prudence Kwizera
Kuya 5 Mata 2021 saa 09:10
Yasuwe :
0 0

Kuva mu Rwanda hatangira gahunda yo kuvugurura icyororo cy’inka hagamijwe kubona izitanga umukamo utubutse, hari nyinshi zimaze guterwa intanga.

Umuyobozi Mukuru wungirije ushinzwe ibijyanye n’Ubworozi muri RAB, Dr Uwituze Solange, avuga ko mu gihugu hari inka zirenga miliyoni imwe n’ibihumbi 390 kandi inyinshi ari iz’icyororo kivuguruye.

Ati “Uyu munsi 84% by’inka dufite mu Rwanda ni inka zivuguruye icyororo ni inka zivanze amaraso.”

Intanga zibanza gushakirwa ububiko

Kugira ngo intanga z’inka ziboneke zibanza gushakirwa imashini izibika mu mwuka witwa ‘liquid nitrogen’ uba uri ku bukonje bwa dogere Celsius 196 munsi ya zeru.

Umukozi wa RAB ushinzwe imikorere n’imikoreshereze y’imashini zibika intanga, Hagenimana Jean Paul, avuga ko izo mashini ari nk’uruganda rufasha kubona uwo mwuka wa liquid nitrogen.

Avuga ko uwo mwuka iyo umaze kuboneka ku bwinshi uri ku bukonje bwifuzwa ugereranywa n’amazi naho intanga z’inka zikagereranywa n’ifi.
Ati “Uru ruganda rufite ubushobozi bwo gutanga litiro 20 za liquid nitrogen mu isaha kuko ni imashini ebyiri. Imwe ibasha gukora litiro 10 mu isaha. Tubifata nk’aho turi gushaka amazi kugira ngo ifi yacu izabeho. Intanga wazigereranya n’ifi kandi ifi itari mu mazi ntiyabaho. Intanga nazo zitari muri liquid nitrogen ntabwo zabaho, zihita zipfa.”

Urwo ruganda rufasha kubona uwo mwuka wa liquid nitrogen rufite imashini zishobora gukora amasaha 24 zitaruhuka.

Iyo umwuka wa liquid nitrogen umaze kuboneka uba umeze nk’amazi akonje cyane, ariko iyo amenetse hanze atumuka nk’umwuka. Iyo liquid nitrogen ishyirwa mu bicupa binini byabugenewe byitwa ‘Bioster’ bigahabwa abatekinisiye bashinzwe gutera intanga bakajya kuyikoresha mu borozi.

Ati “Twebwe ku ruganda dufata ibi bicupa tukabishyiramo liquid nitrogen noneho uturere tukabitwara tukabishyikiriza abatekinisiye bashinzwe gutera inka intanga.”

Uko intanga z’inka zifatwa

Umukozi wa RAB ushinzwe kwita ku mpfizi zitanga intanga, Bizimana Jean Bosco, yabwiye IGIHE ko bafite ubwoko bune bwazo aribwo Firizone, Jersey, Inyambo na Simmental.

Avuga ko bafata intanga kuri buri mpfizi kabiri mu cyumweru, buri wa Kabiri na buri wa Gatanu. Muri zo impfizi imwe ishobora gupima toni imwe n’ibilo 150, zikaba zishobora kumara imyaka icyenda zitarasaza.
Ati “Uburyo dufatamo intanga, dufata impfizi ikazenguruka igikoresho cyabugenewe cyitwa mannequin noneho yacyurira tugategaho artificial vagina (igitsinagore cy’igikorano).”

Intanga zamaze gufatwa zimara igihe zisuzumwa muri Laboratwari kugira ngo harebwe niba ari nzima.

Iyo izo ntanga zimaze kubikwa muri liquid nitrogen zishobora kumara imyaka irenga 10 ntacyo zibaye.

Umukozi w’umushinga Diary Development Project (RDDP) ushinzwe gahunda zo kugaburira amatungo no kuvugurura icyororo, Nshokeyinka Joseph, avuga ko kuva batangira mu gushyira ubushobozi mu bikorwa byo kuvugurura icyororo hamaze gutangwa amafaranga arenga miliyoni 400 Frw mu kugura ibikoresho no guhugura abatekinisiye bashinzwe gutera inka intanga.

Ati “Kugeza ubu umushinga wari ufite gahunda yo guhugura abantu 300 bashya mu turere ukoreramo uko ari 14 ariko tumaze kugera kuri 255, dusigaje abantu 45 barimo 28 bari guhugurwa ubu.”

“Hari n’abasanzwe bakora twongerera ubushobozi bwo kumenya uko inka ihaka, dufite intego yo guhugura 300 ariko tumaze kugera kuri 230. 70 basigaye muri uyu mwaka w’ingengo y’imari turaba twabagezeho.”

Yavuze ko kuva umushinga watangira kugura intanga no kuzishaka mu bimasa, hamaze guterwa inka ibihumbi 149 kandi uyu mwaka w’ingengo y’imari wa 2020/21 uzarangira bamaze gutera izigera ku bihumbi 170.

Inka zatewe bwa mbere zamaze kubyara, izo zabyaye nazo ubu ni amashashi amaze kugera igihe cyo kwima no guterwa intanga.

Aborozi benshi bamaze kubona icyororo kivuguruye

Bamwe mu borozi bo mu Karere ka Nyanza babwiye IGIHE ko bamaze kuyoboka uburyo bwo gutera inka intanga kandi babwishimiye kuko butanga umusaruro mwiza.

Riyombyana Alexis wo mu Murenge wa Muyira ati “Nta nka n’imwe ntunze idakomoka kuri ubwo buryo bwo gutera intanga. Kuva nabuyoboka umukamo w’amata wariyongereye kuko mfite inka zikamwa litiro 12 ku munsi, ikamwa make igeza kuri litiro umunani ku munsi.”

Mukamparaye Françoise avuga ko kubangurira inka ku kimasa babiretse kuko byatumaga zivayo zarwaye.

Ati “Iyo twajyaga kubanguriza ku kimasa, inshuro nyinshi inka yakuragayo indwara kuko hari ubwo yazaga irwaye imitezi tugasubira inyuma tukavuza bikadutwara amafaranga menshi cyangwa inka igapfa. Ku ntanga nta ngaruka igira.”

Bamwe mu batekinisiye bahuguwe ku gutera intanga bemeza ko hari ibibazo byinshi byagiye bikemuka mu borozi birimo umukamo w’amata wari mukeya ndetse n’indwara zakomokaga ku kubanguriza ku bimasa. Bavuga ko nabo ubwabo bakuramo inyungu yo kunguka ubumenyi ndetse n’iy’amafaranga.

Tuyishime Fidele wo mu Murenge wa Muyira ati “Maze imyaka ibiri mbikora, maze gutera intanga nk’inka zirange 1000. Nanjye mbyungukiramo kuko intanga imwe nyirangura amafaranga 500 ariko iyo ngiye kuyiterera umworozi we yishyura 3000 Frw kuko yongeraho amafaranga y’urugendo n’aya serivise muhaye. Ibikoresho byo kubika intanga byo twabiherewe ubuntu na RDDP.”

Iyo inka itewe intanga ntifate, ubishinzwe yongera kuyitera bwa kabiri, nyirayo akamwishyura 1000 Frw y’urugendo.

Bamwe mu batekinisiye bari kongererwa ubumenyi ku gutera inka intanga muri RAB
Bimwe mu bicupa byagenewe ku bika liquid nitrogen
Bimwe mu bimasa byo muri RAB bishinzwe gutanga intanga
Iki gikoresho cyitwa mannequin ni cyo inka yurira kugira ngo ibashe gutanga intanga
Imashini zifashishwa mu gukora liquid Nitrogen zifatwa nk'uruganda rw'intanga
Imwe mu nka zo muri RAB yakomotse ku gutera intanga
Liquid nitrogen imeze nk'amazi ariko iyo igeze hanze ivuye mu bubiko nwayo itumuka nk'umwotsi
Mu Karere ka Nyanza hari abamaze kuyoboka uburyo bwo gutera inka intanga kandi bavuga ko babwishimiye kuko butanga umusaruro mwiza
Ubu bwoko bw'impfizi, imwe ishobora gupima toni imwe ikamara imyaka icyenda itarasaza
Nshokeyinka Joseph avuga ko kuva batangira mu gushyira ubushobozi mu bikorwa byo kuvugurura icyororo hamaze gutangwa amafaranga arenga miliyoni 400 Frw
Tuyishime Fidele wo mu Murenge wa Muyira avuga ko amaze imyaka ibiri atangiye gutera inka intanga kandi amaze gutera inka zirenga 1000
Umukozi wa RAB ushinzwe kwita ku mpfizi zitanga intanga Bizimana Jean Bosco yerekana zimwe mu mashini zibanza gusuzuma ko intanga bafashe ari nzima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .