00:00:00 IGIHE NETWORK KN KINYARWANDA EN ENGLISH FR FRANCAIS

Inyungu ya Equity Group Holdings Plc yazamutseho 23%, umutungo wayo ugera kuri miliyari ibihumbi 10,8 Frw

Yanditswe na Iradukunda Serge
Kuya 8 Ugushyingo 2021 saa 10:11
Yasuwe :
0 0

Ikigo cy’Ishoramari cyo muri Kenya, Equity Group Holdings Plc, cyatangaje ko mu mezi icyenda ya mbere ya 2021, inyungu cyabonye nyuma yo kwishyura ibisabwa byose yazamutse ku kigero cya 23% igera kuri miliyari 442,4 Frw, bituma umutungo wacyo ugera kuri miliyari 104.8 Kshs, angana na miliyari ibihumbi 10,8 Frw.

Equity Group Holdings Plc ni ikigo cy’ishoramari mu bijyanye na serivisi z’imari cy’Abanya-Kenya. Gifite banki mu bihugu bitandukanye byo mu Karere birimo n’u Rwanda.

Amakuru yatanzwe n’iki kigo yagaragaje ko kugera muri Nzeri 2021 umutungo wacyo mbumbe wabarirwaga muri miliyari ibihumbi 10,8 Frw. Ni izamuka rya 27% kuko mu mezi icyenda ya mbere ya 2020 cyari gifite umutungo ubarirwa miliyari ibihumbi 8,5 Frw.

Iri zamuka ry’umutungo wa Equity Group Holdings Plc ryaturutse ku kwiyongera kw’amafaranga yinjiza biturutse mu bikorwa bitandukanye, urugero nk’amafaranga abakiliya babitsa yavuye miliyari ibihumbi 6,3 Frw yari ariho mu mezi icyenda ya mbere ya 2020 agera kuri miliyari ibihumbi 7,9 Frw.

Ikindi cyatumye umutungo iki kigo gifite wiyongera, ni izamuka rya 48% mu bijyanye n’inguzanyo z’igihe kirekire cyabonye, aho zavuye kuri miliyari 644 Frw zigera kuri miliyari ibihumbi 7,9 Frw.

Ubundi bucuruzi bwazamuye umutungo w’iki kigo ni ubujyanye n’ivunjisha ry’amafaranga kuko cyabukuyemo agera kuri miliyari 5,6 Frw avuye kuri miliyari 3,6 Frw cyari cyinjije mu mezi nk’aya mu 2020. Mu bijyanye n’ubucuruzi bwo kuri internet, Equity Group Holdings Plc ho yakuyemo agera kuri miliyari 8,5 Frw, mu gihe ibijyanye n’impapuro mpeshwamwenda byayinjirije miliyari 19,8 Frw.

Uretse umutungo mbumbe w’iki kigo, ikindi cyazamutse mu mezi icyenda ya mbere ya 2021 ni amafaranga y’inyungu cyabonye.

Amafaranga Equity Group Holdings Plc yungutse mbere yo gukuramo imisoro yazamutse ku kigero cya 85%.

Inyungu z’iki kigo hatabariwemo imisoro nazo zazamutse ku kigero cya 79%. Nyuma yo kwishyura ibisabwa byose, Equity yasigaranye inyungu ya miliyari 442,4 Frw. Iyi nyungu yayo yazamutse ku kigero cya 23% kuko yavuye kuri miliyari 358,5 Frw.

-  Ikoranabuhanga ryarimakajwe

Uretse kuba iki kigo cyarabashije gucuruza kikanunguka nubwo Isi yari mu bihe bya COVID-19, indi ntambwe ikomeye cyateye iri mu bijyanye n’ikoreshwa ry’ikoranabuhanga muri serivisi za banki.

Imibare yashyizwe hanze igaragaza ko mu mafaranga afite agaciro ka miliyari 8,7 Frw yahererekanyijwe muri Banki z’iki kigo mu gihe cy’amezi icyenda agera kuri 3% ariyo yonyine yahererekanyijwe bisabye abantu kujya kuri banki cyangwa gukoresha ATM.

Asigaye angana na 97% yahererekanyijwe hifashishijwe ikoranabuhanga ririmo n’irijyanye na ‘application’ zo muri telefone zigezweho.

Guhererekanya amafaranga hifashishijwe uburyo bw’ikoranabuhanga bwo kwishyura buzwi nka ‘Pay with Equity (PWE)’ byazamutse ku kigero cya 408%, biva ku nshuro miliyoni 3,1 bigera ku nshuro miliyoni 15,8. Agaciro k’amafaranga yahererekanyijwe hifashishijwe iri koranabuhanga nako kazamutseho 392%, kava kuri miliyari 154 Frw kagera kuri miliyari 757,6Frw.

Umuyobozi Mukuru wa Equity Group Holdings Plc, Dr James Mwangi, yavuze uku kwiyongera kw’ikoreshwa ry’ikoranabuhanga kwatewe n’impamvu zitandukanye zirimo na COVID-19.

Ati “Mu buryo bugenda bwiyongera, internet n’ubucuruzi buyikorerwaho biri guhinduka uburyo bukunzwe na benshi mu bijyanye no kwishyura n’imibereho ya buri munsi, abagera kuri 74% bayobotse uburyo bwo guhererekanya amafaranga hifashishijwe ikoranabuhanga.”

“Covid-19 yabaye imbarutso yo kuyobokwa kw’ikoranabuhanga mu bijyanye na ma banki ndetse bituma natwe tuba ikigo cy’inini cy’ikoranabuhanga mu rwego rwa serivisi z’imari.”

Dr James Mwangi yavuze ko bashyize iyi mibare hanze mu gihe bamaze kubona ko gukora ubucuruzi ariko umuntu akanibuka gufasha bitanga umusaruro mu bikorwa bakora buri munsi.

Yakomeje ati “Dushyize hanze uyu musaruro mu gihe twamaze gukura amasomo mu buryo bwacu bwo gukora ubucuruzi bugamije no kuzana impinduka mu mibereho yo muri sosiyete. Twabonye ko ubu buryo bukomatanyije butanga umusaruro mu bijyanye n’ubukungu kandi buramba. Kugera ku ntego bishobora kujyana no gukora ibyiza.”

Yavuze ko umuryango w’iki kigo ukora ibikorwa by’ubugiraneza uzwi nka Equity Group Foundation warushijeho kwegera abantu utanga buruse zitandukanye.

Equity Group Holdings Plc ni kimwe mu bigo by’ishoramari bihagaze neza muri Afurika y’Iburasirazuba. Ibi bigaragazwa n’uko Equity Bank yashyizwe muri banki 1000 zikomeye ku rwego rw’Isi. Mu rutonde rukorwa n’ikinyamakuru gikunze gutangaza inkuru zigaruka ku bukungu, bishimangira ishoramari rihamye ikomeje kubaka mu Karere ka Afurika y’Iburasirazuba no ku ruhando Mpuzamahanga.

Equity bank ni ishami rigize Equity Group Holdings Plc, ikigo gifite ishoramari mu bindi bikorwa birimo ubwishingizi, itumanaho, ikoranabuhanga mu bikorwa by’imari n’ibindi bitandukanye.

Umuyobozi Mukuru wa Equity Group Holdings Plc, Dr James Mwangi, yavuze kwiyongera kw’ikoreshwa ry’ikoranabuhanga kwatewe n’impamvu zitandukanye zirimo na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .