Inyungu u Rwanda rwiteze gukura mu kuba Umunyamuryango w’Ikigo cy’Iterambere cya OECD

Yanditswe na Evariste Nsengimana
Kuya 17 Kamena 2019 saa 05:16
Yasuwe :
0 0

Muri Gicurasi 2019 nibwo u Rwanda rwemerewe kwinjira mu bihugu by’ibinyamuryango by’Ikigo cy’Iterambere cyashinzwe n’Umuryango w’Ubufatanye mu Bukungu, OECD, rwiyongera mu bindi 54 biwubarizwamo.

OECD Development Centre u Rwanda rwinjiyemo nyuma yo kwandika rubisaba mu Ugushyingo 2018, yashinzwe mu 1961 nk’ikigo cyigenga kigamije guhuza OECD n’ibihugu biyigize mu biganiro ku gusangira ubumenyi no guteza imbere ubukungu.

U Rwanda rubisaba rwagaragaza ko rushaka kuba umunyamuryango kugira ngo rurusheho guteza imbere no kuvugurura birushijeho urwego rw’ishoramari.

Raporo ya Banki y’Isi ya ‘Doing Business’ yo mu Ukwakira 2018, yagaragaje ko mu koroshya ubucuruzi, u Rwanda ruri ku mwanya wa 29 mu bihugu 190 ku Isi, n’uwa kabiri muri Afurika inyuma y’Ibirwa bya Maurice.

Mu kiganiro Minisiteri y’Ubucuruzi n’Inganda yagiranye n’itangazamakuru kuri uyu wa Mbere, tariki ya 17 Kamena 2019, Minisitiri Hakuziyaremye Soraya, yavuze ko u Rwanda rwishimiye kwinjira muri uwo muryango kuko bizatuma rukomeza icyerekezo cy’iterambere rufatanyije n’ibihugu biwusanzwemo.

Yavuze ko u Rwanda rugiye kungukiramo byinshi kuko ari amahirwe rubonye yo kungurana ibitekerezo n’ibindi biwusanzwemo kuri Politiki z’ubukungu n’iterambere.

Yagize ati “Kuba twaremerewe kuba muri uyu muryango byerekana ko iterambere u Rwanda rugezeho rifite agaciro kanini mu ruhando mpuzamahanga kandi bizafasha u Rwanda kugera ku ntego zarwo zo kongera ingufu mu bushakashatsi mu by’ubukungu n’iterambere.”

Hakuziyaremye yavuze ko ari umwanya mwiza n’amahirwe yo kureba imiterere y’iterambere ry’ibihugu bigize OECD n’ibyo byasangizanya n’u Rwanda.

Ati “Bizanafasha cyane u Rwanda gukomeza kugira ubuhahirane n’ubufatanye burambye n’ibindi bihugu biri muri uyu muryango wa OECD na OECD Development Centre.”

U Rwanda n’ibindi bihugu binyamuryango bizajya bihurira ku mishinga, ibiganiro n’ibikorwa byabyo n’iby’abashoramari babiturukamo kandi bigire uruhare mu iterambere ry’ubukungu bw’u Rwanda.

Muri ibyo yavuzemo nk’ikiganiro u Rwanda ruheruka gutumizwamo muri Gicurasi, cyahuje abafata ibyemezo mu bukungu n’iterambere muri Afurika, kigamije kureba iterambere ry’ubukungu bw’umugabane mu by’ikoranabuhanga.

Muri iyo nama, sosiyete zirindwi zo mu Rwanda zagaragaje imishinga igamije guhanga udushya zikora n’amahirwe y’ishoramari ari mu gihugu.

Hakuziyaremye ati “Twagaragaje ibijyanye n’uko u Rwanda rwifashe mu ishoramari mu by’ikoranabuhanga, tuganira kuri Kigali Innovation City [umushinga ukomeye ugamije kugira u Rwanda igicumbi cy’ikoranabuhanga muri Afurika], n’amahirwe tubona nk’igihugu ko gukomeza gukoresha ikoranabuhanga mu bijyanye no gushyira imbaragara mu ikoranabuhanga mu bucuruzi.”

Yakomeje agira ati “Indi nyungu tuzakuramo ni ugukomeza gusangira n’abandi banyamuryango b’ibyo bihugu, ubunararibonye cyangwa amasomo twagiye tuvana mu rugendo rwacu rw’iterambere hanyuma tukumva n’ibindi bitekerezo by’abandi banyamuryango.”

Mu bihugu 11 byo muri Afurika bibarizwa muri iki kigo birimo Misiri, Côte d’Ivoire, Ibirwa bya Maurice, Ghana, Sénégal, Afurika y’Epfo, Maroc na Tunisia.

Kibarizwamo kandi ibindi bikomeye nk’u Bubiligi, u Bwongereza, Brésil, Israel, u Buyapani, u Bufaransa n’ibindi.

Minisitiri w’Ubucuruzi n’Inganda, Hakuziyaremye Soraya, yavuze ko u Rwanda rwishimiye kuba Umunyamuryango w’Ikigo cy’Iterambere cya OECD

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza