00:00:00 IGIHE NETWORK KN KINYARWANDA EN ENGLISH FR FRANCAIS

Intara y’Amajyaruguru yinjije miliyari 27.8 Frw y’imisoro mu isanduku ya Leta

Yanditswe na Ntabareshya Jean de Dieu
Kuya 2 Ugushyingo 2021 saa 04:09
Yasuwe :
0 0

Intara y’Amajyaruguru yinjije imisoro ingana na miliyari 27.8 mu isanduku ya Leta mu mwaka wa 2020/2021, ibintu bishimangira ko Abaturarwanda bamaze gusobanukirwa no gutanga umusanzu wabo binyuze mu kwishyura umusoro kuko intego y’iyo ntara yagezweho ku kigero cya 111.4%.

Mu ngengo y’imari y’umwaka wa 2020/2021 mu Ntara y’Amajyaruguru intego yari ukwinjiza imisoro ya miliyari 24.9 Frw. Nubwo byari mu bihe bidasanzwe byo guhangana n’icyorezo cya Covid-19 ndetse no kuzahura ubukungu bwari bwarashegeshwe nayo, iyi ntego yagezweho ndetse harengaho miliyari 2.9 Frw.

Ugereranyije n’umwaka wa 2019/2020 Intara y’Amajyaruguru mu gutanga imisoro n’amahoro muri 2020/2021 yazamutseho ku kigero cya 23.0%.

Muri iyi Ntara kandi ku misoro yeguriwe inzego z’ibanze habonetse miliyari 8.9 Frw mu gihe hari hariho intego yo kugera kuri miliyari 8.3Frw, bivuze ko iyi ntego nayo yagezweho ku kigero cy’106.7%.

Komiseri Mukuru Wungirije wa RRA, Kaliningondo Jean-Louis, yavuze ko ahanini imisoro yari yitezwe yagiye izamuka bitewe n’uko ubukungu bw’igihugu nabwo bwazamutse ku buryo butari bwitezwe ndetse n’ingamba za RRA zashyizwemo imbaraga.

Yagize ati “Ubukungu bwarazamutse ku gipimo kirenze uko byari byitezwe, kuko twatekereza ko buzazamuka ku kipimo cya 0.5% ariko ubukungu bwazamutse ku kigero cya 4.4 %. Hari kandi ingamba za RRA nazo zakajijwe, bamwe mu bacuruzi bari batangiye kwitwara nabi turushaho kubigisha, gukoresha EBM nabyo biri mu mpamvu zatumye wiyongera ndetse no korohereza abantu. Abasora nabo bubahirije inshingano zabo muri icyo gihe natwe turushaho koroherezwa mu kazi kacu.”

Kuri ubu intego y’umwaka wa 2022/2022 Intara y’Amajyaruguru biteganyijwe ko igomba kwinjiza miliyari 29.3 Frw mu isanduku ya leta avuye mu misoro naho mu yeguriwe inzego z’ibanze zikaba miliyari 7.5 Frw mu gihe ku rwego rw’igihugu ni intego RRA ifite ari ukwinjiza miliyari 1755.5 Frw.

Mu gushyira ibi mu bikorwa kugeza ubu, mu gihembwe cya mbere mu Ntara y’Amajyaruguru yagezweho ku kigero cya 99.8% 6 kuko hakusanyijwe miliyari 6.57 Frw mu gihe intego yari miliyari 6.58 frw.

Kaliningondo yagaragaje ko impamvu zatumye itangwa ry’imisoro mu gihembwe cya mbere muri 2021/2022 ritagerwaho nkuko byari byitezwe, ari nyinshi kandi zitandukanye zirimo gahunda ya guma mu rugo yabaye itari yitezwe muri Nyakanga na Kanama 2021.

Gusa nubwo ibyifuzwaga bitagezweho, ugereranyije n’umwaka wa 2019/2020 habayeho ubwiyongere bwa 11% mu gihembwe cya mbere.

Yavuze ko kugira ngo intego y’Ikigo cy’Igihugu cy’imisoro n’amahoro mu Rwanda igerweho, bisaba ubufatanye bw’inzego zinyuranye by’umwihariko intara zifite uturere duhana imbibi n’ibindi bihugu mu kurwanya ubucuruzi bwa magendu.

Ati “Gukomeza guhuza ingufu mu ruhare rw’imisoro n’amahoro, kongera ubufatanye mu kubaka umuco mwiza wo kwaka no gutanga inyemezabwishyu ya EBM, kwirinda magendu n’inyerezwa ry’imisoro tukagira n’uruhare mu kuyirwanya. Birasaba cyane intara zifite uturerere dukora ku bindi bihugu kurushaho kurwanya ibyo bikorwa. Turifuza kandi ko murushaho gukoresha ikoranabuhanga mu kwishyura imisoro.”

Yakomeje avuga ko RRA yiteguye gukangurira inzego z’imirimo itandukanye yagaragaje kugenda biguru ntege mu kwishyura imisoro.

Yasabye abatuye Intara y’Amajyaruru kurushaho gufatanya gukangurira abakora ibikorwa by’ubucuruzi kwitabira gutanga umusoro cyane ko ari inkingi y’iterambere.

Guverineri w’Intara y’Amajyaruguru Nyirarugerero Dancille yavuze ko umusoro watanzwe wagize uruhare rukomeye mu guteza imbere Intara y’Amajyaruguru binyuze mu kwagura ibikorwa remezo binyuranye birimo uburezi, ubuzima n’ubukerarugendo.

Yagize ati “Ndagira ngo nongere gusaba abasora bose muri iyi ntara guhora muharanira guteza imbere intara yacu ndetse n’igihugu mutanga imisoro, kwirinda magendu ndetse no gukoresha EBM neza. Iterambere twifuza rizaterwa n’uruhare rwacu mu gutanga imisoro no kongera uruhare mu kuzamura imyumvire mu baturage.

Umuyobozi wa PSF mu Ntara y’Amajyaruguru, Mukanyarwaya Donatha, yavuze ko nubwo byari mu bihe bidanzwe bya Covid-19, batacitse intege mu kwishyura imisoro n’amahoro.

Yagize ati “Ntitwacitse intege muri bike twacuruje twakomeje gutanga imisoro nkuko bikwiye. Abikorera ntabwo tuzacika intege ahubwo tuzakomeza kwishakamo ibisubizo, hari imbogamizi twagiye duhura nazo ari RRA yagiye iduha umurongo mu mahuriro atandukanye duhuriramo.”

Mu nama nyunguranabitekerezo ubuyobozi bwa RRA bwagiranye n’Abikorera bo mu Ntara y’Amajyaruguru bagaragaje ko hari ibyifuzo bafite bitandukanye mu rwego rwo kunoza imikoranire.

Muri byo harimo kwegerezwa serivisi za RRA ku buryo nibura nka rimwe mu gihembwe abakozi bajya baha umwanya abacuruzi bakumva ikibazo cya buri wese, gufasha abari bafite utubari mbere ya Covid-19 ku bijyanye no kwishyura imisoro, kohererezwa ubutumwa bugufi bugaragaza ibikorwa byakorewe kuri TIN Number y’umucuruzi, n’ibindi bikigaragara nk’imbogamiz

Ni ku Nshuro ya 19 Ukwezi Ngarukamwaka kwahariwe gushimira abasora kubaye, bifasha RRA kongera kugira umwanya wo guhura n’abafatanyabikorwa mu kurushaho kungurana ibitekerezo ku birebana no kunoza serivisi z’imitangire y’umusoro.

Abacuruzi n'abikorera bo mu Ntara y'Amajyaruguru bagaragaje ko batakibwirizwa kwishyura imisoro
Abafatanyabikorwa batandukanye bagaragaje ko batazacika intege mu gutanga imisoro
Abasoreshwa bo mu Ntara y'Amajyaruguru bagararijwe ko umusoro batanga ari wo uteza imbere intara yabo
Kaliningondo Jean Louis yasabye abacuruzi bo mu Ntara y'Amajyaruguru gukomeza guharanira gutanga umusanzu wabo binyuze mu kwishyura imisoro neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .