Ingengo y’imari ya EAC mu 2018/2019 yagabanutseho miliyoni zirenga 10 $

Yanditswe na Cyprien Niyomwungeri
Kuya 4 Kamena 2018 saa 10:03
Yasuwe :
0 0

Umuryango wa Afurika y’Uburasirazuba (EAC) wamurikiye Inteko Ishinga Amategeko y’uyu muryango (EALA), ingengo y’imari izakoreshwa mu mwaka w’ingengo y’imari wa 2018/2019, aho yagabanutseho miliyoni zirenga 10 z’amadolari ugereranyije n’iy’uyu mwaka urimo gusozwa.

Umuyobozi w’Akanama k’Abaminisitiri akaba na Minisitiri w’Intebe wungirije wa Uganda, Dr Ali Kirunda Kivenjija, kuri uyu wa Mbere yagaragarije EALA ko mu mwaka utaha w’ingengo y’imari, EAC iteganya gukoresha 99,770,716 $ zivuye kuri 110,130,184 $ zakoreshejwe muri uyu mwaka urimo kurangira.

Ibikorwa by’ingenzi bizitabwaho mu mwaka utaha w’ingengo y’imari n’ibijyanye no koroshya urujya n’uruza rw’abantu n’ibintu mu karere, urujya n’uruza rw’abakozi na serivisi no kongera ibikorwa remezo byo kwambukiranya imipaka hagamijwe koroshya ubucuruzi mu karere.

Hazibandwa kandi ku kongera umusaruro w’ubuhinzi, iterambere ry’inganda binyuze mu gushora imari mu gukora imyenda no gutunganya impu, kongera ubumenyi, iterambere ry’ikoranabuhanga no guhanga udushya.

Hari kandi gukomeza umushinga wo gushyiraho ifaranga rihuriweho, kubungabunga amahoro, umutekano, imiyoborere myiza n’ibindi.

Dr Kivenjija yasobanuye ko mu ngengo y’imari ya 2018/2019, Ubunyamabanga bwa EAC buzahabwa arenga miliyoni 46 $; EALA ihabwe arenga miliyoni 17 $; Urukiko rwa EAC ruhabwe arenga miliyoni 3$.

Inama ya za Kaminuza za EAC izahabwa arenga miliyoni 6$; Komisiyo y’ikibaya cy’ikiyaga cya Victoria ihabwe arenga miliyoni 13$ naho umuryango ushinzwe uburobyi mu kiyaga cya Victoria uhabwe miliyoni 2 $.

Komisiyo ishinzwe ubumenyi n’ikoranabuhanga izakoresha arenga miliyoni 1$; Komisiyo ishinzwe ururimi rw’Igiswahili ikoreshe arenga miliyoni 1 $; Komisiyo ishinzwe ubushakashatsi mu by’ubuzima yagenewe arenga miliyoni 4$ naho Ikigo gishinzwe amarushanwa kigenerwa arenga miliyoni 1$.

Muri iyi ngengo y’imari, ibihugu binyamuryango bizatanga imisanzu binyuze muri Minisiteri zishinzwe ibikorwa bya EAC, ingana na 50,227,920 z’amadolari; Minisiteri z’uburezi zitange miliyoni 4,466,210 $ naho Minisiteri zifite uburobyi mu nshingano zitange miliyoni 1,551,032 $.

Abafatanyabikorwa mu iterambere bazatanga miliyoni 42,925,613 $ mu gihe kaminuza zihurira muri uyu muryango zizatanga 333,970 $, ahandi hatandukanye hagaturuka 265,971 $.

Dr. Kivenjija yavuze kandi ko akarere gakomeje gutera imbere mu bukungu no mu bindi, aho ubukungu bwiyongereye ku kigero cya 4.6 % mu 2017 bivuye kuri 4.4 % mu 2016. Bikaba byaratewe n’uko muri Kenya, u Rwanda na Uganda ubukungu bwateye imbere ku kigero kirenze 5 %.

Ingengo y’imari ya EAC mu 2018/2019 yagabanutseho miliyoni zirenga 10 $

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza