Ibikubiye muri gahunda yo kugabanyiriza inganda imisoro hagamijwe kuzahura ubukungu

Yanditswe na Muhonzire Sylvine
Kuya 25 Werurwe 2021 saa 07:15
Yasuwe :
0 0

Guverinoma y’u Rwanda yashyizeho gahunda nshya yo kunganira inganda zo mu gihugu kongera umusaruro, mu rwego rwo kuzahura ubukungu bwashegeshwe n’icyorezo cya Coronavirus, aho zizakurirwaho imwe mu misoro zitanga, indi zikayigabanyirizwa.

Iyi gahunda byitezwe ko izafasha inganda kongera umusaruro ndetse inorohereze izigitangira kudahungabana mu mikorere, nka bimwe mu bizatuma ubukungu bw’u Rwanda buzamuka nyuma yo gukomwa mu nkokora na Covid-19.

Inganda zizibandwaho cyane ni izitunganya umusaruro ukomoka ku buhinzi (agro processing), izikora ibikoresho by’ubwubatsi n’izindi zongera agaciro ku bikoresho fatizo. Ni ukuvuga inganda zikora ibikoresho by’ibanze abantu bakenera mu buzima bwa buri munsi birimo inkweto, imyenda, ibikoresho byo mu rugo n’ibindi

Mu kuzahura ubukungu, u Rwanda rwashyizeho ingamba zitandukanye, zirimo gutegura ibihembwe by’ibihinga ku buryo abahinzi bahabwa amafumbire n’imbuto kugira ngo hazaboneke umusaruro mwiza.

Hashyizweho Ikigega Nzahurabukungu cya miliyoni 100$ kigamije gufasha imishinga mito n’iciriritse, ndetse n’iyi gahunda yo gufasha inganda kongera umusaruro.

Muri iyi gahunda y’inganda, zizakurirwaho umusoro nyongeragaciro (VAT exemption) ku bikoresho fatizo birimo imashini zikorerwa imbere mu gihugu ndetse no ku bikoresho by’ubwubatsi bidakorerwa mu bihugu bigize Umuryango wa Afurika y’Iburasirazuba (EAC).

Inganda zizafashwa muri iyi gahunda niziramuka zibashije kongera umusaruro w’ibicuruzwa byagurishijwe mu gihugu cyangwa ibyoherejwe hanze muri uyu mwaka wa 2021, zizagabanyirizwa umusoro ku nyungu.

Umubare w’abakozi zikoresha niwiyongera, umusoro watangwagwa ku mishahara yabo uzagabanuka.

Mu kiganiro RBA iherutse kugirana n’Umuyobozi Mukuru wungirije wa RDB, Niyonkuru Zephanie, yatangaje ko iyi gahunda izafasha mu kuzahura ubukungu no kongera umusaruro w’ibikorerwa imbere mu gihugu.

Ati “Iyi gahunda nshya ishingiye ahanini ku kuzahura ubukungu bwahungabanyijwe n’icyorezo cya Coronavirus izatuma inganda zibasha kongera umusaruro, kongera ababona akazi, ibikorerwa mu nganda byongererwe agaciro ndetse ibiva hanze bigabanyuke. Ku ikubitiro, abikorera bafite imishinga ifite agaciro ka miliyoni 200 z’amanyarwanda bamaze kunganirwa muri iyi gahunda.”

Umuyobozi w’Urugaga rw’Abikorera, PSF, Robert Bapfakurera, yashimye iyi gahunda avuga ko iziye igihe.

Ati “Iyi gahunda iziye igihe kuko icyorezo cya Coronavirus cyazahaje abikorera. Duhereye ku byiciro byashyizwe muri gahunda yo kunganira inganda bigaragara ko zifatiye runini abanyarwanda zikazanazahura abikorera, turashishikariza abanyamuryango bacu kwitabira.”

Kugeza ubu inganda zigera ku icyenda zimaze kwemerwa gufashwa aho hashyizweho itsinda rizajya ryakira ubusabe bw’izo nganda kandi byitezwe ko izujuje ibisabwa zose zizafashwa muri iyi gahunda.

RDB ni iyo ishinzwe guhuza ibikorwa byose bijyanye n’iyi gahunda, aho byitezwe ko izazamura ubukungu bwagabanutse kubera Covid-19 ndetse buzamuke ku kigero cya 5.7% nkuko Banki y’Isi iherutse kubitangaza.

Urwego rw’inganda ni rumwe mu nzego z’ubukungu z’u Rwanda zagezweho n’ingaruka za Coronavirus, aho mu 2020 umusaruro warwo wagabanutseho 4%. Kugabanuka k’umusaruro uva muri uru rwego kimwe n’izindi zirimo n’urwa serivisi byatumye umusaruro mbumbe w’igihugu ugabanuka.

Ikigo cy’Igihugu cy’Ibarurishamibare mu Rwanda, NISR, cyatangaje ko umusaruro mbumbe w’u Rwanda mu 2020, wagabanutseho 3,4% ugereranyije n’umwaka wari wabanje wa 2019, ushingiye ku gipimo fatizo cyari cyashyizweho mu 2017, cyifashishwa mu gupima umusaruro mbumbe w’igihugu.

Inganda zo mu Rwanda zigiye kugabanyirizwa umusoro mu rwego rwo kuzifasha kongera umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .