Impinduka ku byemererwaga abayobozi bajya mu mahanga kugeza no ku byicaro mu ndege

Yanditswe na Cyprien Niyomwungeri
Kuya 13 Werurwe 2017 saa 11:40
Yasuwe :
4 0

Ubutumwa bw’akazi mu mahanga ‘Misiyo’, bwakunze kutavugwaho rumwe yaba ku ngengo y’imari ikoreshwa n’umwanya ababugiyemo bamara badatanga umusanzu wabo mu kubaka igihugu, kugera n’aho Perezida Kagame ubwe agaragaje ko abirambiwe agasaba ko hagira igikorwa.

Ababishinzwe bagaragaza ko ingamba zafashwe kuri iki kibazo, mu ngengo y’imari ya 2016/2017 yatangiranye na Nyakanga umwaka ushize, igihugu kimaze kuzigama miliyoni 125 Frw, kandi nta kabuza azakomeza kwiyongera. Ubusanzwe ubutumwa bw’akazi bwagenerwaga ingengo y’imari ya miliyari zisaga 2 Frw ku mwaka.

Iteka rya Perezida n°44/01 ryo ku wa 24/02/2017 rigenga ubutumwa bw’akazi mu mahanga, rigaragaza zimwe mu ngamba zashyize ku murongo ibijyanye n’ubutumwa bw’akazi kugeza mu rwego rwo kwizigamira akayabo kabugenderagamo.

Bimwe mu byagenerwaga abayobozi cyangwa abandi bagiye mu butumwa byaragabanyijwe, ndetse biba ihame ko igihe kwitabira inama mpuzamahanga hanze y’u Rwanda ari ngombwa, inzego za Leta zihagararirwa n’abakozi ba ambasade cyangwa ab’ibiro by’uhagarariye u Rwanda mu bihugu byo hanze aho rubifite, keretse mu gihe bidashoboka.

Ugiye mu butumwa bw’akazi mu mahanga, agenerwa ku munsi amafaranga y’icumbi, ay’amafunguro, urugendo, itumanaho n’andi yakenerwa mu rwego rw’ubutumwa, hagendewe ku kuntu ubuzima buhenda mu gihugu cyangwa umujyi ubutumwa bukorerwamo.

Iyo ubutumwa bw’akazi mu mahanga bwishingiwe n’abandi batari Leta y’u Rwanda ku bijyanye n’icumbi, amafunguro, urugendo n’itumanaho, ugiye mu butumwa ahabwa na Leta amafaranga y’ingoboka angana n’amadolari y’amanyamerika 50$ ku munsi adasabwa kugaragaza uko yayakoresheje.

Impinduka mu bigenerwa abayobozi bagiye mu butumwa

Perezida wa Repubulika agiye mu butumwa bw’akazi mu mahanga, Leta yishingira ibyerekeye ubutumwa bwe byose, byerekeranye n’icumbi, amafunguro, urugendo, kwakira abashyitsi, itumanaho n’ibindi byose bimworohereza kurangiza ubutumwa bwe neza.

Abayobozi bo mu rwego rwa politiki n’abayobozi bari ku nzego z’imirimo za B na C ni ukuvuga Abaperezi b’Inteko Ishinga Amategeko imitwe yombi, Perezida w’Urukiko rw’Ikirenga na Minisitiri w’Intebe, bagiye mu butumwa bw’akazi mu mahanga bagenerwa 100% by’amafaranga y’ubutumwa bw’akazi, bakongererwaho 50% byayo.

Iyi ngingo yarahinduwe kuko yagenaga ko n’abari mu cyiciro cya D, kirimo ba Minisitiri, Abanyamabanga ba Leta, abandi bagize Guverinoma, Umuyobozi w’Umujyi wa Kigali na ba Guverineri. Aba bo bagenerwa 100% by’amafaranga y’ubutumwa bw’akazi bakongererwaho 30% byayo, avuye kuri 50%.

Abayobozi bo mu rwego rwa politiki n’abayobozi bari ku rwego rw’umurimo rwa E, ni ukuvuga ba Visi Meya b’umujyi wa Kigali, bazajya bagenerwa 100% by’amafaranga y’ubutumwa bw’akazi, bakongererwaho 15 % byayo. Aha yariyongereye kuko mbere yari 10%.

Kugabanya amafaranga agenda ku bayobozi bajya mu butumwa bw'akazi hanze y'igihugu, ni kimwe mu byaganiriweho mu mwiherero wa 13 w'abayobozi bakuru b'igihugu

Abayobozi bo mu rwego rwa politiki n’abakozi bari ku nzego z’imirimo za F na G/1 ni ukuvuga abagize Inteko Ishinga Amategeko (ukuyemo ba Perezida b’imitwe yombi), ba Ambasaderi n’abayobozi b’uturere, bagenerwa 100% by’amafaranga y’ubutumwa bw’akazi bakongererwaho 10% byayo. Ubusanzwe nta nyongera bahabwaga.

Aba ‘professionnels’ n’abandi bakozi ba Leta basigaye bagenerwa 100% by’amafaranga y’ubutumwa bw’akazi. Ubusanzwe bagenerwaga 80% byayo.

Iri teka riteganya ko abayobozi bo mu rwego rwa politiki n’abayoboye abandi mu butumwa bw’akazi ka Leta mu mahanga, bari ku nzego z’imirimo za B na C, bahabwa amadolari igihumbi y’amanyamerika (1.000 US$) ku munsi yakoreshwa ku bintu bitunguranye.

Ubusanzwe n’abo ku rwego rwa D bahabwaga amadolari 1000, abo kuri E bagahabwa amadolari 100, naho abandi bayoboye itsinda bagahabwa amadolari 15. Ibi byose byakuweho.

Ibyicaro mu ndege byarahinduwe

Iteka rishya riteganya ko abayobozi bo mu rwego rwa politiki n‘abayobozi bari mu nzego z’imirimo za B na C bagendera mu cyicaro cyo mu rwego rwa mbere mu ndege iyo bagiye mu butumwa bw’akazi mu mahanga.

Muri ibi byicaro hakuwemo abo mu cyiciro cya D kuko kimwe n’abo muri E bazajya bagendera mu cyicaro cyo mu rwego rwa kabiri mu ndege.

Abandi bayobozi bo mu rwego rwa politiki n’abakozi ba Leta basigaye bazajya bagendera mu cyicaro cyo mu rwego rwa gatatu mu ndege. Icyakora, abo muri F [abagize Inteko Ishinga Amategeko (ukuyemo ba Perezida b’imitwe yombi), ba Ambasaderi n’abayobozi b’uturere], bemerewe kugendera mu cyicaro cyo mu rwego rwa kabiri mu ndege iyo bafashe urugendo rumara amasaha umunani cyangwa arenzeho idahagaze.

Inkuru bifitanye isano: Nabihanganiye bihagije -Perezida Kagame abwira abayobozi bahora muri za misiyo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza