00:00:00 IGIHE NETWORK KN KINYARWANDA EN ENGLISH FR FRANCAIS

Imiterere y’ingengo y’imari ya 2021/22: Uko izakoreshwa, imishinga migari n’ibindi

Yanditswe na Philbert Girinema
Kuya 14 Gicurasi 2021 saa 07:19
Yasuwe :
0 0

Ingengo y’imari u Rwanda ruzakoresha mu mwaka utaha wa 2021/2022 ni Miliyari 3.807 Frw, iziyongera ku kigero cya 9,8% ugereranyije n’iyari yakoreshejwe mu mwaka uri kurangira kuko yo yari Miliyari 3.464,8 Frw bisobanuye ko iziyongeraho Miliyari 342,2 Frw.

Muri aya mafaranga, 67% angana na Miliyari 2.543,3 Frw akomoka mu mutungo w’imbere mu gihugu, ni ukuvuga mu misoro ahanini. Inkunga z’amahanga ni Miliyari 612,2 Frw bingana na 16% by’ingengo y’imari yose; naho inguzanyo z’amahanga ni Miliyari 651,5 Frw bingana na 17%.

Uko azakoreshwa

Miliyari 1.872,7 Frw bingana na 49,2 % azakoreshwa mu ngengo y’imari isanzwe, ni ukuvuga mu bikorwa birimo nko kwishyura imishahara, kugura ibikoresho nkenerwa n’ibindi.

Azakoreshwa mu mishinga y’iterambere no mu ishoramari rya Leta azagera kuri Miliyari 1.934,2 Frw bingana na 50,8 % by’ingengo y’imari yose. Aha niho hari amafaranga yo gushyigikira ibikorwa by’abikorera mu guhangana n’ingaruka z’icyorezo cya COVID-19.

Ibikorwa remezo by’amashanyarazi biteganyijwe

Mu mwaka utaha w’ingengo y’imari, bimwe mu bikorwa remezo biteganyijwe harimo ibijyanye no kubaka urugomero rw’amashanyarazi rwa Nyabarongo ya kabiri.

Uyu mushinga ni umwe mu minini igihugu kirimo gushyiramo ingufu izagifasha kugera ku ntego yo kugeza umuriro ku baturage bose bitarenze umwaka wa 2024.

Ubu imibare igaragaza ko ingo zifite amashanyarazi mu Rwanda zisaga 60,9%, harimo izigera kuri 15,9% zifite amashanyarazi adafatiye ku muyoboro mugari, yiganjemo akomoka ku mirasire y’izuba.

Urugomero rwa Nyabarongo II rwitezweho gutanga Megawatt 43,5, ruzuzura rutwaye Miliyoni 214 $. Ruzaba rukurikira urwa Nyabarongo I ruherereye mu Karere ka Muhanga mu Ntara y’Amajyepfo, rutanga Megawatt 28.

U Bushinwa buherutse gutangaza ko buzafatanya n’u Rwanda muri uyu mushinga.

Undi mushinga utegerejwe mu mwaka utaha w’ingengo y’imari ni uwo kubaka imiyoboro itandukanye y’amashanyarazi harimo Mukungwa-Nyabihu, Bwishyura-Kigoma-Rwabusoro, Rusumo-Bugesera-Shango n’uhuriweho n’u Rwanda n’u Burundi.

Mu 2017, ingo zari zifite amashanyarazi zari 34,4% ndetse uyu mwaka gahunda ni uko uzarangira zingana na 71%.

Ikibuga cy’Indege Mpuzamahanga cya Bugesera cyahawe umwihariko

Ikibuga cy’Indege Mpuzamahanga cya Bugesera, ni umushinga ukomeye uhanzwe amaso n’u Rwanda, uzarufasha kuba igicumbi cy’ingendo zo mu kirere bishingiye ku masezerano ruherutse kugirana na Qatar.

Kizuzura gitwaye miliyari 1,3$, Qatar ifitemo imigabane ingana na 60%. Mu 2017 nibwo aho kiri kubakwa hashyizwe ibuye ry’ifatizo byitezwe ko nibura igice cyacyo cya mbere cyuzura muri Kamena 2020 ariko byaje guhinduka ubwo Qatar yinjiragamo.

Mu 2018 byatangajwe ko Igishushanyo Mbonera cyacyo kiri kuvugururwa kugira ngo kijyanye n’igihe. Amakuru IGIHE ifite ni uko u Rwanda rutegereje ko Qatar nk’umufatanyabikorwa yemeza icyavuguruwe, ubundi imirimo ikihutishwa kurushaho.

Gusa ariko imirimo iracyakomeje, yigeze guhagarara gato kubera Covid-19 ariko ubu yarasubukuwe. Amakuru IGIHE ifite ni uko imirimo yo kucyubaka igeze kuri 34,5%.

Mu ngengo y’imari y’umwaka utaha, harimo ko mu mishinga izitabwaho nacyo kirimo. Ku rundi ruhande, biteganyijwe ko hazubakwa umuhanda wihutisha ingendo hagati y’Umujyi wa Kigali n’Ikibuga Mpuzamahanga cy’Indege cya Bugesera.

Hazubakwa ndetse hanasanzwe imihanda minini ya kaburimbo yo ku rwego rw’igihugu cyo kimwe n’iy’imigenderano.

Mu 2017, imiganda ya kaburimbo yanganaga na 1.305 km, umwaka wa 2018 urangira ingana na 1.379 km. Kugeza muri Werurwe uyu mwaka, yanganaga na 1.518 km gusa intego n’uko uyu mwaka uzarangira ingana na 1.531 km.

Gahunda ni uko umwaka wa 2024 uzarangira imihanda ya kaburimbo ingana na 1.745km. Ni mu gihe nk’amatara yo ku mihanda yo azaba ari ku ntera ya 1.810km avuye ku ya 1.445km yariho mu 2020 na 663km yariho mu 2017.

Hazubakwa ikigo cy’ubushakashatsi kuri Cancer

Gukomeza kubaka ibikorwaremezo mu rwego rw’ubuzima mu gihugu hose harimo ibitaro, ibigo nderabuzima n’ibigo by’ubuvuzi bw’ibanze; ni kimwe mu byo Guverinoma iteganya gukora mu mwaka utaha.

Ibi bizajyana kandi no kubaka Ikigo cy’Ubushakashatsi n’Amahugurwa ku ndwara ya Cancer ifata urwungano ngogozi (IRCAD).

IRCAD ni Ikigo cy’Abafaransa kizobereye mu kubaga no kuvura Cancer hifashishijwe ikoranabuhanga, aho kiri mu bya mbere ku Isi mu kugira ubuhanga bwo kuvura iyi ndwara.

Icyicaro Gikuru cy’icyo kigo kizaba kiri i Masaka mu Mujyi wa Kigali, cyitezweho gufasha mu guhangana n’iyi ndwara binyuze mu bushakashatsi n’amahugurwa ari ku rwego rwo hejuru azatangira gutangirwa mu Rwanda.

Muri iyi ngengo y’imari harimo kandi ko kubaka ikigo gitanga ubufasha ku buzima bw’indwara zo mu mutwe bizakomeza; bikajyana no kongera ikoranabuhanga mu buvuzi cyane cyane ahavurirwa indembe hongerwa ubushobozi ahakorerwa umwuka uhabwa indembe.

Igishushanyo mbonera cy'iki kigo ni uku kimeze

Imiyoboro ya internet izagurwa

Mu rwego rw’ikoranabuhanga, biteganyijwe ko hazagurwa ndetse hakanakwirakwizwa imiyoboro ya internet mu gihugu hose no gutanga ibikoresho bigezweho by’ikoranabuhanga.

Bibarwa ko ibice bigerwamo na internet mu gihugu bingana na 95%, mu gihe abayikoresha bageze kuri 51,6% bavuye kuri 45,5% bariho mu 2017.

Ibikorwa by’ubuhinzi ntibyibagiranye

Mu mishinga iteganyijwe harimo ujyanye no gukoresha inyongeramusaruro z’ubuhinzi nk’ifumbire mvaruganda no gutubura imbuto zindobanure.

Imibare igaragaza ko mu 2017, ifumbire mvaruganda yakoreshwaga ku buso bungana na 44.957 ha, mu 2020 bugera kuri 65.004 ha. Ni mu gihe mu 2017 abahinzi bakoreshaga imbuto z’indobanure banganaga na 52%, mu 2020 bakiyongera bakagera kuri 87%.

Ikindi giteganyijwe mu rwego rw’ubuhinzi ni uguteza imbere ibikorwa byo kuhira mu bishanga no ku misozi, hamwe n’ibikorwa byo kuhira imyaka ku buso buto kugira ngo ibihingwa birusheho guhangana n’ibihe by’izuba.

Mu 2017, ubuso bwuhirwa bwari 48.508 ha, mu 2020 buba 63.742 ha, mu gihe intumbero ari uko bugera kuri hegitari zirenga ibihumbi 77.

Biteganyijwe kandi ko hazanozwa kandi hakoroshywa uburyo bwo kubona imari n’ubwishingizi mu rwego rw’ubuhinzi. Ubwishingizi bumaze gutangwa mu rwego rw’ubuhinzi bungana na miliyari 1.024 Frw.

Urwego rw’Ubucukuzi ruhanzwe amaso

Urwego rw’ubucukuzi bw’amabuye y’agaciro ni rumwe mu zizitabwaho mu ngengo y’imari itaha dore ko ari rumwe mu zinjiriza igihugu amafaranga menshi nyuma y’ubukerarugendo.

Mu 2017, rwinjije miliyoni 373$, bigera mu 2019 ari miliyoni 377$, hanyuma mu 2020 biba miliyoni 730$. Uyu mwaka hitezwe miliyoni 800$.

Mu 2021, ubukungu bw’u Rwanda buteganyijwe kuzamuka ku gipimo cya 5,1% ugereranyije na 3,3% munsi ya zero bwariho mu 2020; mu 2022 byitezwe ko buzagera ku gipimo cya 7% mu 2022, no kuri 7,8% mu 2023 na 2024.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .