Imikorere y’imashini zishyira n’izikura amafaranga ku makarita y’urugendo azwi nka ‘Tap&Go’

Yanditswe na Evariste Nsengimana
Kuya 10 Kanama 2019 saa 08:09
Yasuwe :
0 0

Mu 2015 nibwo uburyo bwo kwifashisha amakarita azwi nka ‘Tap&Go’ mu kwishyura amafaranga y’urugendo bwatangijwe mu modoka zitwara abagenzi mu buryo bwa rusange mu Mujyi wa Kigali, mu kwimakaza gahunda yo kugabanya amafaranga ahererekanywa mu ntoki.

Ni ikoranabuhanga ryatangijwe n’ikigo AC Group Ltd, rinagamije no kugabanya umwanya n’amakimbirane hagati y’umugenzi n’umushoferi byagaragara mu gihe yinjiye mu modoka adafite amafaranga, afite atavunje cyangwa ashaka gukatuza bitewe n’urugendo yakoze.

Uko iminsi igenda yisunika niko iri koranabuhanga ryongererwa ubushobozi. Izi karita zifashishwaga mu gutega imodoka zigakoreshwa mu kwishyura izindi serivisi zitandukanye.

Urugero iyi karita ya ‘Tap&Go’ mu Rwanda yifashishwa mu kwishyura itike yemerera umuntu kwinjira mu imurikagurisha, mu gihe byari bimenyerewe mbere ko agura itike y’agapapuro akaba ariyo yerekana.

Ntabwo iyi nkuru igiye kwibanda kuri ‘Tap&Go’ gusa ahubwo iragaruka ku buryo iyi karita ijyaho ikanavanwaho amafaranga.

Mu kiganiro yahaye IGIHE, Umuyobozi ushinzwe ikoranabuhanga muri AC Group, Niyomukiza Samuel, yavuze ko imashini zishyira n’izikura amafaranga kuri Tap&Go zirimo ubwoko bubiri butandukanye.

Imashini ishyiraho amafaranga yavuze ko ari kimwe n’izisanzwe zifashishwa mu kwishyura ibicuruzwa na serivisi mu maguriro n’ahandi, zikoreshwaho amakarita ya banki zizwi nka POS (point of sale cyangwa point of purchase).

Izi mashini ukunze gusanga zifitwe n’abakozi ba AC Group ku byapa abagenzi bategeraho imodoka, ufite ikarita ya Tap&Go itariho amafaranga cyangwa ushaka kuyongera, akayamuha akayashyiraho nk’uko umuntu agurira cyangwa abitsa amafaranga yo guhamagara kuri SimCard ya Telefone.

Yakomeje agira ati “Icyo POS ikora, yandika amakuru [umubare w’amafaranga ushaka n’umwirondoro uranga ikarita] ikayandika ku ikarita ikayahuza n’amakuru dufite muri sisiteme. Iyo umugenzi ahaye amafaranga umukozi uduhagarariye [Agents], ni kimwe nk’uko ugura Me2U (mituyu), ukamuha amafaranga akagushyiriraho agaciro kayo.”

Kugeza ubu AC Group igaragaza ko imaze gutanga POS zigera ku 116 n’amakarita ya Tap&Go asaga miliyoni 1.5.

AC Group Ltd ku bufatanye na MTN Rwanda baheruka gutangiza uburyo bwo gushyira amafaranga ku ikarita ya Tap & Go hifashishijwe MTN Mobile Money, hifashishijwe code ya *182*2*5# ubundi ugakurikiza amabwiriza. Kuva aho ubu buryo butangirijwe muri Werurwe uyu mwaka, bumaze kwifashishwa ku makarita 126 035.

Niyomukiza yasobanuye ko imashini ya POS itandukanye n’iyo dusanga ku modoka umuntu akozaho ikarita ya Tap&Go, igasoma amakuru aba ariho izi nka BV [Base Validator].

Izi mashini zishyirwamo urutonde rw’ibyerekezo imodoka ziganamo n’igiciro cyazo cyashyizweho n’Urwego Ngenzuramikorere (RURA).

Iyo umushoferi agiye guhaguruka, ayikozaho indi yabugenewe umuntu yakwita nk’urufunguzo ruhitamo icyerekezo agiye kuganamo ariko ibyo akora biba bigenzurwa n’ababishinzwe bari ku cyicaro cya AC Group.

Ati “Niba imashini isoma[BV] bayibwiye bati ‘Dushaka ko ukuraho amafaranga y’uru rugendo’, iyo ushyizeho ikarita [Tap&Go] irayisoma ikurikije ibyo yasabwe gukora ikaba aribyo ikora, niba ari urugendo rwa 250Frw ufiteho 500Frw, ikuraho 250Frw ikanakwereka ayo usigaranye 250Frw.”

Iyi mashini kandi buri gihe ihora igaragaza igiciro cy’icyerekezo bisi igiye kuganamo ku buryo umuntu ugiye gukozaho aba azi amafaranga aciwe y’urwo rugendo. Iyo umuntu akojejeho Tap&Go nta mafaranga yashyizemo nabwo ikabimumenyesha.

Iyi mashini ikura amafaranga kuri Tap&Go ajyanye n’igiciro cyashyiriweho urwo rugendo.

Gusa nk’icyerekezo kirekire, hari ubwo umushoferi ashobora guhindura icyerekezo igihe ageze aho ikindi gitangirira. Urugero nk’imodoka ivuye i Kanombe yerekeza mu mujyi, igeze i Remera, ashobora guhuza n’icya Remera mu Mujyi.

Ayo makuru hamwe n’andi arimo umubare w’abantu imodoka yatwaye, aho igeze n’ibindi, umukozi wa AC Group aba abikurikirana umunota ku wundi hifashishijwe ikoranabuhanga.

AC Group igaragaza ko mu makarita asaga miliyoni 1.5 yaguzwe, akoreshwa ingendo zisaga ibihumbi 250 ku munsi.

Imashini abagenzi bakozaho ikarita izwi nka BV
Imashini zishyira amafaranga ku ikarita zizwi nka POS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza