Kwamamaza

Ikigo cy’Abongereza kigiye gufasha mu kuzamura Isoko ry’Imari n’Imigabane ry’u Rwanda

Yanditswe kuya 1-09-2016 saa 21:51' na Rabbi Malo Umucunguzi


Ikigo cyo mu Bwongereza gitanga ubumenyi mu by’imari, Chartered Institute for Securities & Investment, CISI, cyashyize umukono ku masezerano y’ubufatanye n’Ikigo cy’Imari n’Imigabane cy’u Rwanda, Capital Market Authority, CMA, aho kigiye gufasha mu kuzamura ubumenyi kuri iri shoramari.

Iki kigo buri mwaka gitanga amasomo agera ku 40,000 mu bihugu bisaga 70, gifite uburambe busaga imyaka 20 muri aka kazi, kikaba gihanzwe amaso n’Abanyarwanda bifashisha isoko ry’imari n’imigabane.

Minisitiri w’Imari n’Igenamigambi, Ambasaderi Gatete Claver, yavuze ko u Rwanda rwatangiye urugendo rw’iterambere nk’ikindi gihugu cyose gikennye, rufite banki z’ubucuruzi zikoreshwa n’abanyamishahara nk’uburyo rukumbi bwa serivisi z’imari.

Ati “Uko twateraga izo ntambwe twaravuze ngo ntabwo twatera imbere tudafite isoko ry’imari n’imigabane. Kubw’ibyo, mu 2008 twagombaga gushyiraho isoko ry’imari n’imigabane, ndetse haracyari gahunda yo kubaka uburyo bw’imari kandi bugera kuri buri wese.’’

Minisitiri Gatete yavuze ko nyuma u Rwanda rwiyemeje gahunda y’imyaka 10 y’isoko ry’imari n’imigabane, runiyemeza guhuza inzego z’imari zirimo Isoko ry’imari n’imigabane, amabanki, ubwishingizi, ubwiteganyirize, n’izindi nzego z’imari zose.

Ati “Urwego rugisigara inyuma ni urw’isoko ry’imari n’imigabane kuko ni rushya, twashyizeho amabwiriza, amategeko, ubu turashaka kumenya ko dufite abafatanyabikorwa, abajyanama, abafasha ku isoko ry’imari n’abandi bakora kuri iryo soko, ariko bakeneye amahugurwa.’’

Yavuze ko hari gukorwa ibiganiro ngo harebwe ko hashyirwaho Isoko ry’imari n’imigabane rihuriweho na Kenya, Uganda, Tanzania n’u Rwanda, ku buryo umuntu azajya abasha gucuruza ari mu gihugu kimwe, ubu bikaba bigeze ku rwego rwo guhuza amategeko n’amabwiriza, byose bikeneye ubumenyi bwihariye.

Ati “Imbogamizi ikomeye yaba ku bijyanye n’amahugurwa, uburyo wigisha abantu, yaba abashora imari yabo cyangwa abafasha abandi kuri iryo soko. Nkumva ko CISI igiye kuziba icyo cyuho, ari nayo mpamvu muhawe ikaze kuko muje mu gihe nyacyo mu rugendo rwacu rw’iterambere, kuko dukeneye abantu bafite ubumenyi buhagije,’’

Umuyobozi uhagarariye CISI mu burasirazuba bwo hagati Helena Green, yavuze ko aho bagiye batanga ubumenyi hose hagiye hagaragara impinduka, ndetse akaba aribyo u Rwanda rwakwitega.

Ati “Ni ingenzi cyane kubona ubu bushobozi bw’abanyamwuga hano mu Rwanda, ku bufatanye n’Ikigo cy’Imari n’Imigabane, bizafasha mu guteza imbere uru rwego no gukora ibijyanye n’ibyo abakiliya bashaka muri iri shoramari.’’

Umuyobozi wungirije w’inama y’Ubutegetsi ya CMA, Eric Rwigamba, yavuze ko aya masezerano y’ubufatanye y’imyaka itatu azafasha agamije kureba uburyo icyo kigo cyigisha abantu bakorera ku isoko ry’imari n’imigabane barushaho kugira ubushobozi.

Ati “Iyo tudakorana nabo, byakabaye bisaba ko u Rwanda rutegura ayo masomo no kubaka ubushobozi bw’abantu bazayigisha. Ariko iyo dukoranye n’aba bantu barangije kubitegura, bamaze imyaka myinshi bigisha abantu gucuruza ku isoko ry’imari n’imigabane, birushaho kwihuta kugira ngo tugere ku ntego zacu zo kubaka Isoko ry’Imari n’Imigabane mu Rwanda.’’

Ubusanzwe CMA yifashishaga abantu bafite ubushobozi bakuye mu mahanga, ariko ubu ngo igiye kunguka abantu benshi bigishijwe n’ikigo gifite ububasha n’ubushobozi.

Aya masezerano aremerera Abanyarwanda kwiga aya masomo ajyanye n’iby’isoko ry’Imari n’Imigabane, hakazakurikiraho gushaka ishuri rizifashishwa n’abantu babishaka, kuko CISI izatanga integanyanyigisho mbere na mbere.

Bahererekanya amasezerano nyuma yo kuyashyiraho umukono
Eric Rwigamba, Umuyobozi wungirije w'Inama y'ubutegetsi ya CMA
Helena Green na Eric Rwigamba bashyira umukono ku masezerano
Helena Green wari uhagarariye CISI
Umuyobozi Mukuru w'Isoko ry'Imari n'Imigabane (RSE), Celestin Rwabukumba

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved