00:00:00 IGIHE NETWORK KN KINYARWANDA EN ENGLISH FR FRANCAIS

Ikiganiro cyimbitse n’Umuyobozi wa RSSB: ishoramari mu mahanga, ikibuga cya Golf, imishinga mishya…

Yanditswe na IGIHE
Kuya 9 Kanama 2021 saa 06:34
Yasuwe :
0 0

Urwego rw’Ubwiteganyirize mu Rwanda, RSSB, uwavuga ko ari urutirigongo rw’ubukungu n’imibereho y’igihugu, niba atari n’umutima ugendeye ku nshingano n’ishoramari rufite, ntiyaba agiye kure y’ukuri.

Niba warabashije gutembera mu mijyi nka Kigali, Musanze, Rubavu, Nyagatare n’ahandi, biragoye ko mu miturirwa nk’itanu myiza wahasanga haburamo umwe muri yo wubatswe na RSSB, cyangwa ugasanga ifitemo akaboko.

RSSB yagize uruhare mu mishinga minini yo kubaka amacumbi mu gihugu, yaba ayo guturamo ndetse n’ayo gukoreramo ibikorwa bitandukanye, yashoye imari muri za banki n’ibindi bigo byunguka yaba mu Rwanda ndetse no hanze.

Gukomera kw’icyo kigo ntibiri mu magambo gusa kuko no mu mibare bitoroshye kujya mu mitsi na cyo. Ubu ishoramari rya RSSB haba imbere mu gihugu no mu mahanga, ribarirwa muri miliyari zisaga 1300 Frw, ni ukuvuga kimwe cya gatatu cy’ingengo y’imari u Rwanda rukoresha mu mwaka wose. Ngira ngo ni na yo mpamvu Obadiah Biraro, Umugenzuzi Mukuru w’Imari n’urwego ayoboye bagihozaho ijisho nta guhumbya.

Icyakora, iki kigo cyakunze kuvugwamo ibibazo bya hato na hato ahanini bishingiye kuri ya mishinga y’amafaranga menshi gishinzwe, hakaba aho kinenzwe kuyashora mu mishinga itunguka vuba nk’iyo kubaka amacumbi aciriritse nyamara atajyanye n’ubushobozi bw’abanyamuryango bayo, gukoresha nabi umutungo wa Leta n’ibindi.

Ibiheruka ni iyubakwa ry’umushinga w’ikibuga cya Golf i Nyarutarama uherutse kugarukwaho cyane mu itangazamakuru, ikigo RSSB cyawushoyemo imari gitungwa agatoki ku micungire yawo, hamwe byaketswe ko haba hari ibidasobanutse muri wo.

IGIHE yaganiriye n’Umuyobozi Mukuru wa RSSB, Regis Rugemanshuro asobanura byimbitse ndetse nta guca ku ruhunde iby’ibi bibazo byose, ishoramari ry’ikigo amaze umwaka n’igice ayoboye n’imishinga mishya yitezweho kungukira abanyamuryango b’iki kigo akayabo mu bihe biri imbere.

IGIHE: RSSB ni urwego rushamikiye kuri Leta ariko rwemerewe gukora ishoramari. Mu minsi ishize rwemerewe kwigenga (autonomy), ruva ku kwitwa “Ikigo” ruba “Urwego”.

- Izo mpinduka ni iki zizafasha mu iterambere ry’uru rwego muri rusange?

Rugemanshuro: Nibyo koko muri Gashyantare 2021, RSSB yahawe ubwigenge (autonomy) mu mikorere no gufata ibyemezo ariko igumana MINECOFIN nka Minisiteri iyireberera (Line ministry). Ibi bijyane n’ingamba nshya za RSSB za 2020 – 2025 zo guhindura RSSB ikigo gishyira umunyamuryango ku isonga, kigendera ku mibare yizewe, kandi cyesa imihigo mu rwego rwo hejuru.

Bikaba kandi bijyana n’izindi mpinduka ziri gukorwa muri RSSB ku bijyane n’ikoranabuhanga (IT Modernization), ivugurura ry’ imbonerahamwe y’imirimo. Ibi byose bikazafasha RSSB kubasha kuzuza inshingano zayo neza kandi vuba mu bijyane na serivisi z’ibigenerwa abanyamuryango no mu bikorwa by’ishoramari hakoreshejwe neza agaciro k’igihe, n’agaciro k’ibikoreshwa (value for money). Guhindurwa urwego rwigenga kandi byabaye hashize amezi make RSSB ihawe Inama y’Ubutegetsi nshya igizwe n’impuguke zitandukanye mu bijyanye n’inshingano zayo.

IGIHE: Ni izihe nzitizi mwahuraga na zo ziturutse ku kuba RSSB itari urwego rwigenga?

Rugemanshuro: Imbogamizi z’ingenzi RSSB yahuraga na zo mbere yo kuba u Rwego rwigenga harimo igihe kirekire byatwaraga kugira ngo RSSB ibashe guha akazi abakozi bashya ndetse n’ingorane zo gusezerera abadashoboye cyangwa bakoze amakosa bitewe n’uburyo bwariho butari bujyanye n’inshingano zikomeye z’ikigo ndetse n’ubwihute mu mikorere biba bikenewe kugira ngo akazi kadapfa.

Nko gushaka umukozi mushya byatwaraga igihe gishobora kugera ku mezi atandatu bitewe n’inzira ndende zasabwaga. Ikigo kigahomba agaciro k’igihe n’umusaruro kimara kidafite uwo mukozi cyangwa se uwishe akazi akikarimo.

Hari kandi igihe kirekire byatwaraga mu gufata ibyemezo bitewe n’imiterere ya gahunda y’imiyoborere. Aha ingaruka zikaba nyinshi kuko bituma ibigenerwa abanyamuryango batabibonera igihe kandi byashobokaga, ndetse na bimwe mu bikorwa by’ishoramari bikadindira cyangwa ntibikorwe. Hari nk’igihe habaga hari abashoramari dufatanyije, bashoboraga kurambirwa bakajyana ishoramari ryabo ahandi ndetse bakaba banadutera icyizere mu mikoranire, igihugu n’abanyamuryango bakabihomberamo.

Mu nyigo yakozwe n’impuguke za Price Waterhouse Cooper (PWC) bijyanye n’umushinga uri gukorwa kugira ngo hahindurwe imbonerahamwe y’imirimo, zerekanye ko imbonerahamwe y’imikorere yari iriho itajyanye n’igihe ndetse n’inshingano za RSSB, ubu ikaba irimo guhindurwa. Ikindi iyo nyingo yagaragaje ko 90% by’abakozi ba RSSB bahembwa make cyane (25th Percentile) ugereranyije n’imishahara y’ibigo by’ubwishingizi cyangwa se by’ishoramari mu Rwanda. Ibi bituma RSSB itabasha kuba yaha akazi abakozi b’inzobere bakora muri ibyo bigo. N’abamaze kumenyera muri RSSB bahawe amahugurwa ugasanga ibyo bigo birabatwaye.

Izi mbogamizi z’ingenzi zavuzwe ndetse n’izindi nto zitavuzwe zagiraga ingaruka zikomeye mu bice byose by’imikorere ya RSSB. Iyo ugomba gufata icyemezo cyangwa ukeneye umukozi, cyangwa igikoresho mu kazi, ukaba utarabigeraho, uba watangiye kwishyura ikiguzi mu ngaruka zo kutabigeraho vuba mu gihe wari ubikeneye. Hari byinshi byapfaga mu kazi kubera iyo mpamvu. Kuba biri gukemurwa bitanga icyizere ko intego zavuzwe haruguru zikubiye mu ngamba za RSSB 2020-2025 zazigerwaho.

IGIHE: Hashize iminsi havugwa ishoramari rya RSSB mu mushinga wo kubaka Ikibuga cya Golf i Nyarutarama:

- Kugira ngo RSSB yinjire muri iri shoramari byaturutse he?

Rugemanshuro: Inyigo n’ubushakashatsi byerekana ko ku Isi isoko ry’ubukererarugendo bwa Golf buzagera kuri miliyali 44.6 z’amadolari muri 2021. Zinagaragaza ko bwagiye bukura ku kigero cya 11% buri mwaka guhera muri 2019. Byerekana kandi ko Afurika ifite ibibuga bya Golf bitagera ku 1,000, ntibigeze no kuri 2% y’ibibuga biri ku Isi. Muri ibyo bibuga 52% biri muri Afurika y’Epfo na byo kandi ibyinshi kuri uyu mugabane bikaba biciriritse bigizwe n’imyobo icyenda.

Ubushakashatsi kandi bwerekana ko mu Burayi n’u Bwongereza hari abakinnyi ba Golf bagera kuri miliyoni 9.2. baza ku mwanya wa kabiri nyuma ya Amerika. Abadage ni bo bishyura menshi, aho bashobora kugeza madolari 950 ku munsi mu bijyanye na Golf. Ntitwakwiyibagiza kandi ko muri 2050 Afurika izaba igize 50% z’abaturage b’Isi kandi uyu mukino ukaba ugenda utera imbere ku mugabane wa Afurika.

Uyu mushinga wa Golf mu Rwanda nurangira wose, uzaba ari umwe mu bibuga bya mbere muri Afurika. Ni umushinga w’ingirakamaro cyane ku gihugu ndetse no kuri RSSB. Uzateza imbere umukino wa golf ariko unateze imbere ubukungu bw’igihugu n’ ikigo binyuze mu musaruro uzava muri uyu mushinga utibagiwe n’ubukerarugendo mpuzamahanga bushingiye kuri golf nk’uko bigaragara mu bindi bihugu byateje imbere umukino wa golf. Ikindi ni uko uyu mushinga utagizwe n’ikibuga cya golf gusa; ahubwo harimo n’indi mikino nka tennis, piste nziza yo kwirukankaho (running trail), Pisine, ndetse n’ibindi byinshi bijyanye no kwidagadura bizakira abatuye Kigali, abaturarwanda muri rusange ndetse n’abanyamahanga basura u Rwanda. Ibi biri mu cyiciro cya mbere cy’uyu mushinga.

Mu cyiciro cya kabiri, duteganya kubaka amazu azungurutse ikibuga azatuma tugaruza amafaranga yashowe muri uno mushinga kandi tukanunguka ku kigero cya 13% buri mwaka mu myaka 15 umushinga wose umaze kurangira.

Byongeye kandi uyu mushinga uzazamura imibereho myiza y’abaturage baturiye ikibuga. Mu gihe ikibuga cyubakwaga uyu mushinga wakoreshaga abakozi barenze 500 ku munsi mu gihe kingana hafi n’umwaka n’igice. Igihe ikibuga kizaba gifunguye, tuzahanga imirimo ikoresha abantu barenga 200, abarenze kimwe cya kabiri cy’abo bazaba bava mu rubyiruko rw’ imiryango ituriye ikibuga ndetse bamwe muri bo ubu baratangiye.

Ngarutse ku kuntu RSSB yinjiye muri uno mushinga, Leta y’u Rwanda niyo yatekereje kure izana uyu munshinga, isaba RSSB kuwinjiramo kugira ngo nimara gushoramo imari inawukurikirane neza. RSSB imaze kubisuzuma igasanga ari umushinga mwiza yiyemeza kuwushoramo imari no kuwukurikirana. Nibwo na RUGC nk’ikigo kigomba kuwukurikirana by’umwihariko umunsi ku wundi cyashyizweho na RSSB.

Icyo twabwira abanyamuryango bacu kandi ni uko RSSB yashoye mu cyiciro cya mbere cy’uyu mushinga miliyari 17,7 Frw, zikubiyemo kubaka ikibuga ubwacyo bikozwe na Gregori International (GI), hakiyongeraho kugura imashini yo kucyitaho, amasezerano yo kucyitaho (maintance), kubaka amazu azakenerwa ku kibuga (shelter houses), ndetse n’ibindi bikorwa byo gutunganya iruhande rwacyo kugira ngo ikibuga kijye ku rwego mpuzamahanga cya PGA.

Leta y’u U Rwanda yahaye RSSB ubutaka n’amazu bifite agaciro ka miliyari 16,8 Frw aribwo umushinga uri gukorerwaho. Ubu uwo mutungo wose uwuteranyije ukaba ufite agaciro karenga miliyari 34,5 z’amafaranga y’u Rwanda. Icyo narenzaho n’uko munsi y’ibyatsi, harimo imiyoboro ndetse n’ ibindi bikorwa remezo bigera ku birometero 40 kandi ko RSSB ikoresha impuguke muri ibi bikorwa byose harimo n’ikigo kizobereye mu gucunga no kubyaza umusaruro ibibuga bya Golf cyitwa UGolf cya Groupe Duval.

IGIHE: Mbere yo kubikora, mwaba mwarakoze inyigo igaragaza uko muzajya mwunguka?

Rugemanshuro: Uyu mushinga ukiri mu maboko ya Leta ihagarariwe na RDB, yashyizeho komite igizwe n’inzego za Leta zitandukanye zirimo RDB, Rwanda Housing Authority, Umujyi wa Kigali na RSSB. Icyo gihe hari inyigo yari yarakozwe.

Umushinga watangiye uri kuri hegitari 18, ugizwe no gusana imyobo 9 yari iriho no kongeraho indi 9 kuri ngo ijye ku rwego rwa California. Leta mu kureba kure kandi ikurikije n’icyerecyezo cy’igihugu mu bijyane n’iterambere n’ubukungu bushingiye kuri serivisi, ubukerarugendo na siporo yahisemo ko urwego rw’ikibuga rwazamurwa rukaba mpuzamahanga. Ibi byasabye kongera ubinini bw’ikibuga buva kuri za hegitari 18 bugera kuri hegitari 52, hakubakwa ikibuga kigizwe n’imyobo icyenda ku rwego mpuzamahanga kinafite aho bitoreza.

Ibi byatumye ikibuga gisubirwamo neza kandi hifashishijwe inzobere mu kubaka ibibuga bya Golf ndetse hanakoreshwa igishushanyo gikozwe na Gary Player, umwe mu babaye ibihangange ku Isi mu mu mukino wa Golf, akaba yaranashyizwe muri ‘World Golf Hall of Fame’ mu 1974. Anazwiho inariribonye mu gushushanya ibibuga bya Golf kandi akaba yaranashushanyije ibibuga birenga 400 ku Isi.

Muri Golf, kugira ikibuga cyakozwe n’inzobere nka Gary Player, byongera amahirwe yo kwakira amarushanwa mpuzamahanga ugendeye ku bwiza ndetse n’uburyo uko ikibuga gishushanyije biryoshya umukino. Ikindi ni uko buriya ibyatsi bigaragara hejuru ari igice gito cy’ikibuga cya Golf kuko akazi kenshi n’ibikoresho byinshi biri munsi y’ubutaka. Harimo ibirometero birenga 40 by’ibikorwa remezo; harimo amatiyo, insinga n’utumashini byuhira, ibikoresho n’imiyoboro bikura amazi mu kibuga, n’ibirinda ko amazi avuye mu nkengero z’ikibuga yinjira mu kibuga akacyangiza. Hashyizwemo kandi ibyatsi byabugenewe n’umucanga wabugenewe ibyo byatsi biterwaho.

Ibi byose byazamumuye ishoramari ryari rikenewe kugira ngo bikorwe neza kandi vuba. Hakozwe indi nyigo kugira ngo higwe niba umushinga uko uteganyijwe kuri urwo rwego uzabyara inyungu. Iyo nyigo nshya yagaragaje uburyo iryo shoramari rizagaruka rikabyara inyungu ku kigero cya 13% buri mwaka, mu myaka 15 umushinga wose urangiye.

IGIHE: Niba ihari, mu buryo bw’amafaranga, muzajya mwunguka mute?

Rugemanshuro: Hari inyungu izajya iva mu mukino ndetse n’ibindi bikorwa byo kwidagadura ariko inyungu nini izava mu mazu y’icyitegererezo tuzubaka ku butaka buzengurutse golf. Byose hamwe tuzajya tubona inyungu ya 13% buri mwaka mu myaka 15.

IGIHE: Ese kugira ngo ikibuga kiri ku rwego mpuzamahanga cyuzure, ubusanzwe gitwara amafaranga angahe nibura?

Rugemanshuro: Biterwa n’uko ikibuga kingana, ibigomba kukijyamo n’aho kiri. Tugendeye ku bushakashatsi bwakozwe na KPMG muri 2014 bishobora gutwara hagati ya miliyoni 10 na miliyoni 23 z’ amadolari.

Kubaka iki kibuga gusa byatwaye RSSB miliyoni 11 z’amadolari n’imisoro irimo. Cyubatswe mu gishanga aho ugomba kuzana ubundi butaka, harimo no kwimura abaturage, ndetse n’ibikoresho hafi ya byose by’ibikorwaremezo bikaba byaraturukaga hanze; hakaza kwiyongeramo ko haje kuzamo imvura idasanzwe yo muri Mata 2020 ndetse n’icyorezo cya Covid-19 aho ibiciro byo gutwara ibintu byazamutse cyane.

Uyu munsi twishimiye kumurikira abakunzi ba Golf n’Abanyarwanda muri rusange ikibuga cya Golf. Ubu gifunguye ku bakunzi b’umukino wa Golf, hakurikijwe amabwiriza yo kwirinda icyorezo cya Covid-19.

IGIHE: Mwashinze Rwanda Ultimate Golf Course LTD (RUGC), nk’ikigo cyigenga kigamije gucunga iki kibuga:

- Ese mwakurikiranaga mute ko umutungo wacyo ukoreshwa neza?

Rugemanshuro: RUGC nk’ikigo cyashyizweho byemejwe n’inama y’ubutegetsi ya RSSB ndetse na Minecofin, ariko ihabwa n’izindi komite ziyifasha ndetse inahabwa inzego z’ubuyobozi nk’inama y’ubutegetsi, n’ubuyobozi bukuru. Yanahawe komite tekiniki yo kuyifasha igizwe n’abatekinisiye ba za nzego za Leta arizo RDB, RHA, Umujyi wa Kgali na RSSB ariko hakaniyongeraho na KGC (Ishyirahamwe ry’abakina Golf).

Hashyizweho kandi na komite ngenzuzi na yo irimo izo nzego zose ishinzwe kureba ibyakozwe na komite tekiniki ndetse ikagira inama RUGC.

Amafaranga RSSB yahaye RUGC yatanzwe mu byiciro kandi nta faranga na rimwe ryagiye muri RUGC, RSSB itabanje kureba uko ayo yatanze mbere yakoreshejwe. Hatangwa raporo za buri kwezi zerekana uko imirimo yagenze; muri izo raporo harimo iy’ikigo cyari gishinzwe kureberera ibikorwa mu gihe cyo kubaka ikibuga n’iza komite tekiniki.

Ikindi nk’uko ibikorwa byose bikorwa hubahirijwe amategeko, RUGC itegura kandi ikadushyikiriza konti zangenzuwe (audited accounts) buri mwaka.

Kuba cyarashyizweho kandi ntabwo gitandukanye n’ibisanzwe bikorwa cyangwa binyuranyije n’amategeko aho ikigo gishobara gushyirwaho kigashingwa gukurikirana umunsi ku munsi ishyirwa mu bikorwa ry’umushinga uyu n’uyu wihariye.

IGIHE: Mwaba mwaragenzuye ibijyanye n’imitangire y’amasoko ko bivugwa ko nta piganwa ryabayeho?

Rugemanshuro: Ku bijyanye n’itangwa ry’amasoko, icya mbere twababwira ni uko amasoko yose yatanzwe mu mucyo hakurikijwe amategeko n’imikorere myiza byose hagenderewe ku kubungabunga umutungo w’abanyamuryango no kwihutisha umushinga nk’uko byari biteganyijwe.

Isoko ryo kubaka ikibuga ryahawe Gregori International ryanyuze mu ipiganwa kandi ryanatanzwe na ya komite yashyizweho na RDB mbere y’uko umushinga uza muri RSSB. Birumvikana ko ari mbere y’uko RUGC ibaho. Ibitabo byacu birafunguye twiteguye kuba twakwakira igenzura iryo ariryo ryose ry’inzego zibifitiye ububasha.

IGIHE: Mu itangazo RSSB yashyize hanze, yasobanuye ko hari amategeko ya leta RUGC itakurikije kuko yo ari ikigo cyigenga. Aha mubisobanura mute? Ni ryari bishobora kubaho?

Rugemanshuro: Ntitwegeze tuvuga ko hari amategeko ya Leta y’u Rwanda RSSB itakurikije. Amategeko ya Leta y’u Rwanda areba kandi agenga ibigo bya Leta muri rusange, ibigo byigenga bya Leta ndetse n’iby’abikorera ku giti cyabo. Ariko bitewe n’ubwoko bw’ikigo hashobora kandi biremewe ko ikigo kibifitiye uburenganzira bitewe n’uko cyiyandikishije, n’uruhushya gifite rwo gukora imirimo yacyo gishobora gushyiraho uburyo bw’imikorere bwemewe n’amategeko ya Leta butandukanye n’ubw’ikindi kigo bitewe n’inshingano zacyo ndetse n’imiterere y’imishinga y’icyo kigo; ariko byose bikurikije amategeko ya Leta y’u Rwanda.

Nta tegeko rero ryishwe, gusa RUGC nk’ikigo kigenga kigengwa n’itegeko rigenga ibigo by’ubucuruzi ndetse n’imikorere myiza. Icyo nakongeraho ni uko RSSB nk’ikigo cy’ubwishingizi n’ishoramari, cyemererwa n’amategeko gushora imari mu bigo byigenga mu rwego rwo kubyaza umusaruro amafaranga y’abanyamuryango. Uyu rero si umwihariko wa RUGC, hari n’ ibindi bigo byigenga RSSB yashoyemo imari kandi ibyo bigo byose ntikoresha amategeko agenga ibigo bya Leta ahubwo bikoresha amategeko agenga ibigo byigenga.

Kigali Golf Course ni ikibuga cy’akataraboneka cyubatswe mu gace ka Nyarutarama. Cyaravuguruwe ndetse kiragurwa gikurwa ku myobo 9 kigezwa ku myobo 18 ari na yo yemewe mu bibuga bikinirwaho Golf ku babigize umwuga ku rwego rw’isi.
Mu minsi iri imbere Kigali Golf Course izatangira kwakira amarushanwa yo ku rwego mpuzamahanga y’umukino wa Golf

IGIHE: Amafaranga RSSB ikoresha aturuka ku misanzu y’abanyamuryango. Ni ikihe cyizere mutanga ko umutungo wabo, uwa leta, ukoreshwa mu buryo bukwiye?

Rugemanshuro: Ndagira ngo mpumurize abanyamuryango ba RSSB, ikigo cyabo ntigihomba ahubwo kirunguka. Umwaka ushize wasojwe muri Kamena 2021, RSSB yungutse miliyali 66.4 z’amafaranga y’u Rwanda mu bihe bikomeye nk’ibi bya Covid-19 aho ubukungu bw’igihugu ndetse n’ubw’isi yose bwazahaye bigatuma ibigo byinshi bidatanga inyungu ku migabane. Urugero hari nka banki enye zo mu Rwanda RSSB ifitemo imigabane.

RSSB kandi yari yungutse miliyali 54.5 z’ amafaranga y’u Rwanda muri 2019/2020, na miliyali 49.3 z’ amafaranga y’u Rwanda muri 2018/2019. Ingamba n’impinduka ziri gushyirwa mu bikorwa zizaha RSSB ubushobozi bwo kuzamura uwo musaruro. Tukaba tubishimira abanyamuryango bacu kuko babigiramo uruhare rukomeye mu gushyigikira iryo shoramari riba ryakozwe hirya no hino mu mishinga ifitiye igihugu akamaro.

IGIHE: RSSB yashoye imari mu buhinzi, itumanaho, amabanki, ubwishingizi, ubwubatsi n’ibindi. Ubu kugeza magingo aya, mubara ko ishoramari ryanyu ry’imbere mu gihugu no hanze yacyo ringana gute?

Rugemanshuro: Mu mwaka ushize Ishoramari ry’ imbere mu gihugu ryanganaga na miliyari 1,205 z’amafaranga y’u Rwanda, naho ishoramari ryo hanze y’igihugu ringana na miliyari 133 Frw. Ishoramari ryose hamwe ringana na miliyari 1,338 Frw.

IGIHE: Mu bikorwa by’ishoramari mwakoze, ibimaze gutanga inyungu ku rugero rushimishije ni ibihe muri uyu mwaka?

Rugemanshuro: Mu ishoramari ryatanze umusaruro ku kigero gishimishije kuruta izindi muri uno mwaka twavuga nk’ishoramari mu kuzigama muri za banki z’imbere mu gihugu byatanze umusaruro wa miliyali 25.3 z’amafaranga y’ u Rwanda.

Ishoramari mu mpapuro mpeshafaranga z’igihe gito n’igihe kirekire (treasury bonds/bills) ryatanze umusaruro wa miliyari 24.6 Frw na ho ishoramari mu mpapuro mpeshafaranga mu bigo by’ubucuruzi (corporate bonds/commercial papers) ryatanze umusaruro wa miliyari 5 Frw.

IGIHE: Mu rwego rw’ubuzima, muherutse gushora miliyari 9,5 Frw mu kigo cyo muri Amerika cyitwa Merrimack Pharmaceuticals; ni izihe nyungu zitezwe ku gihugu binyuze muri iri shoramari?

Rugemanshuro: Iri n’ishoramari ryakozwe mu kigo cy’inzobere mu gukora ubushakashatsi ku miti ivura cancer cyo muri Leta Zunze Ubumwe za Amerika. Rikaba ishoramari ry’igihe kirekere utahita utegerezaho umusaruro wose wifuza ako kanya, ariko kugeza ubu tumaze kubona inyungu zituruka kuri iri shoramari igera kuri miliyoni 3.2 z’ amadolari ya Amerika.

Raporo y’Umugenzuzi Mukuru w’Imari yakunze kugaragaza ibibazo mu mishinga RSSB ikora. Urugero:

- Inyubako zubakwa ariko zitajyanye n’ubushobozi bw’abanyamuryango?

- Izubakwa mu ntara ntizibone abazikodesha [nk’i Nyagatare]

- Ibi bibazo murateganya kubikemura mute?

Rugemanshuro: Icyo nabanza gusobanura ni uko iyo dukora ishoramari tureba bwa mbere imishinga yunguka kandi izagira izindi nyungu mu bukungu bw’igihugu no ku buzima bw’ Abanyarwanda.

Mfitiye inkuru nziza abanyamuryango bacu ko twatangije umushinga wo kubaka amazu aciriritse (affordable homes) tuzagurisha miliyoni zitarenze 35 Frw ahantu hatandukanye harimo Rusororo na Rwamagana, nyuma yaho n’ahandi RSSB ifite ubutaka hakazatoranywamo hakurikije igishushanyombonera cy’aho buri. Uyu mushinga ukaba uri kwigwa neza kugira ngo amwe mu makosa yabaye mbere atazasubira kandi iyo mishinga izarangire amazu adahenze, bitagabanije ubwiza n’ubuzirange bw’inzu.

Amakuru arambuye kuri iyi mishanga akatazangazwa inyigo zayo zarangiye bitarenze impera z’uyu mwaka. Ku mazu ya Nyagatare, ubu yose uko ari abiri arakodeshwa.

IGIHE: RSSB ifite imigabane muri Sonarwa. Muri iki gihe inyubako yari iya Sonarwa iri gusenywa, aho yahoze ni iyihe mishinga igiye kuhakorerwa?

Rugemanshuro: Iyi nyubako iri gusenywa ku busabe bw’Umujyi wa Kigali kugira ngo hajye inyubako ijyanye n’igishushanyombonera gishya cy’Umujyi wa Kigali. Hazatunganywa hanyuma hagurishwe kugira ngo hashyirwemo inyubako nshya ijyanye n’igihe nk’uko igishushanyombonera cy’Umujyi wa Kigali kibiteganya.

IGIHE: Hari imisanzu itangwa n’ibigo birimo iby’itumanaho, Polisi n’ibindi igamije kunganira Mutuelle de Santé. Kuva ririya tegeko ryajyaho mu 2019, hamaze gutangwa angahe?

Rugemanshuro: Inkunga nshya ya Leta inyuze mu minsanzu yashyizweho muri 2019, ubu igeze kuri miliyari 29 Frw. Muri 2019-2020 habonetse miliyari 10 Frw. Kuva muri Nyakanga 2020 kugeza muri Werurwe 2021, habonetse miliyari 19 Frw.

Turashima Leta y’u Rwanda kuri iyi nkunga ikomeye yateye abanyamuryango b’ubwishingizi bwa Mutuelle. Byongera ubushobozi bw’ikigega cya Mutuelle, bigatuma ibyo bagenerwa byiyongera.

Amafoto y’imiterere ya Kigali Golf Course kuri ubu

Muri iki kibuga harimo ibyuzi bifasha mu gihe hakenewe kucyuhira no gutuma kirushaho kuryohera ijisho
Mu cyiciro cya kabiri cy'uyu mushinga iyi nzu nayo izavugururwa ishyirwe ku rwego rwiza
Iki kibuga cyitezweho kuzaba ahantu heza hakurura abakunzi ba Golf ku Isi
Kigali Golf Course yashyizwemo ibiyaga bito bizajya bifasha mu kuhira ubwatsi no kongerera ubwiza ikibuga
Iki kibuga cyaraguwe gishyirwa ku rwego mpuzamahanga, aho ubu gishobora kwakira imikino ikomeye
Mu ijoro ni uku Kigali Golf Course iba igaragara
Iki kibuga cyitezweho kuzamura umubare w'abasura u Rwanda buri mwaka
Kigali Golf Course ubu ifite imyobo 18 ivuye ku icyenda
Biteganyijwe ko iki kibuga kizubakwamo hoteli y'inyenyeri eshanu izajya yakira abakigana
Kigali Golf Course ifite n'igice cyahariwe abagore n'abakobwa bakina Golf
Uretse kwakira imikino ya Golf, iki kibuga kizajya kinakorerwamo izindi siporo zirimo no kwiruka muri utu tuyira
Umushinga mugari ujyanye n'iki kibuga cya Golf uzatwara miliyoni 140$
Kigali Golf Course yashyizwe ku rwego rwo kwakira imikino ikomeye
Uretse kuba ikibuga ni n'ahantu nyaburanga abantu bashobora gutemberera
Abakinnyi ba Golf mu Rwanda basabwe kubyaza umusaruro iki kibuga
Iki kibuga cyavuguruwe ku gitekerezo cya Leta y'u Rwanda hagamijwe guteza imbere imikino

Amwe mu mafoto ya Kigali Golf Course ubwo yari ikiri kubakwa

Iki kibuga cya Golf cya Kigali ukirebeye hejuru ntiwapfa kumenya imirimo ihambaye yakozwe munsi y’ubutaka kugira ngo kibe kimeze uko kiri uyu munsi. Ahubatswe igice cya kabiri ho byasabye ko habanzwa kwigizwa hejuru kuko hari mu gishanga cyane.

Imwe mu mirimo yakozwe munsi y’ubutaka harimo gushyiramo imiyoboro y’amazi izajya yifashishwa mu kuhira ndetse no gukura amazi mu kibuga mu gihe imvura yaguye.

Ibiyaga biri muri iki kibuga byubakanywe ubuhanga ku buryo amazi abirimo aba ari meza kuko abasha gutemba
Ahubatswe iki kibuga hahoze ari igishanga, ibintu byatumye hakorwa imirimo myinshi yo kugikamya
Igice kimwe cy'iki kibuga byasabye ko kigizwa hejuru kuko cyari mu gishanga
Hifashishijwe imashini zakoraga amanywa n'ijoro
Imirimo yo kubaka iki kibuga yakozwe mu mezi 15
Ibiyaga byifashishwa mu kuhira iki kibuga ni uku byubatswe
Munsi y'ubutaka hashyizwemo ibitembo bitwara amazi yo kuhira
imirimo yo kubaka iki kibuga yakorwaga amanywa n'ijoro
Umuyobozi Mukuru wa RSSB, Regis Rugemanshuro yavuze ko ikigo ayoboye kirajwe ishinga no gushora imari mu mishinga yunguka kandi y'igihe kirekire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .