00:00:00 IGIHE NETWORK KN KINYARWANDA EN ENGLISH FR FRANCAIS

Ibyifuzo by’abafite utubari bakigerwaho n’ingaruka z’umwaka bamaze badakora

Yanditswe na Hakizimana Jean Paul
Kuya 14 Ugushyingo 2021 saa 04:37
Yasuwe :
0 0

Kuva tariki ya 14 Werurwe 2020 wari umunsi ushaririye mu Rwanda kuko aribwo habonetse umurwayi wa mbere wa COVID-19. Kuva icyo gihe ibikorwa bitandukanye byarafunzwe abantu basabwa kuguma mu ngo zabo kubera kwirinda ko icyo cyorezo cyakwirakwira mu gihugu.

Ibikorwa bitandukanye birimo ubucuruzi, imikino, gutwara abantu byagiye bifungurwa ariko muri rwa rupapuro rw’umuhondo rwashyirwaga hanze nyuma y’ibyemezo by’inama y’Abaminisitiri iyo bageraga ku tubari habaga handitsemo ko tuzakomeza gufungwa.

Benshi mu bari bafite ubu bucuruzi bw’utubari hirya no hino mu gihugu ndetse n’abadukoragamo ni umwe mu myanzuro yabashaririye kuko ni bumwe mu bucuruzi butunze benshi hirya no hino mu gihugu.

Utubari turi mu byafunzwe igihe kinini kuko twamaze umwaka n’amezi atandatu tutaremererwa gufungurwa. Nyuma yo kwemererwa gukorera IGIHE yaganiriye na bamwe mu bashinze ubu bucuruzi ndetse n’abadukoramo bagaragaza uko ubu bucuruzi buhagaze kuri ubu n’ibyifuzo bageza kuri Leta.

Mugabo Isaac washinze akabari ka Papua gaherereye mu Mujyi wa Nyagatare, yavuze ko kimwe n’abandi bose mu gihe cya COVID-19, bahombye mu buryo bukomeye.

Yagize ati “Nkanjye nari mfite ideni rya miliyoni 16 Frw, nasabwaga kwishyura ibihumbi 601 Frw buri kwezi , banki zatworohereje amezi atatu andi mezi turishyura bisanzwe, ubwo badufungiraga rero byansabye kwigomwa ngurisha imwe mu mitungo yanjye kugira ngo mvemo umwenda banki kuko sinari bumare umwaka n’amezi umunani ntishyura”.

Ku kijyanye n’ikigega nzahurabukungu cyashyizwemo amafaranga kugira ngo afashe abari bafite ubucuruzi buciriritse, yavuze ko nyuma y’umwaka n’amezi umunani bahawe amafaranga ibihumbi 150 Frw aho bayahawe mu byiciro bibiri.

Mugabo avuga ko kuri ubu ibyo binjiza nyuma y’umwaka n’amezi umunani usanga bingana na 50% by’ibyo binjizaga mbere ya COVID-19.

Ati “Njye icyo nasaba Leta kuri ubu ni uko yafata ubucuruzi bw’akabari nk’ubufite agaciro butunze abantu benshi. Nta buryo twashyiriweho nibura dushyigikiwe na Leta ngo tube twafata inguzanyo tuzishyure nyuma kuko twamaze umwaka n’amezi umunani. Mu byifuzo byanjye ni uko hajyaho ikigega cyangwa tugasabirwa banki kuduha inguzanyo ku nyungu nto kuko ingaruka z’igihe twamaze tudakora ziracyaturiho."

Gakwavu Philbert ufite akabari, Classic bar mu Mujyi wa Kayonza, yavuze ko kuri ubu imikorere igeze kuri 60% ugereranyije na mbere y’uko haza icyorezo cya COVID-19.

Ati “Icyifuzo cyanjye nasaba Leta ko yafata utubari nk’ubundi bucuruzi. Hari igihe nagendaga mu modoka zitwara abagenzi nkareba ukuntu bicaye batahanye intera nakwibuka ko twe banze kudufungurira nkumva biranyobeye, ikindi hari amafaranga batanze tabenshi ntitwayabonye kandi niba mwibuka neza twasigaye dutunze abakozi bacu badakora kuko nta nzira zo gutaha bari bafite.”

Uwimana Josiane wakoreraga mu kabari ka Papua, yavuze ko mbere ya COVID-19 yinjizaga hejuru y’ibihumbi 70 Frw ku kwezi. Aya mafaranga ngo yamufashaga mu kwishyurira umwana we ishuri no gutunga umuryango.

Mu gihe cya COVID-19 ngo byabaye ngombwa ko atungwa n’umukoresha we ubuzima butangira kugenda nabi.

Niwemugeni Consolée ukorera mu kabari ka New look, avuga ko mbere ya COVID-19 nibura yinjizaga ibihumbi 100 Few ku munsi nyuma yo kongera gufungurirwa ngo nibura binjiza 1/3 cy’amafaranga binjizaga.

Ati “Ubu abantu bajya kwinjira mu kabari ukabona bafite ubwoba, abinjira nabo ntibanywa inzoga nyinshi, urebye nta mafaranga ari mu bantu kandi turasabwa kwishyura abakozi, inzu dukodesha, mbese urebye nta nyungu turi kubona ni ukwanga kwicara mu rugo gusa. Dufite icyizere ko ibintu bizagenda neza mu minsi iri imbere.”

Niwemugeni yasabye Leta kureba uburyo ikiguzi bishyura ku kwipimisha buri nyuma y’iminsi 14 cyakurwaho kuko kiri mu bibagoye cyane.

Ati “Gupimisha abakozi buri nyuma y’iminsi 14 ntabwo bitworoheye kandi tutari no kwinjiza. Nkanjye mfite abakozi batanu nanjye wa gatandatu ubwo buri minsi 14 ndasabwa kwishyura ibihumbi 30 Frw, mu kwezi ni ibihumbi 60 Frw kandi imikorere ntayo ayo mafaranga aratugoye cyane pe.”

Twesigye Patrick washinze White bar kari mu tugezweho mu Mujyi wa Nyagatare, yavuze mbere ya COVID-19 bari bakoreshaga abakozi 12 bakabacumbikira ndetse bakanabatunga, ubwo COVID-19 yageraga mu Rwanda ngo bose bahise babasezerera bongera gukora ubwo Leta yafunguraga.

Ati “Ikibazo rero dufite nta bakiliya tukibona abantu baracyatinya kwinjira mu tubar bigatuma tutinjiza, amafaranga yo gupimisha abakozi buri nyuma y’ibyumweru bibiri ni menshi. Nkanjye mfite abakozi batandatu kubapimisha buri byumweru bibiri birahenze, ntabwo bitworoheye."

Twesigye yavuze ko ikindi kibazo bafite ari icy’amafaranga yatanzwe na Leta agamije gufasha abafite ubucuruzi bwahombye. Yavuze muri aka Karere urebye abayahawe ari bake cyane.

Kabatesi Esther wakoraga mu kabari we avuga ko mbere yakoreraga amafaranga yamufashaga kwishyura inzu ndetse akanarihirira umwana we ishuri. Nyuma ngo byarahindutse atangira gusaba inshuti n’imiryango kumufasha.

Ati “Nubwo bafunguye utubari tugasubira mu kazi ntabwo duhembwa nkuko twahembwaga kuko nta bakiriya tukibona, ibi bituma n’abo dukorera bagabanya imishahara yacu, icyo nasaba Leta nuko mu myanzuro yajya ijya gufatira utubari yajya inibuka ko dutunze benshi.”

Kuri ubu benshi mu bafite utubari barasaba Leta kubafasha bakabona inkunga yatuma ubucuruzi bwabo bwongera gukora neza ndetse bakanayisaba kuborohereza mu gupimisha abakozi buri nyuma y’iminsi 14 ngo kuko batarabasha kwisuganya neza.

Classic bar gaherereye mu Mujyi wa Kayonza
Bamwe mu bakora mu tubari bavuga ko imibereho yahindutse ko imishahara bafataga mbere yagabanyutse
White bar kari mu tubari twinjizaga hejuru y'ibihumbi 200 Frw ku munsi none kuri ubu kinjiza munsi y'ibihumbi 50 Frw gusa
Kabatesi Esther wakoreraga mu kabari ka White bar gaherereye mu Mujyi wa Nyagatare yavuze ko amafaranga bahembwaga yagabanutse cyane kubera COVID-19 bituma imibereho yabo itamera neza
Twesigye Patrick avuga ko kimwe mu bibangamiye abafite utubari ari ugupimisha abakozi buri nyuma y'iminsi 14 agasaba Leta kuborohereza
Mugabo Isaac washinze akabari ka Papua arasaba Leta gushyirasho uburyo bwakorohereza abafite utubari mu gusora
Abakorera muri New look bar bavuga ko bakigorwa n'imisoro ihanitse ndetse no gupimisha abakozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .