Iburasirazuba: Abahinzi baravuga imyato Bralirwa Plc yabafashije kuzamura umusaruro w’ibigori

Yanditswe na Hakizimana Jean Paul
Kuya 13 Kamena 2019 saa 12:31
Yasuwe :
0 0

Abahinzi bo mu turere twa Rwamagana, Kayonza na Ngoma, mu Ntara y’Iburasirazuba, baravuga imyato uruganda rwenga ibinyobwa bisembuye n’ibidasembuye (Bralirwa Plc), nyuma yo kubafasha kuzamura umusaruro w’ibigori ukava kuri toni ebyiri kuri hegitari ukagera kuri toni eshanu.

Ibi byishimo abahinzi babigaragaje ubwo hamurikwaga ibyavuye mu mushinga wo guteza imbere ubuhinzi bw’ibigori mu myaka itanu kuva 2014 kugera 2019.

Wakorwaga n’Umushinga w’Abanyaburayi ugamije guteza imbere ibyaro (EUCORD), aho wari waratewe inkunga na Heineken, biciye muri Bralirwa Plc, Minisiteri y’ububanyi n’amahanga y’u Buholandi ndetse na IFC.

Uyu mushinga washowemo miliyoni ebyiri z’amadorari hagamijwe kongera umusaruro w’ibigori ku bahinzi bo mu Rwanda.

Umurerwa Agnès wari uhagarariye koperative ya Cohonya, ihinga ibigori mu Murenge wa Kigabiro, ku butaka buhujwe bungana na hegitari 11, yavuze ko uyu mushinga wabafashije kuko mbere bahingaga bavangavanga imyaka yose mu murima ku buryo no kumenya gukoresha ifumbire byari ikibazo.

Ati “Baraje rero badukangurira guhinga ibigori tutabibangikanya n’indi myaka, baduhugura ku gufata neza umusaruro no kuwuha ubwiza, byatumye umusaruro wacu uzamuka cyane tuva kuri toni 20 ubu tugeze kuri toni 45 ku buso bungana na hegitari 11.”

Mukashema Patricie ukorera muri koperative ‘Twunge Ubumwe’ ikorera mu Karere ka Kayonza mu Murenge wa Murundi, avuga ko ari abanyamuryango 27 bahinga ibigori kuri hegitari icyenda.

Yavuze ko kuri ubu hari intambwe nini bateye mu buhinzi babikesha amahugurwa bahawe.

Ati “Muri koperative yacu mbere twasaruraga toni ebyiri kuri hegitari ariko aho tumaze guhugurirwa ubu tugeze kuri toni enye n’igice kuri hegitari. Turifuza ko mu myaka iri imbere tuzagera kuri toni zirindwi kuri hegitari tubifashijwemo n’aba bafatanyabikorwa.”

Umuhuzabikorwa wa EUCORD Rwanda, Ngoga Fabien, wakurikiranye uyu mushinga mu myaka itanu, avuga watanze umusaruro urenze uwo bari biteze bitewe n’uburyo abahinzi babigizemo ubushake cyane.

Ati “Ubundi twatangiye uyu mushinga hagamijwe kugira ngo twongerere ubushobozi abahinzi bajye babasha kugemura umusaruro mwinshi wujuje ubuziranenge kuri Minimex bitume na Bralirwa Plc, ibona ibigori byinshi biturutse mu Rwanda, ibyo rero twabigezeho kuko twifuzaga ko nibura mu gihembwe bagemura toni ibihumbi 3000 ariko barazirengeje ubu bagemura toni ibihumbi 5000.”

Umuyobozi ushinzwe ikorwa n’ikwirakwizwa ry’ibinyobwa bya Bralirwa, Sander Bokelman, yishimiye intambwe uyu mushinga wagejeje ku bahinzi.

Ati “Nka Heineken twifuza ko 60% by’ibikoresho twifashisha mu kwenga inzoga zacu byaturuka mu gihugu dukoreramo aho kujya kubikura hanze. Twahisemo gushora imari mu guhugura abahinzi bahinga amasaka, ibigori n’ibindi dukenera mu kwenga ibinyobwa kugira ngo babikore kinyamwunga ya mafaranga twatangaga hanze abe aribo bazajya bayakira bitume n’ubukungu bw’igihugu buzamuka.”

Uyu muyobozi yavuze ko ubusanzwe basohoraga amafaranga menshi bajya kugura ibigori byujuje ubuziranenge mu bihugu nka Uganda na Zambia, ariko ubu bitazongera kuko abahinzi bo mu Rwanda nabo basigaye beza umusaruro umeze neza.

Imbogamizi y’ubuhunikiro ku bahinzi b’ibigori

Nubwo umusaruro w’ibigori wabonetse, ngo haracyari ikibazo cyaho uwo musaruro uhunikwa.

Umuyobozi Mukuru w’ishami rishinzwe umusaruro n’ikoranabuhanga rijyanye na wo muri RAB, Illuminée Kamaraba, yavuze ko hakwiye no kurebwa uburyo hashorwa imari mu bikorwa bijyanye no kumisha no guhunika uwo musaruro.

Ati “Abahinzi dufite ntabwo babasha kubyigurira kuko birahenze cyane akaba ariyo mpamvu dusaba abafatanyabikorwa bacu gushora amafaranga mu kugura ibyo bikoresho byatuma umusaruro tubona ubikwa neza ndetse bakanashora mu kubaka ibikorwa remezo.”

EUCORD Rwanda yafashije abahinzi barenga ibihumbi 15 000 biciye mu mushinga wiswe ‘CREATE’ ni umushinga watangiye mu 2014 hagamijwe guteza imbere ubuhinzi bw’ibigori biciye mu guhugura abahinzi kongera umusaruro wujuje ubuziranenge.

Uyu mushinga ukaba wakoreraga mu turere twa Rwamagana, Kayonza na Ngoma ugakorana n’abahinzi bibumbiye mu makoperative 50 aho watangiye ukorana na koperative 15 ariko zikagenda zizamuka. Aba bahinzi bahingaga kuri hegitari ibihumbi 300 none ubu bageze kuri hegitari ibihumbi 5000.

Uyu mushinga utaratangizwa ngo byinshi mu bigori Bralirwa Plc, yakoreshaga mu kwenga inzoga 90% byagurwaga hanze y’Igihugu none ubu ngo 60% bikurwa imbere mu gihugu 40% akaba ariyo ikurwa hanze.

Uretse uyu mushinga Bralirwa Plc ifite n’undi mushinga wiswe BRAMINI Ndego, aho ifite ubutaka bungana na hegitari 600 kuri ubu hegitari 420 zikaba zarahinzweho ibigori bizunganira ibituruka mu musaruro w’abaturage.

Mukashema Patricie yavuze ko mbere batarahugurwa babonaga umusaruro ungana na toni ebyiri kuri hegitari ngo none ubu babona toni 4.5
Umuyobozi wa Bralirwa Plc, Merid Demissie, yavuze ko mbere yuko bahugura abahinzi batumizaga hanze ibigori bingana na 90% none ubu ngo 60% bisigaye bituruka imbere mu gihugu
Umuyobozi ushinzwe ikorwa n'ikwirakwizwa ry'ibinyobwa bya Bralirwa, Sander Bokelman, yavuze ko bifuza ko umusaruro w'ibigori bakoresha nibura 60% ugomba guturuka imbere mu gihugu
Umuyobozi Mukuru w'ishami rishinzwe umusaruro n'ikoranabuhanga rijyanye nawo muri RAB, Kamaraba, yasabye ko hanongerwa amafaranga mu gushora mu bikorwa remezo bifasha mu gufata neza umusaruro
Abahinzi b'indashyikirwa bashimiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza