Ibitwenge ni byose ku bahinzi b’ibigori basaga igihumbi bakuwe ku rutonde rwa ba bihemu

Yanditswe na Ntabareshya Jean de Dieu
Kuya 18 Gashyantare 2021 saa 10:19
Yasuwe :
0 0

Abahinzi b’ibigori basaga 1000 bavanywe ku rutonde rw’abiswe ba bihemu nyuma y’uko bigaragaye ko umwenda Urwego Bank, ivuga ko yahaye abahinzi 1066 bibumbiye mu makoperative agera kuri 28 yo mu Ntara y’Iburasirazuba n’Amajyepfo.

Mu mpera z’umwaka 2015, nibwo Urwego Bank yahaye inguzanyo ya miliyari zisaga 1,6 Frw amakoperative y’abahinzi b’ibigori 28 bo mu Ntara y’Iburasirazuba n’Intara y’Amajyepfo.

Bamwe mu banyamuryango b’ayo makoperative babwiye itangazamakuru ko yanyujijwe kuri konti y’umugabo ufite uruganda rutunganya ibigori rwa Bugesera Grow Business Company, ari na we wagombaga kwishyura ayo mafaranga, naho bo bakagemura umusaruro wabo muri uru ruganda.

Icyaje gutungurana ni uko abahinzi bisanze ku rutonde rwa ba bihemu (bivuze ko batemerewe kongera kubona inguzanyo mu bigo by’imari) kubera umwenda bafitiye iyo banki kandi atari bo bawufashe cyangwa bagombaga kuwishyura.

Nyuma y’uko Minisitiri w’Ubutabera akaba n’intumwa nkuru ya Leta, Johnston Busingye yandikiye ibaruwa Urwego Bank asaba ko aba baturage bakurwa ku rutonde rwa ba bihemu, iyi banki nayo yahise isubiza Minisitiri ko aba baturage bakuwe ku rutonde rwa ba bihemu.

Abaturage bacyumva ko bakuwe ku rutonde rwa ba bihemu akanyamuneza kabaye kose nk’uko babitangarije RBA.

Umwe yagize ati “Ni inkuru nziza y’uyu munsi, kuba abanyamuryango bakuwe muri ba bihemu, byatunejeje. Tukaba dusaba kandi ko uyu mugabo yakishyura ibibazo bikava mu nzira.”

Undi na we ati “Twishimye cyane ko ubutabera bwakoze icyo bugomba gukora, umuturage ubundi yari yaraharenganiye. Murabizi ko ubuzima buri hanze aha twese twaka inguzanyo ariko twari twararenganye batitataye ko twebwe tutagiramo konti.”

Ubuyobozi bwa Urwego Bank ruvuga ko nta byinshi bwatangariza itangazamakuru ku bijyanye no kuzishyuza uyu mwenda mu gihe urubanza rukiri mu nkiko.

Abagize uruhare mu bikorwa byo gutanga no kwakira iyi nguzanyo bari mu maboko y’ubutabera, harimo rwiyemezamirimo wari wishingiye aba bahinzi akanyuzwaho n’amafaranga, bamwe mu bakozi ba Banki Urwego na bamwe mu bahoze bayoboye aya makoperative.

Umuyobozi mukuru w’Urwego rw’Igihugu rushinzwe guteza imbere Amakoperative mu Rwanda, Prof Harerimana Jean Bosco yavuze ko gukura aba baturage ku rutonde rwa ba bihemu byatewe n’uko habayemo amanyanga mu mitangire y’ayo mafaranga.

Ati “Iyo mikorere idasobanutse kandi idahwitse, niyo yatumye abo bahinzi bajya muri ba bihemu, ariko muri abo 1066, abamaze gukurwa muri ba bihemu bangana 1046, abasigaye ni abagize uruhare mu itangwa ryayo mafaranga, barimo abayobozi b’ayo makoperative.”

Izi koperative uko ari 28 zari zifite abanyamuryango bangana 4925, abari barashyizwe ku rutonde rwa ba bihemu ni 1066.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .