Ibisabwa abacuruzi b’inyongeramusaruro bishobora gusubiza bamwe ku isuka

Yanditswe na Umurerwa Emma Marie
Kuya 20 Mata 2017 saa 01:49
Yasuwe :
0 0

Ibyo umucuruzi asabwa kugira ngo apiganire isoko ryo kugemura inyongeramusaruro ku isoko ryo mu Rwanda mu mwaka wa 2017-2018, ngo birimo amananiza ashobora gutuma bamwe mu bacuruzi basubira ku isuka kubera ubushobozi.

Ku itariki ya 21 Werurwe 2017 nibwo Ikigo Gishinzwe Ubuhinzi n’Ubworozin (RAB) cyasohoye inyandiko ikubiyemo isoko ry’inyongeramusaruro, ndetse n’ibyo upiganwa agomba kuba yujuje.

Nk’uko bigaragara mu nyandiko IGIHE ifitiye kopi imwe mu ngingo ikomeje guca intege abacuruzi nk’uko babivuga, ni igira iti “Umuntu upiganirwa gukora iyi mirimo agomba kugaragaza gihamya ko asanzwe akora iyi mirimo, gihamya ko yaba yarakoze iyi mirimo nibura akaba yaragemuye megatoni 500 z’inyongeramusaruro mu karere ka Afurika y’Uburasirazuba, yo hagati ndetse n’Amajyepfo ndetse bikaba akarusho aheruka ku isoko ryo mu Rwanda.”

Abacuruzi b’inyongera musaruro baganiriye na IGIHE, bavuze ko iyi ngingo irimo amananiza ku basanzwe bacuruza inyongeramusaruro.

Umwe muri aba bacuruzi yagize ati “Mu by’ukuri ibi bintu ni amananiza ku munyarwanda bari bakwiye kureba uburyo umuntu asanzwe agemura ifumbire ku isoko ryo mu Rwanda kuko n’ubundi iyo fumbire izaba ije mu Rwanda si muri ibyo bihugu bindi bavuga.”

Undi ati “Isoko si iryo kugemura ifumbire mu bihugu by’Afurika, twibaza impamvu bashyizemo iriya ngingo. Niba atari amananiza bakwiye kuyikuramo. Bitabaye ibyo iri soko rishobora kuzaduca mu myanya y’intoki tugasubira ku isuka kubera ubushobozi.”

“Barabeshya nta mananiza arimo”

Umuyobozi w’ishami rishinzwe umusaruro no kwihaza mu biribwa , Dr Telesphore Ndabamenye, avuga ko isoko RAB yatanze ari isoko mpuzamahanga, abujuje ibisabwa bose baba abanyarwanda cyangwa abanyamahanga bakaba bemerewe gupiganwa.

Yagize ati “Abavuga ibyo ubwo ni abacuruzi bato. Ibintu by’amafumbire ntabwo ari ibintu byo gukina, abantu baba bashaka kubyinjiramo ariko wenda batanabishoboye kuko bisaba kuba ugaragaza ubushobozi."

Akomeza avuga ko iri soko ritararangira, abujuje ibisabwa bakwiye kubigaragaza kuko amasoko agira amategeko ayagenga.

Ati "Amasoko tugenda tuyahindura dukurikije ibyo igihugu gikeneye, isoko ntabwo ari ikintu kidahinduka rishobora guhinduka bitewe n’ubwoko ndetse n’ingano y’amafumbire dukeneye. Iri ni isoko mpuzamahanga si irigenewe Abanyarwanda gusa, ufite ubushobozi wese yaba Umunyarwanda cyangwa umunyamahanga yemerewe gupiganwa."

Dr Ndabamenye yakomeje avuga ko ibikubiye muri iri soko bigamije kunoza uburyo ifumbire igera mu gihugu ndetse n’uburyo igezwa ku muturage.

Hashize iminsi havugwa ibibazo mu bucuruzi bw’inyongeramusaruro byatumye bamwe mu babukora bagezwa imbere y’ubutabera bakurikiranyweho ibyaha bishamikiye ku gucuruza ifumbire itujuje ubuziranenge, kwishyuza ifumbire batatanze n’ibindi byaha .

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza