Ibigo by’imari n’iby’itumanaho mu Rwanda bigiye guhuzwa mu guhererekanya amafaranga

Yanditswe na Evariste Nsengimana
Kuya 1 Kanama 2019 saa 10:05
Yasuwe :
0 0

Ikigo gifasha mu guhuza uburyo bwo kwishyura hakoreshejwe ikoranabuhanga (RSwitch), gitangaza ko uyu mwaka uzarangira mu Rwanda abantu bashobora kohereza no kwakira amafaranga hagati yabo nubwo baba bakoresha ibigo by’imari n’iby’itumanaho bitandukanye.

Ibi bizakorwa binyuze ku muyoboro iki kigo kizashyiraho uhuza ibigo by’imari, iby’itumanaho n’ibindi bitanga serivisi zo guhererekanya amafaranga. Ikigamijwe ni ukugira ngo bihurizwe ku muyoboro umwe.

Ni ukuvuga ko niba Banki runaka izabasha guhuza umuyoboro wayo n’izindi zikorera mu Rwanda n’ibigo by’itumanaho, abakiliya bazo bakabasha gukura amafaranga bafitemo bakayashyira ku zindi ku giciro gito.

Umuyobozi mukuru wa RSwitch, Gaga Jean Claude, yabwiye IGIHE ko ubu buryo bumaze igihe butegerejwe na benshi, imyiteguro igeze kure ku buryo, hari icyizere ko buzaba bwarangiye bitarenze 2019.

Ati “Hari ibigo by’imari biri mu igerageza ariko kuko tutarabitangiza ntabwo byifuza ko twabivuga ariko intego twihaye ni uko iki gihembwe tugiye gutangira muri Nzeri tugomba kubishyira ku isoko.”

RSwitch imaze igihe yumvikana n’ibigo bitanga serivisi z’imari ku buryo ubwo buryo buzakoramo bidahenzwe kandi n’abakiliya babyo bikaborohereza mu mwanya byabatwaraga n’amafaranga bacibwa.

Gaga ati “Twarabanje tubyumvikanaho n’abatanga serivisi z’imari, ubu tugeze aho turimo kumvikana ku biciro n’uburyo bizakorwa kugira ngo tubishyire ku isoko. Nitubihuriza hamwe, tuzaba tugeze kuri ya ntego yo kugera ku bukungu butarimo guhererekanya amafaranga mu ntoki.”

Ibi ngo bishobora no kuzatuma inyungu ku nguzanyo igabanuka kuko ibigo by’imari bizaba bifite amafaranga menshi abakiliya babyo batayagendana mu ntoki cyangwa ngo bayabike mu nzu n’ahandi adakoreshwa.

Gaga yasobanuye ko Banki imwe ishaka guhuza umuyoboro wayo n’izindi Banki zirenze 17 zikorera mu gihugu byayisaba ibintu byinshi birimo umwanya utibagiwe n’ubwumvikane bw’uko bazishyurana.

Ati “Iyo bihurijwe hamwe, imwe igahuza umuyoboro wayo n’uwa RSwitch, bivuze ko izaba ibonye umuyoboro w’izindi zose, bimusabe amafaranga macye, umwanya muto kandi akaba abiboneye icyarimwe atarinze kwiruka ku zindi banki.”

Ubusanzwe hagati ikigo cy’imari, ibyitumanaho n’ikindi byagiraga uburyo bwo guhererekanya amafaranga hifashishijwe ikoranabuhanga hagati yabyo ariko ugasanga bimwe birasaba igiciro kitanogeye ubikoresha.

Gaga ati “Niba Banki yanjye kwihuza n’izindi byarayitwaye amafaranga macye nanjye ikiguzi cyakabaye ari gito kuko iyo ikiguzi cyabaye kinini bacyegeka ku mukiliya. Aho kugira ngo uzajye ubanza kujya muri Banki uvaneho amafaranga ubone kuyohereza ku wundi n’umwanya bisaba, bizaba bisaba gukoresha uwo muyoboro umwe twabahurijeho bose.”

Ibyo ngo bizabarinda umwanya bamaraga babikuza kuri Banki no kuyabitsa ku yindi cyangwa kuri telefone kugira ngo babashe kuyoherereza abandi.

Imibare igaragaza ko ku Isi ibigo byifashisha ikoranabuhanga mu guhererekanya amafaranga uyu munsi birenga 7500 ariko ayo bihererekanya ari munsi ya miliyari 1$. Abahererekanya amafaranga bifashishije telefone biyongera umunsi ku wundi kurusha abakoresha ibigo by’imari.

Umushoramari w’umunyamerika Vikram Pandit avuga ko mu myaka itanu iri imbere, ikoranabuhanga mu rwego rw’imari no guhererekanya amafaranga rishobora kuzatuma 30% by’akazi katangwa n’ibigo by’imari kabura.

Mu Rwanda amafaranga yahererekanyijwe kuri banki yagabanutseho kimwe cya kabiri mu 2014 mu gihe kuri telefone yikubye inshuro zisaga ebyiri.

Inzobere mu guhuza ikoranabuhanga zigaragaza ko iyo ibigo bidahuza bimwe bihomba abakiliya kuko mu gihe umwe yakabaye yoherereza amafaranga uwo badakoresha ikigo kimwe ataba akibikoze.

Umuyobozi wa RSwitch, Jean Claude Gaga, yabwiye IGIHE ko ubu buryo buzashyirwa ahabona bitareze uyu mwaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza