Kwamamaza

Ibicuruzwa 10 u Rwanda rwohereza mu mahanga bikomeje gutakaza agaciro

Yanditswe kuya 26-08-2016 saa 11:27' na Cyprien Niyomwungeri


Muri iyi minsi ubukungu bw’ibihugu bikizamuka n’ibiri mu nzira y’amajyambere byungukira mu kohereza hanze ibicuruzwa bwifashe nabi, ibi ahanini biraterwa n’impinduka ku miterere y’isoko mpuzamahanga zifitanye isano no kugenda gahoro k’ubukungu bw’u Bushinwa.

U Rwanda nka kimwe muri ibyo bihugu, ntirworohewe na gato kuko Banki Nkuru y’u Rwanda yatangaje ko izamuka ry’umusaruro mbumbe w’ibihugu utari guhura n’ibipimo byari byariyemejwe.

Uyu munsi uyu musaruro byitezwe ko uzamuka 4.1% ugereranyije na 4.5% yari yizewe.

By’umwihariko ku Rwanda ibicuruzwa 10 birimo ikawa, icyayi n’amabuye y’agaciro ni bimwe mu byataye agaciro ku isoko mpuzamahanga bituma n’umusaruro w’ibyoherezwa mu mahanga mu mezi atandatu ya mbere ya 2016 ugabanukaho 2.4%, uba miliyoni 268.57 z’amadolari uvuye kuri miliyoni 275.12 z’amadolari.

Ikawa

Ikawa y’u Rwanda ni kimwe mu bicuruzwa byanditse izina mu mahanga ariko kuva muri Mutarama kugeza Kamena 2016, agaciro kayo kagabanutseho 9.2% ugereranyije na Mutarama –Kamena 2015. Ibi bisobanuye ko kavuye kuri miliyoni 17.15 z’amadolari kagera kuri miliyoni 15.56 z’amadolari.

Agaciro ka kilogarama imwe kavuye ku madolari 3.22 kagera ku madolari 2.63, bisobanuye ko kagabanutse ku ijanisha rya 18.2%.

Ku rundi ruhande ariko, nubwo ibyo ikawa yinjiza byagabanutse ingano y’iyoherezwa mu mahanga yiyongereyeho 10.9% iva kuri toni ibihumbi 5.32 igera kuri toni ibihumbi 5.91.

Icyayi

Iyo witegereje agaciro k’icyayi cy’u Rwanda ku isoko mpuzamahanga mu mezi atandatu ya mbere ya 2016 ukagereranya n’amezi atandatu ya mbere ya 2015, usanga karagabanutseho 5.7%, ni ukuvuga ko kavuye kuri miliyoni 38.33 z’amadolari kagera kuri miliyoni 36.14 z’amadolari.

Agaciro ka kilogarama y’icyayi mu mezi atandatu ya mbere ya 2015 kari amadolari 2.68, kagera ku madolari 2.53 mu mezi atandatu ya mbere ya 2016.

Ingano y’icyayi yoherejwe mu mahanga yaragabanutse ku ijanisha rya 0.3%, iva kuri toni ibihumbi 14.32 igera kuri toni ibihumbi 14.28.

Cassiterite

Muri rusange amabuye y’agaciro u Rwanda rwohereza mu mahanga yaragabanutse yaba mu ngano no mu gaciro. Mu mezi atandatu ya mbere ya 2016 hoherejwe amabuye angana na toni ibihumbi 3.13 zivuye kuri toni ibihumbi 3.79 mu gihe nk’iki cya 2015.

Agaciro nako kavuye kuri miliyoni 64.24 z’amadolari kagera kuri miliyoni 40.73 z’amadolari mu mezi atandatu ya mbere ya 2016. Iri gabanuka mu gaciro ringana na 36.6%.

Amabuye ya Cassiterite yavuye kuri miliyoni 20.19 z’amadolari agera kuri miliyoni 15.54 z’amadolari. Ni ukuvuga ko yagabanutse ku kigero cya 23.0%. Muri Mutarama kugeza Kamena hoherejwe toni ibihumbi 2.03, mu gihe nk’iki cya 2016 hoherezwa toni igihumbi 1.68.

Coltan

Mu mezi atandatu ya mbere ya 2016, agaciro k’amabuye yo mu bwoko bwa Coltan yoherejwe mu mahanga kagabanutseho 41.5%, ugereranyije n’amezi atandatu ya 2015. Kavuye kuri miliyoni 33.16 z’amadolari kagera kuri miliyoni 19.40 z’amadolari.

Ingano na yo yagabanutseho 21.8 % iva kuri toni ibihumbi 0.76 igera kuri toni ibihumbi 0.60. Agaciro kuri kilogarama na ko ntikasigaye inyuma kuko kilogarama imwe yavuye ku madolari 43.38 ikagera ku madolari 32.44.

Wolfram

Agaciro k’amabuye ya Wolfram kagabanutseho 46.9% mu mezi atandatu ya mbere ya 2016 ugereranyije n’igihe nk’iki cya 2015. Ibi bisobanuye ko yinjije miliyoni 5.79 z’amadolari zivuye kuri miliyoni 10.89 z’amadolari.

Kilogarama imwe y’aya mabuye yavuye ku madolari 10.95 igera ku madolari 6.76.

Impu

Agaciro k’impu u Rwanda rwohereza mu mahanga kagabanutse ku kigero cya 46.8% kava kuri miliyoni 6.24 mu mezi atandatu ya mbere ya 2015 kagera kuri miliyoni 3.32 mu mezi nk’aya ya 2016.

Ingano na yo yaragabanutse kuko yavuye kuri toni ibihumbi 4.59 ikagera kuri toni ibihumbi 3.05. Ibi bingana n’ijanisha rya 33.7%.

Ibireti

Mu bicuruzwa byose u Rwanda rwohereza ku isoko mpuzamahanga, ibireti nibyo byongereye agaciro mu buryo butangaje kuko kiyongereyeho 137.2%, kava kuri miliyoni 1.17 z’amadolari mu mezi atandatu ya mbere ya 2015 kagera kuri miliyoni 2.76 z’amadolari mu mezi atandatu ya mbere ya 2016.

Ibireti by’u Rwanda byabonye amasoko mashya harimo u Bushinwa, u Budage, u Butaliyani, Koreya y’Epfo, u Buholandi na USA.

Kawunga, imyumbati, imboga...

U Rwanda rwohereza mu mahanga ifu y’ibigori(Kawunga), iy’imyumbati, ingano n’ibindi biribwa muri Repubulika Iharanira Demokarasi ya Congo(RDC).

Agaciro k’ibi biribwa kagabanutseho 0.9% n’ingano yabyo na yo igabanukaho 5.1%.
Ibyongera kugurishwa (Re-Exports).

Hari ibicuruzwa u Rwanda rugura mu mahanga narwo rukongera kubicuruza ahandi, twavuga ibikomoka kuri Peteroli, imodoka n’izindi mashini bigacuruzwa muri RDC n’u Burundi.

Agaciro kabyo kiyongereyeho 26.7%, kava kuri miliyoni 84.78 z’amadolari mu mezi atandatu ya mbere ya 2015 kagera kuri miliyoni 107.42 mu gihe nk’iki cya 2016.
Ingano yabyo yiyongeraho 54.1%, iva kuri toni ibihumbi 69.60 bigera kuri toni ibihumbi 107.25.

Ibindi bicuruzwa

Hari ibindi bucuruzwa u Rwanda rwohereza mu mahanga bitavuzwe haruguru nabyo byatanze umusanzu ukomeye ku musaruro w’ibyoherezwa mu mahanga.

Ku rundi ruhande iyo urebye ibyatumijwe mu mahanga mu gice cya mbere cya 2016, byo byiyongereyeho 3.3%, bigera kuri miliyoni 1171.25 z’amadolari ya Amerika, zivuye kuri miliyoni z’amadolari 1134.10 mu 2015, ndetse ingano yabyo yiyongeraho 5.1%.

Mu byatumijwe mu mahanga birimo Isima, isukari, ingano n’umuceli, kuva muri Mutarama kugeza muri Kamena byatwaye miliyoni 98.3%, mu gihe nko mu 2015 mu gihe nk’iki byari bimaze gukoreshwaho miliyoni 175.1 z’amadolari.

Ubucuruzi bukorwa mu buryo busanzwe (informal trade) hamwe n’ibihugu by’abaturanyi bwazamutse 28.3%, bwinjiza miliyoni 66.2 z’amadolari mu mezi atandatu ya mbere ya 2016 avuye kuri miliyoni 51.6 z’amadolari mu gihe nk’icyo mu 2015.

Hari ingamba

Mu gikorwa cyo kumurika uko ubukungu bw’u Rwanda buhagaze mu mezi atandatu ya mbere ya 2016, Guverineri wa Banki Nkuru y’u Rwanda, John Rwangombwa yavuze ko hakwiye kwiyongera umubare w’ibyo u Rwanda rwohereza mu mahanga ku buryo agaciro k’igicuruzwa kimwe kagabanuka, ikindi kikacyunganira.

Umunyamabanga Uhoraho muri Minisiteri y’Ubucuruzi n’Inganda, Emmanuel Hategeka, yavuze ko u Rwanda rwiyemeje kwihaza mu bijyanye n’umuceli kugera mu 2018, kandi ubu hari gushorwa imari muri ubwo buhinzi, nubwo hakiri imbogamizi mu guhinga ingano.

Yavuze ko mu gukomeza kugabanya ibyo u Rwanda rutumiza mu mahanga, rukomeje gushyira ingufu muri gahunda yo gukoresha ibikorerwa mu Rwanda, ndetse leta iheruka kwemerera abashoramari kubaka uruganda rutunganya isukari mu Burasirazuba bw’u Rwanda, ruzaba rufite ubushobozi bwo kugeza ku isoko toni ibihumbi 100 ku mwaka.

Uru ruganda rwitezweho gufasha igihugu kugera ku ntego zacyo zo kwigira, by’umwihariko mu birebana n’umusaruro w’isukari y’imbere mu gihugu mu mwaka wa 2020.

Guverineri wa Banki Nkuru y’u Rwanda, John Rwangombwa yavuze ko hakwiye kwiyongera umubare w’ibyo u Rwanda rwohereza mu mahanga ku buryo agaciro k’igicuruzwa kimwe kagabanuka, ikindi kikacyunganira.

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved