Kwamamaza

Huye Mountain Coffee yahishuye ibanga rituma Kawa yayo ihogoza amahanga

Yanditswe kuya 10-09-2016 saa 10:35' na Prudence Kwizera


Kawa ihingwa mu misozi y’akarere ka Huye izwi nka Huye Mountain Coffee, imaze kuba ikimenyabose mu Rwanda n’i Bwotamasimbi kubera uburyohe bwayo, dore ko uko iminsi ishira ariko isoko ryayo rigenda ryaguka ndetse n’abanywi bayo bayirwanira.

Ubuyobozi bw’uruganda Huye Mountain Coffee buvuga bohereza Kawa mu bihugu birimo Amerika, u Bwongereza, Autriche, u Buyapani aho buri kimwe cyoherezwamo toni 10 ku mwaka, na ho izindi zirenga 18 zigasigara zicururizwa mu Rwanda.

Mu kiganiro na IGIHE, Umuyobozi Mukuru wa Huye Mountain Coffee, David Rubanzangabo yahishuye ibanga bakoresha kugira ngo Kawa yabo ikomeze guhiga izindi mu Rwanda no muhanga.

Yavuze ko usibye kuba imisozi y’Akarere ka Huye ifite ubutaka bwiza butuma Kawa ihera iryoha, na bo nk’uruganda hari byinshi bakora kugira ngo igumane uburyohe n’ubuziranenge bwayo.

Avuga ko kuri ubu basigaye batunganya Kawa bagendeye ku kagari ikomokamo, kuko basanze buri Kagari kagira Kawa ifite uburyohe bwihariye ugeraranyije n’utundi
Rubanzangabo yavuze ko icya mbere bakora ari ukwigisha abahinzi uburyo bwo kwita kuri kawa kugira ngo yere neza, bakayirinda guhura n’ubusembwa cyangwa ibyonnyi.

Icya kabiri ngo ni uko abahinzi bamaze kumenya ko Kawa igomba gusarurwa yeze neza kandi ikimara gusarurwa ikarara igeze ku ruganda ihagita itonorwa kuko ngo bitabaye ibyo ihita itangira gutakaza umwimerere wayo.

Ati “Dutunganya Kawa yasaruwe uwo munsi, kuko iyo yaraye iba yatangiye guhuguta ikazana ubusharire, abahinzi dukorana barabizi ko bagomba kutuzanira Kawa umunsi bayisaruyeho”.

Rubanzangabo yavuze ko Kawa iyo bamaze kuyishyira mu mashini ikayitonora bayireka igahuguta nyuma yaho bakayironga neza ku buryo nta murenda usigaraho noneho hagakurikiraho icyiciro cyo kuyanika no kurobanuramo itameze neza.

Ati “Uko tuyanika niko tugenda dupima ubuhehere bwayo kugeza igihe ipimye 12%, hari akuma dupimisha ku buryo nta kwibeshya kugomba kubamo”.

Nyuma yuko Kawa imaze kuma hakurikiraho icyiciro cyo kujyanaho nkeya (Echantillon) mu nzu y’ubushakashatsi (Laboratoire), ngo hasuzumwe uburyohe bwayo n’aho bugiye butandukaniye.

Icyo gihe ngo ni na bwo hahita hamenyekana niba hari inenge ifite n’aho yaba yaraturutse.

Umuyobozi mukuru wa Huye Mountain Coffee yasobanuye ko buri cyiciro Kawa inyuzwamo itunganwa gifite umukozi ugikuriye ku buryo iyo hagaragaye ko habayeho amakosa bamenya uwo babibaza.

Ati “Laboratoire niyo itubwira Kawa nziza ndetse na Kawa ifite ikibazo, iyo rero tumaze kubimenya duhita tuyishyira mu byiciro”.

Icyiciro gikurikiraho ni ukongera gutonora Kawa bwa Kabiri hakurwaho agahu k’imbere gafite ibara rya Kaki, kuyitoramo izitameze neza no kuyikaranga ndetse no kuyisya igashyirwa mu ipaki.

Gusa ngo hari abakiriya baza bifuza Kawa ikaranze ariko idaseye, abo barayihabwa ndetse nabifuza iseye bakayibona.

Rubanzangabo avuga ko gutunganya Kawa ari ibintu bisaba ubumenyi no kwitwararika kugira ngo idatakaza uburyohe bwayo. Kuri ubu ngo bafite abakozi b’inzobere bagiye kubyigira mu mahanga ndetse hakaba hari n’abandi baha akazi nyuma yo kubahugura.

Ati “Dufite abakozi babizobereye, hari uwitwa Jean Bosco Safari yamaze imyaka ine muri Amerika ahugurwa ku bijyanye no gutunganya Kawa, dufite n’abandi bakozi benshi twahuguye mbere yo kubaha akazi”.

Iyo Kawa yeze, uruganda Huye Mountain coffee rukoresha abakozi bagera kuri 400, bakora imirimo itandukanye kugira ngo Kawa ibashe kugera ku isoko ifite umwimerere wayo.

Kawa ibarizwa mu byiciro bitatu

Ubuyobozi bw’uruganda Huye Mountain Coffee buvuga ko nyuma yo kugeza Kawa muri Laboratoire abasogongezi bayo bayumva icyanga noneho igashyirwa mu byiciro bitatu bitewe nuko irutanwa.

Icyiciro cya mbere cyitwa A1 gishyirwamo Kawa iroshye kuruta izindi ari nayo yoherezwa ku masoko akomeye (Supermarkets) ya hano mu Rwanda ndetse no mu mahanga.

Ibindi byiciro bigizwe n’icya kabiri (A2) ndetse n’icya gatatu (A3) bibarizwamo Kawa yoherezwa ku masoko asanzwe yo mu Rwanda.

Usibye abakozi bazobereye muri ibi bikorwa byo gutunganya Kawa, uruganda Huye Mountain Coffee rufite n’imashini zabugenewe zifashishwa muri iyi mirimo yose.

Uruganda Huye Mountain Coffee ruhereye mu murenge wa Mbazi, mu karere ka Huye, aho bakunda kwita i Sovu, ariko Kawa rutunganya igaragara ku masoko yo hirya no hino mu gihugu ndetse no mu mahanga.

Kuri ubu ngo ikigezweho ni ukongera ubwinshi bwa Kawa ijyanwa ku isoko, ariko bikajyana no kuyirinda gutakaza umwimerere wayo.

Abanyamahanga batandukanye baza mu Rwanda kwirebera inkomoko ya kawa yabaryoheye
Abashoramari baza mu Rwanda kwirebera uko kawa y'u Rwanda itunganywa
David Rubanzangabo asobanurira abanyamahanga uburyo kawa y'u Rwanda yitabwaho
Kugira ngo kawa igumane umwimerere wayo yitabwaho buri munsi
Kawa ya Huye iba ifunze mu dupaki dutandukanye
Umukozi wa Huye Mountain Coffee, ushinzwe gufunga kawa mu dupaki

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved