Huye: Imbuto zarabuze, nke ziboneka ziragura umugabo zigasiba undi

Yanditswe na Prudence Kwizera
Kuya 17 Nyakanga 2017 saa 08:25
Yasuwe :
0 0

Bamwe mu bahahira mu isoko rya kijyambere rya Huye ndetse n’ahabacuruza imbuto, bavuga ko bahangayikishijwe n’uko ibiciro byazo bigenda bizamuka umunsi ku wundi kubera ko zabuze, bamwe muri bo bakabihuza no kuba umupaka uhuza u Rwanda n’u Burundi ufunze mu gihe hari izaturukagayo.

Ukigera mu isoko rya Kijyambere rya Huye, ubona urujya n’uruza rw’abaguzi b’ibicuruzwa bitandukanye bihagaragara.

Mu gice gicururizwamo imbuto z’amoko atandukanye zirimo, amacunga, imineke, ibinyomoro n’izindi, abazicuruza n’abazigura bavuga ko ibintu bitifashe neza muri iki gihe kuko zabuze bigatuma n’ibiciro byazo bizamuka.

Hadidja Uwimana ucuruza imbuto yagize ati “Imbuto twarazibuze ku buryo zisigaye zihenze, nk’ubu ikilo kimwe cya malakuja ni amafaranga 1200 y’u Rwanda kandi mu mezi make ashize twakigurishaga 700, Mandelena ni 1000 ku kilo kandi twazitangiraga 500, watermelon ni 2500 kandi twazigurishaga 1500, naho imyembe twayigurishaga 500 ku kilo none ubu ni 900”.

Bamwe mu bacuruza imbuto, ihenda ryazo barihuza no kuba batakibasha kujya kurangura mu guhugu cy’abaturanyi cy’u Burundi kandi n’ubashije kujyayo abuzwa kugira icyo avanayo.

Dative nawe ucuruza imbuto ati “Impamvu ibiciro by’imbuto bizamuka biterwa n’uko aho twazikuraga mu Burundi badufungiye biba ikibazo, nka malakuja, Mandelena, amacunga n’imyembe niho twabiranguraga”.

Kugeza ubu imbuto nkeya zicururizwa muri iryo soko, abacuruzi bavuga ko bazikura imbere mu gihugu mu turere twa Nyamagabe mu Ntara y’amajyepfo no muri Rusizi na Nyamasheke mu Ntara y’i Burengerazuba.

Umwe mu bahahira mu isoko rya kijyambere rya Huye witwa Denys Habarugira, we avuga ko kugura imbuto yabiretse abitewe n’uko muri iki gihe zisigaye zihenze.

Haburugira ati “Njyewe ndi mu bantu bakunda imbuto, ku buryo buri munsi mu rugo iwanjye zitagomaga kuhabura, ariko ubu nabaye ndetse ibyo kuzihaha kuko zirahenze cyane, sinzi uko tuzabigenza”.

Mu bitekerezo batanga byakemura ikibazo cy’ibura ry’ibiribwa birimo n’imbuto, bavuga ko byaba byiza abahinzi bo mu Rwanda bitaye ku guhinga imbuto ku bwinshi kugira ngo babashe kwihaza.

Uwimana ati “Abahinzi bibanda ku bishyimbo no ku bigori ariko bakirengagiza imbuto, kandi na zo zifite akamaro kanini, niyo mpamvu iyo tubikeneye bitugeraho bihenze kandi natwe twakagombye kubyihingira, kuko ubutaka byeramo turabufite”.

Ikibazo cy’ubuhahirane butameze neza hagati y’abacuruzi bo mu Rwanda n’abo mu Burundi kimaze imyaka igera kuri ibiri.

Abacuruza imbuto mu isoko rya Huye bavuga ko abaguzi bazo babuze kuko ibiciro byazo byazamutse
Bamwe mu bacuruza imbuto bavuga ko zabuze bakabihuza n'uko batakibasha kujya kurangura i Burundi
Iki ni igice gicururizwamo imbuto mu isoko rya kijyambere rya Huye
Mu isoko rya Kijyambere rya Huye ahacururizwa imbuto, muri iyi minsi nta bakiriya bahaboneka
Mu isoko rya Kijyambere rya Huye imbuto zihaboneka zirahenze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza