Kwamamaza

Hari kwigwa ku Itegeko rizajya ridohorera abahuye n’ibihombo

Yanditswe kuya 9-11-2016 saa 09:15' na Jean Pierre Tuyisenge


Umushinga mushya w’itegeko rigena imisoro itaziguye ku musaruro uri kuganirwaho mu Nteko Ishinga Amategeko, uteganya ko mu gihe umuntu yahombye mu bikorwa bye akabimenyesha inzego zirebwa atangira gusora yaramaze gukuramo igihombo yagize.

Mu gihe iri tegeko ryaba ryemejwe, ryafasha bamwe mu basoreshwa bajyaga bahura n’ibihombo bagakomeza guhangayikira uburyo bazakomeza kwishyura kandi batagikora ibikorwa byabo nkuko bisanzwe.

Uyu mushinga uteganya ko iyo ibarwa ry’inyungu zikomoka ku bikorwa by’ubucuruzi ryerekanye igihombo mu gihe cy’umusoro, ngo uwahuye n’igihombo akomorerwa ku misoro kugeza igihe amaze gukuriramo igihombo yagize. Gusa na none ngo ntibigomba kurenza imyaka itanu. Nuramuka utowe nk’itegeko, uzasimbura itegeko N° 16/2005 ryo ku wa 18 Kanama 2005 rigena imisoro itaziguye ku musaruro.

Iri tegeko riteganya ko mu gihe cy’umusoro, ibihombo bikomoka mu mahanga bidashobora gukurwa ku nyungu z’ibikorwa by’ubucuruzi bikomoka imbere mu gihugu cyangwa ngo zive ku bikorwa by’ubucuruzi .

Komiseri Ushinzwe Imisoro y’imbere mu gihugu, mu Kigo cy’Igihugu cy’Imisoro n’Amahoro, Aimable Kayigi Habiyambere wanagejeje uyu mushinga mu Nteko Ishinga Amategeko, yavuze ko iri tegeko rigamije gufasha umusoreshwa mu gihe yaba yahuye n’ibihombo.

Ati “ Ni mu rwego rwo gufasha umusoreshwa, ni ukuvuga ngo niba wari warahombye miliyoni ijana, uzatangira gusora ari uko wakuyemo igihombo wari waraguyemo mbere.”

Inteko Ishinga Amategeko y’u Rwanda iri kwiga ku ngingo zikubiye mu itegeko rigena Umusoro ku musaruro, umushinga wazanywe na Minisiteri y’Imari n’Igenamigambi ifatanyije n’Ikigo cy’igihugu cy’imisoro n’Amahoro.

Ni umushinga w’itegeko ukiri kwigirwa muri Komisiyo y’Ingengo y’Imari n’Umutungo wa Leta mu Nteko Ishinga Amategeko. Aya mategeko agamije korohereza impande zombi haba ku basora cyangwa abashinzwe serivisi zo gusoresha.

Abadepite bagize iyo komisiyo beretswe ibikubiye muri iryo tegeko bagira ibyo banenga n’ibyo bemera, ahanini bashingiye ku kuba hari ibyo basobanuraga bagasanga bitumvikana cyangwa ugasanga harimo inyandiko zagora abazisoma.

Ikigo cy’Igihugu cy’Imisoro n’Amahoro gisobanura ko hakurikijwe Itegeko nomero 16/2005 ryo ku wa Kanama 2005, umuntu wese utuye mu gihugu agomba gutanga umusoro ku musaruro ukomoka ku byo akora mu gihugu n’ibyo akorera hanze byinjiza umutungo.

Ibiganiro kuri uyu mushinga w’itegeko rigenga imisoro ku musaruro birakomeje muri iyi komisiyo, harebwa niba hari ibishobora guhindurwa, ibyavanwamo cyangwa bikanozwa kurushaho.

Kayigi avuga ko umuntu uzajya agaragaza igihombo azasonerwa imisoro kugeza ubwo ayo yahombye ayagaruje
Depite Rwaka uyoboye iyi komisiyo avuga ko bagikomeje kwiga kuri uyu mushinga no kunoza ibitameze neza kugira ngo ube wagirwa itegeko

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved