Mifotra yasobanuye igituma umushahara fatizo umaze imyaka 42 utongerwa

Yanditswe na Uwishyaka Jean Louis
Kuya 25 Ukwakira 2016 saa 03:16
Yasuwe :
0 0

Amashyirahamwe aharanira uburenganzira bw’abakozi mu Rwanda yakunze kugaragaza kenshi ko ubuke bw’umushahara fatizo ku bakozi bo mu Rwanda ari ikibazo gikomereye abaturage, bitewe n’uko ngo kuba utagendanye n’igihe igihugu kigezemo, bituma abakozi n’imiryango yabo babaho mu buzima bubi.

Itegeko u Rwanda rugenderaho ubu, ni iryo mu 1974, rigena amafaranga 100 ku munsi nk’umushahara fatizo mpuzandengo ku mukozi wo mu Rwanda.

Mu kiganiro n’abanyamakuru cyabaye ku wa mbere tariki ya 24 Ukwakira 2016,ubwo hasobanurwaga iby’ubukangurambaga bwa NEP- Kora Wigire buzamara ukwezi, Minisitiri w’ Abakozi ba Leta n’Umurimo, Judith Uwizeye, yatangaje ko Leta itigeze inanirwa gushyiraho umushahara fatizo nk’uko bamwe babivuga, ahubwo ko ikibazo kikirimo ari amategeko akivugururwa kugira ngo abakora imirimo itanditse nabo rizabe ribareba.

Ati” Iby’umushahara fatizo maze iminsi mbyumva mu itangazamakuru, reka nongere mbisubiremo. Gushyiraho umushahara fatizo si uko byatunaniye. Ntabwo byigeze binanira Leta y’u Rwanda gushyiraho umushahara fatizo, ikibazo kirimo twakomeje kubasobanurira ngira ngo nongere nsubiremo ni icy’amategeko.Umushahara fatizo ugomba kuba ureba abantu bose baba abakora imirimo yanditse, baba no ku bakora imirimo itanditse."

Minisitiri Uwizeye yavuze ko iri tegeko rigenga umurimo mu Rwanda riri mu nzira yo kwemezwa, hakazakurikiraho gushyiraho umushahara fatizo ariko n’abakora imirimo itanditswe barimo.

Umushahara fatizo ni amafaranga umukozi adashobora kujya munsi mu kazi ako ariko kose, ku buryo umukoresha ubikoze afatwa nk’uwarenze ku mategeko. Icyakora kuyarenza byo ntibibujijwe.

Kuba umushahara fatizo ukiri hasi bifite ingaruka ku igenwa ry’imishahara, indishyi mu bigo by’ubwishingizi ndetse no kuvugurura itangwa ry’ubwishingizi mu bagiye mu kiruhuko cy’izabukuru.

Minisitiri Uwizeye avuga ko guhindura umushahara fatizo bitananiranye, ahubwo ngo ni amategeko akinozwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza