00:00:00 IGIHE NETWORK KN KINYARWANDA EN ENGLISH FR FRANCAIS

Guverinoma igiye kongera miliyoni 350$ mu Kigega Nzahurabukungu

Yanditswe na Akayezu Jean de Dieu
Kuya 19 Kamena 2021 saa 10:10
Yasuwe :
0 0

Hashize amezi 15 arengaho iminsi itanu, ibikorwa bya buri munsi by’Abanyarwanda bihungabanyijwe n’icyorezo cya Covid-19, cyatumye bimwe mu bikorwa by’ubucuruzi n’ibindi by’abikorera bifunga imiryango, ibindi bisigara bigenda biguruntege.

Iki cyorezo giterwa n’agakoko gashya ka Coronavirus cyageze i Kigali ku wa 14 Werurwe 2020. Kuva ubwo u Rwanda rwihutiye gutangira gutekereza uburyo bwo guhangana nacyo hirindwa ikwirakwira ryacyo hashyirwaho ingamba zirimo gufunga mu buryo bw’agateganyo ibikorwa bitandukanye.

Mu bikorwa byahise bifungwa nk’uko byakorwaga hirya no hino ku Isi, harimo imipaka na bumwe mu bucuruzi bwambukiranya imipaka, amahoteli, ibikorwa by’ubukerarugendo n’ibindi byinshi byinjirizaga akayabo abikorera na’igihugu muri rusange.

Muri Kamena 2020, Guverinoma y’u Rwanda yashyizeho Ikigega Nzahurabukungu [Economic Recovery Fund, ERF], cyahise gishyirwamo miliyoni 100$. Muri Werurwe 2021, Minisitiri w’Intebe, Dr Ngirente Edouard, yabwiye abagize Inteko Ishinga Amategeko ko uyu mwaka uzarangira gishyizwemo miliyari 370 Frw.

Icyo gihe, Minisitiri w’Intebe yavuze ko iki kigega cyashyizweho kugira ngo gifashe ibikorwa by’ubucuruzi bibashe kuzanzamuka, abikorera bongere gusubukura ibikorwa byabo, babungabunge umurimo, bityo bafashe mu gukumira ingaruka z’iki cyorezo ku bukungu bw’u Rwanda.

Icyo gihe Urwego rw’Inganda, izitunganya umusaruro [Manufacturing] zari zimaze guhabwa miliyoni 955 Frw. Byari biteganyijwe ko umwaka wa 2021 uzarangira, urwego rw’inganda rwongewemo asaga miliyari 150 Frw.”

Ikigega cyari kigamije gufasha mu kuzahura ibikorwa by’abikorera byose byagizweho ingaruka n’ingamba zashyizweho mu kwirinda ikwirakwira rya Coronavirus.

Mu kiganiro cyihariye yagiranye na IGIHE, Minisitiri w’Ubucuruzi n’Inganda, Habyarimana Béata, yavuze ko iki kigega cyaje gikenewe cyane ko nk’abikorerera mu rwego rw’amahoteli, ubwo icyorezo cyageraga mu Rwanda imipaka yahise ifungwa bityo ibikorwa by’inama cyangwa kwakira abashyitsi baza kuraramo birahagarara.

Ati “Ni ikigega navuga ko cyaziye igihe, kuko cyaraje amafaranga cyari gifite navuga nti ubu yose yarakoreshejwe, hari menshi yagiye mu bijyanye n’amahoteli no kwakira abantu kuko ni rumwe mu nzego z’ubucuruzi zahise zihungabana ku buryo bukomeye kubera ifungwa ry’imipaka.”

Umuyobozi Mukuru w’Urwego rw’Abikorera mu Rwanda, PSF, Robert Bapfakurera yabwiye IGIHE ko aya mafaranga yafashije cyane by’umwihariko abayahawe kuko iki cyorezo cyari cyarabashegeshe ku rwego rukomeye.

Ati “Nk’amahoteli ni yo yabonye cyane amafaranga abafasha koroshya inguzanyo bafashe ku buryo ayo babahaye babongereye imyaka yo kuzishyura igera kuri 15 ndetse babaha hafi imyaka itatu ntacyo bishyura ari inyungu ku nguzanyo ari n’amafaranga yo kwishyura banki.”

Yakomeje agira ati “Abayabonye bose yabagiriye akamaro ku buryo ubu, amahoteli yayabonye nta kibazo afitanye n’amabanki. Hari n’andi mafaranga batanze mu bandi basanzwe agera kuri miliyoni 300 Frw, ayo nayo abayabonye yarabafashije kugira ngo bakomeze bakore mu gihe bari baramaze igihe kinini muri Covid-19 badakora.”

Hagiye kongerwamo izindi miliyoni 350$

Minisitiri w’Ubucuruzi n’Inganda, Habyarimana Beata, yavuze ko amafaranga yose yari yarashyizwe muri iki kigega yamaze gushira, hagiye gushyirwamo andi agera kuri miliyoni 350$.

Ati “Twavuga ko kubera ko ubu aya mafaranga yaje mu gihe gikenewe, Guverinoma iteganya kongeramo miliyoni zigera kuri 350$, ku buryo zabasha kuba zazahura ubucuruzi bwo hirya no hino.”

Mu kwezi gushize, Amashuri Makuru na Kaminuza yigenga yasabye Minisiteri y’Uburezi gushyiraho uburyo bwo kohereza muri izo kaminuza abanyeshuri barihirwa na Leta nka bumwe mu buryo bwo kuzifasha kwikura mu ngaruka zasigiwe n’icyorezo cya Covid-19.

Mu byasabwaga n’abayobora kaminuza zigenga harimo kuba bakoroherezwa kugira ngo nazo zibashe kwisanga mu bafashwa binyuze muri icyo kigega kuko by’umwihariko urwego rw’uburezi narwo rwazahajwe na Covid-19.

Minisitiri Habyarimana yavuze ko mu biteganywa gukorwa na Guverinoma harimo kwagura ababasha gufashwa binyuze muri iki kigega kuko byagiye bigaragara ko hari inzego nyinshi zashegeshwe na Covid-19.

Ati “Duteganya kwagura ababasha kugira uburenganzira kuri icyo kigega kuko twagiye tubona ko n’abandi batandukanye bagiye bahungabanywa n’iki cyorezo. Twabonye ko kibafitiye akamaro kandi miliyoni 350$ zagira icyo zifasha ku bagiye bagira ibibazo mu bihe bya Covid-19.”

Ubusabe bwa benshi bugiye gusubizwa

Minisitiri Habyarimana avuga ko ubwo iki kigega cyashyirwagaho bitabaye ngombwa ko abikorera cyangwa abacuruzi bose babasha gufashwa bikinyuzemo, ariko ahanini byatewe n’ubushobozi bw’ikigega n’uburemere bw’ingaruka Covid-19 yagiye igira kuri buri muntu.

Ati “Birumvikana ko uko iki kigega cyagiyeho, habanje gusuzumwa ngo ni bande bahungabanye ku buryo bukomeye nk’uko byahereye ku mahoteli n’abafite ubucuruzi busanzwe, mu gihe cyose bigaragara ko afite igice cyahungabanyijwe no kuba amabwiriza yo kurwanya Covid-19 yaratumye atabasha kwinjiza amafaranga yagombaga kwinjiza mu bucuruzi busanzwe bw’ubucogocogo cyangwa se bwo kurangura no guhereza abantu.”

Yakomeje agira ati “Ni ukuvuga ngo serivisi n’ibicuruzwa ariko ntabwo babaye bose. Ntabwo babaye bose bitewe n’ingano y’ikigega bitewe kandi n’uburyo ubukana bwagiye bugera kuri bamwe no ku bandi.

Minisitiri Habyarimana yavuze ko kuri ubu hari ibikorwa byo kunonosora urutonde rw’abazaherwaho bahabwa iyi nguzanyo muri iki kigega ku buryo mu bihe biri imbere abanyarwanda bazabimenyeshwa.

Ku rundi ruhande ariko, amakuru IGIHE yahawe na Bapfakurera uyobora PSF, ko amashuri makuru na za Kaminuza zigenga, abafite ibigo bitwara abantu mu buryo bwa rusange, ari bimwe mu byiciro byongerewe mu bagomba guhabwa iyi nkunga binyuze muri iki kigega.

Ati “Amashuri yamaze igihe kinini adakora ariko aho yatangiriye nayo bayageneye amafaranga abafasha, ubu batangiye kugana amabanki barimo barabafasha, ndetse n’abatwara abagenzi mu buryo bwa rusange nabo babahaye nyuma ariko babahaye amafaranga abafasha.”

Bapfakurera avuga ko abayahawe basabwa kuyakoresha neza kandi bagakora neza kandi n’abatarayabona nabo bagakomeza gutegereza kuko leta iri gutekereza uburyo bwo kubafasha nabo.

Mu zindi ngamba guverinoma ikomeje gushyiraho mu kuzahura ubukungu bwazahajwe na Covid-19, harimo gusonera ibigo bimwe na bimwe umusoro ku nyongeragaciro ku bikoresho by’ubwubatsi bitaboneka mu bihugu bigize umuryango wa Afurika y’Iburasirazuba (EAC).

Guverinoma kandi yashyizeho uburyo bwo gusonera umusoro ku bikoresho by’ubwubatsi byakorewe mu Rwanda n’inkunga y’umusoro utangwa ku mushahara w’abakozi (PAYE) ku bakozi bashya bahawe akazi ndetse no kugabanyirizwa umusoro ku byoherezwa mu mahanga.

Izi ngamba hamwe n’izindi zitandukanye nizo zafashije kuba mu minsi ishize, Ikigo cy’Igihugu cy’Ibarurishamibare,NISR, cyaratangaje ko ubukungu bw’igihugu bwazamutse mu gihembwe cya mbere cy’uyu mwaka, kuko umusaruro mbumbe w’u Rwanda wazamutseho 3,5%, ukagera kuri miliyari 2.579 Frw uvuye kuri miliyari 2.410 Frw mu gihembwe nk’icyo cy’umwaka ushize.

Minisitiri w'Ubucuruzi n'Inganda, Habyarimana Béata, yavuze ko abikorera bitabiriye Ikigega Nzahurabukungu ari nayo mpamvu leta igiye kongeramo andi mafaranga
Minisitiri w'Intebe, Dr Ngirente Edouard, aherutse gutangaza ko inganda zizongererwa miliyari 150 Frw zo kuzahura ubukungu
Urwego rw'Inganda ni rumwe mu zahawe umwihariko mu Kigega Nzahurabukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .