00:00:00 IGIHE NETWORK KN KINYARWANDA EN ENGLISH FR FRANCAIS

Guteza imbere inganda, ikoranabuhanga no kongerera ubushobozi abakozi- Ipfundo ry’iterambere ry’u Rwanda mu mboni z’abahanga

Yanditswe na Muhonzire Sylvine
Kuya 26 Kanama 2021 saa 10:20
Yasuwe :
0 0

Kuba u Rwanda ari kimwe mu bihugu 44 bidakora ku nyanja ku Isi kandi gituye muri Afurika yo munsi y’ubutayu bwa Sahara, ni imwe mu mbogamizi ikomeye ituma ubukungu budatera imbere byihuse kubera ko rutigerera ku byambu ahubwo ibicuruzwa bije cyangwa bivuye mu gihugu bikabanza guca mu kindi.

Nubwo ubuhahirane hagati y’u Rwanda n’ibindi bihugu by’amahanga bushobora guhenda kubera kudakora ku mazi, birashoboka ko rwaba kimwe mu bihugu bikize bidakora ku nyanja nk’u Busuwisi, Luxembourg cyangwa Autriche.

Mu kiganiro cyabaye hifashishijwe ikoranabuhanga cyatanzwe n’inzobere mu bukungu, Prof Kuroiwa Ikuo wo muri Kaminuza ya Niigata mu Buyapani, ku bufatanye na Kaminuza y’u Rwanda n’Ikigo cy’Ubutwererane mpuzamahanga cy’Abayapani (JICA), kibanze ku ngamba zashyirwa mu bikorwa n’ibihugu byo muri Afurika yo munsi y’ubutayu bwa Sahara, kugira ngo bitere imbere cyane ibidakora ku nyanja nk’u Rwanda.

Prof. Kuroiwa yavuze ko impamvu z’ingenzi zizitira ibi bihugu mu kugera ku iterambere rirambye ko ari uruhare ruto bigira mu Isi y’ubucuruzi mpuzamahanga, aho usanga nta bicuruzwa byinshi byoherezwa hanze, bitorohereza abashoramari, bikagira ubuyobozi bubi, imishinga idateye imbere ndetse n’abaturage badafite ubumenyi buhagije bwo gukora.

Yakomeje agira ati “Kugira uruhare mu Isi y’ubucuruzi mpuzamahanga byongera amahirwe yo kuzamura urwego rw’ibyoherezwa mu mahanga, ikindi bigateza imbere ikoranabuhanga binyuze mu bufatanye bw’ibigo bifite inararibonye mu ikoranabuhanga.”

Kugira ngo ibi bihugu bigire uruhare rugaragara mu bucuruzi mpuzamahanga, Prof Kuroiwa yavuze ko bigomba gushyiraho ingamba zitanga ibisubizo ku bukungu.

Ati “Koroshya ubuhahirane hagati y’ibihugu, bikagirana amasezerano yo kugabanya imisoro ku bicuruzwa bitumizwa hanze, guteza imbere ibikorwaremezo by’ingendo, gushyiraho agace runaka gafite umwihariko mu bijyanye n’ubucuruzi, ndetse no gushyiraho imikoranire hagati y’mishinga ni iby’ingenzi byatuma ibihugu bigaragara mu Isi y’ubucuruzi mpuzamahanga.”

Ku ruhande rw’ibihugu bidakora ku nyanja, iyi nzobere yavuze ko bigomba gushyira ingufu mu guteza imbere inganda, ikoranabuhanga no kugirana imibanire ndetse imikoranire myiza n’ibihugu by’ibituranyi.

Yagize ati “Imikoranire myiza n’ibihugu by’ibituranyi bigira akamaro kanini cyane mu bucuruzi mpuzamahanga, by’umwihariko ku bihugu bito nk’u Rwanda kandi bidakora ku nyanja […] ni iby’ingenzi kandi ko byita ku bikorwa byarumukira amahanga nk’ikoranabuhanga cyangwa ubukerarugendo.”

Dr Murigande Charles wahoze ari Umuyobozi wungirije wa Kaminuza y’u Rwanda ushinzwe Iterambere, wari mu bitabiriye ikiganiro yavuze ko u Rwanda ruri mu nzira nziza mu bijyanye no kugera ku iterambere.

Ati “Ndatekereza ko u Rwanda rufite byinshi byo kwiga nkurikije iri somo ryatanzwe, gusa icyo ntekereza ni uko ruri mu nzira yarwo iruganisha ku iterambere. Turi igihugu gito ariko amahirwe tugira nuko Perezida wacu yashyize imbaraga mu mikoranire myiza n’ibihugu bya Afurika nko gushyiraho isoko rusange ryayo ‘AfCFTA’.”

Yakomeje avuga ko u Rwanda rufite byose ngo rugere ku iterambere birimo ubuyobozi bwiza, umutekano ndetse no korohereza abashoramari.

Ibihugu 5 muri 44 bidakora ku nyanja ku Isi nibyo bikize cyane, aho bifite umusaruro mbumbe urenze miliyari 120$. Gusa nta na kimwe cyo muri Afurika kirimo.

Guteza imbere inganda n'ikoranabuhanga ni bimwe mu byatuma u Rwanda rutera imbere nk'igihugu kidakora ku nyanja
Ni ikiganiro cyari cyitabiriwe n'abantu batandukanye muri Kaminuza y'u Rwanda
Prof Kuroiwa Ikuo yavuze ko ibihugu bito nk'u Rwanda kandi bidakora ku nyanja nabyo bishobora gukira bishyizeho ingamba zizamura ubukungu kandi bikagirana imibanire myiza n'ibituranyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .