00:00:00 IGIHE NETWORK KN KINYARWANDA EN ENGLISH FR FRANCAIS

Energicotel yashyize ku isoko ry’imari n’imigabane impapuro mpeshamwenda za miliyari 6.5 Frw

Yanditswe na Ndahayo Emmanuel
Kuya 9 Kanama 2021 saa 11:47
Yasuwe :
0 0

Ikigo gitanga serivisi z’amashanyarazi, Energicotel (ECTL) Plc, cyandikishikije impapuro mpeshamwenda zifite agaciro ka miliyari 6.5 Frw ku isoko ry’Imari n’Imigabane ry’u Rwanda (RSE), kiba ikigo cya mbere gikora mu rwego rw’ingufu n’amashanyarazi cyanditswe kuri iri soko.

Energicotel kandi yabaye ikigo cya gatatu cyigenga kigurishije impapuro mpeshamwenda kuri iri soko, nyuma ya I&M Bank yabikoze mu 2009 ndetse n’Ikigo Mpuzamahanga gishinzwe ubufatanye mu by’Imari (IFC).

Kuri ubu, Energicotel ni cyo kigo cyonyine cy’abikorera gifite impapuro mpeshamwenda ku isoko ry’imari n’imigabane, kuko izindi ziriyo ari iza Leta.

Iki kigo kandi ni cyo cya mbere kibarizwa mu bigo bito n’ibiciriritse (SMEs) cyanditswe kuri iri soko. Izi mpapuro zizamara imyaka 10, mu gihe inyungu yazo izaba iri kuri 13.75 ku mwaka. Iyi nyungu iri hejuru y’impapuro zitangwa na Leta, zikunze kungukira kuri 11% cyangwa 12% bitewe n’igihe zizishyurirwa.

Icyiciro cya mbere cy’impapuro mpeshamwenda cyamaze kugurishwa ku kigero cya 100%, ndetse byitezwe ko mu mezi atandatu ari imbere, ikindi cyiciro cy’izi mpapuro kizajya ku isoko.

Miliyari 3.4 Frw muri miliyari 6.5 Frw, azashorwa mu bikorwa byo kwishyura ideni Energicotel ifite muri banki, mu gihe andi agera kuri miliyari 3 Frw azakoreshwa mu bikorwa by’ishoramari ry’iki kigo.

Ibigo bya Leta birimo ikigo cy’Ubwiteganyirize, RSSB, ndetse n’Ikigega cya Agaciro Development Board, biri mu mu bigo byamaze kugura 80% by’impaparo mpeshamwenda hagamijwe inyungu z’abakiliya babyo, mu gihe ingana na 20% by’izi mpapuro byaguzwe n’abashoramari bagamije inyungu zabo bwite.

Inyungu ku bashoramari irizewe

Umuyobozi Mukuru wa Energicotel, Ferdy Turasenga, yavuze ko ikigo ayoboye gifite icyizere cyo kuzakomeza kunguka mu myaka iri imbere, ku buryo kizashobora kwishyura abashoramari mu buryo bwizewe.

Uyu muyobozi yavuze ko iki cyizere agishingira ku miterere y’isoko, na cyane ko amashanyarazi azakomeza gukenerwa mu Rwanda mu myaka iri imbere.

Ati "Kimwe mu byo aya mafaranga azakora harimo kwagura ibikorwa byacu, ku buryo tuzagira uruhare muri gahunda ya Leta yo kugeza amashanyarazi ku Banyarwanda bose bitarenze mu mwaka wa 2024."

Uretse isoko ry’u Rwanda, Energicotel irateganya gukomeza kwagukira ku yandi masoko ya Afurika arimo irya Repubulika Iharanira Demokarasi ya Congo.

Iki kigo kandi kizakoresha aya mafaranga cyabonye mu ishoramari ryo kwagurira ibikorwa byacyo mu bindi bihugu birimo Kenya, aho bari kwitegura kubaka urugomero rutanga megawatt eshatu. Ku rundi ruhande, urugomero rw’iki kigo ruri muri Zimbabwe, rutanga megawatt eshanu ruzagurwa rujye rutanga megawatt 25.

Turasenga yavuze ko ishoramari ry’iki kigo ku rwego mpuzamahanga rizashingira ku ishyirwa mu bikorwa ry’amasezerano y’isoko rusange rya Afurika, na cyane ko uyu Mugabane ugikeneye ibikorwaremezo by’amashanyarazi bizahaza abaturage miliyoni 600 bakiri mu mwijima.

Yahereye kuri iyi ngingo avuga ikigo ayoboye kiteguye gukomeza kubyaza umusaruro aya mahirwe, ati "Ndizeza abashoramari bacu ko inyungu ya 13.75% bazakomeza kuyihabwa buri gihe, twizeye gukomeza kwagura ibikorwa byacu uko amasezerano y’isoko rusange azakomeza gushyirwa mu bikorwa."

Munisitiri w’Ibikorwaremezo, Claver Gatete, yavuze ko ari iby’agaciro kubona abashoramari mu rwego rw’ingufu n’amashanyarazi batangiye kugana isoko ry’imari n’imigabane, avuga ko "Ishoramari bazahakura, yaba mu buryo bw’impapuro mpeshamwenda ndetse n’ubwo kugurisha imigabane, bizagira uruhare mu iterambere ry’urwego rw’ingufu mu Rwanda, bikazadufasha kubaka iterambere rirambye no kugeza amashanyarazi kuri bose."

Umuyobozi Mukuru w’Isoko ry’Imari n’Imigabane, Celestin Rwabukumba, yavuze ko kuba Energicotel yarahisemo uburyo bwo kugurisha impapuro mpeshamwenda mu rwego rwo kubona igishoro, ari intambwe nziza n’ibindi bigo bikwiriye kwigiraho.

Ati "Energicotel ikwiye kuba isomo ku bindi bigo bito n’ibiciriritse kuko hari amahirwe y’uko bishobora kubona igishoro kidaturutse gusa muri banki, ahubwo bakaba bakwifashisha ubundi buryo burimo kugurisha imigabane ndetse n’impapuro mpeshamwenda."

Energicotel ni ikigo cyunguka neza kuko mu mwaka ushize, cyabonye inyungu ya miliyoni 303 Frw, mu gihe mu 2019, cyari cyinjije miliyoni 248 Frw, ari byo Rwabukumba yahereyeho avuga ko iki kigo "gifite amahirwe yo gukomeza kwagura ibikorwa ndetse no kongera inyungu."

Kuva mu 2015, Leta y’u Rwanda yagiranye amasezerano na Energicotel y’imyaka 25, yo kugenzura ingomero zirimo urwa Keya, Nkora na Cyimbili, zitanga megawati 3,2 z’amashanyarazi. Mu 2020, izi ngomero zatanze kilowate miliyoni 17 z’amashanyarazi ku muyoboro mugari w’igihugu. Energicotel PLC isanzwe ari umunyamuryango w’ikigo cya EPC Africa Group.

Iki kigo kandi gifite indi mishinga izatanga amashanyarazi kiri kwitegura gushoramo imari mu minsi iri imbere, yose izaba iri mu cyiciro cy’ingufu zisubira.

Iyi mishinga igeze ku byiciro bitandukanye ishyirwa mu bikorwa, yitezweho kuzatanga megawatt 50 niramuka itangiye kubyara umusaruro.

Imwe muri iyo mishinga irimo uwubatse ku Kiyaga cya Kivu n’ingomero mu bihugu birimo Kenya, Repubulika Iharanira Demokarasi ya Congo ndetse n’imishinga ishingiye ku mirasire y’izuba irimo iri muri Zimbabwe na Malawi.

Ku rundi ruhande, iki kigo cyatumye amafaranga amaze kwakirwa n’ibigo byanditswe ku isoko ry’imari n’imigabane ry’u Rwanda agera kuri miliyari 1.5$.

Uyu muhango wabaye hubahirizwa ingamba zo kwirinda ikwirakwira ry'icyorezo cya Covid-19
Energicotel yamaze kugurisha impapuro mpeshamwenda mu cyiciro cya mbere, bikaba byitezwe ko icyiciro cya kabiri kizajya ku isoko mu mezi atandatu ari imbere
Minisitiri w'Ibikorwa remezo, Claver Gatete, niwe wari umushyitsi mukuru ndetse niwe wafunguye ku mugaragaro ibikorwa byo gushyira impapuro mpeshamwenda ku isoko ry'Imari n'imigabane
Umuyobozi w'Isoko ry'Imari n'Imigabane ry'u Rwanda, Celestin Rwabukumba, ari kumwe na Minisitiri w'Ibikorwa remezo, Claver Gatete, yavugije inzogera ifungura icuruzwa ry'imigabane muri iki cyumweru
Abacuruza imigabane bahise batangira akazi kabo nyuma y'uko Energicotel ishyize impapuro mpeshamwenda kuri iri soko
Abagize uruhare mu kwandikisha Energicotel ku Isoko ry'Imari n'Imigabane, bafashe ifoto y'urwibutso, bahanye intera ya metero mu rwego rwo kwirinda ikwirakwira ry'icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .