EAC isanga guca caguwa bidakwiye kuba intandaro yo gukurwa muri gahunda y’ubucuruzi ya AGOA

Yanditswe na Mukaneza M.Ange
Kuya 15 Nyakanga 2017 saa 08:48
Yasuwe :
0 0

Bimwe mu bihugu bigize Umuryango wa Afurika y’Uburasirazuba (EAC), birimo u Rwanda, Uganda na Tanzania byatangaje ko umugambi wabyo wo guca imyenda yambawe benshi bita cagawu bidakwiye kuba intandaro yo gukurwa muri gahunda y’ubucuruzi yashyizweho na Leta Zunze Ubumwe za Amerika izwi nka AGOA.

Iyi gahunda ya AGOA (African Growth and Opportunity Act) yemejwe na Perezida Bill Clinton mu 2000, iheruka kongererwa igihe ikazarangira mu 2025, ihuriwemo n’ibihugu 38 birimo n’u Rwanda.

Iha amahirwe ibihugu bitandukanye byo muri Afurika yo munsi y’ubutayu bwa Sahara yo gukorana ubucuruzi na Amerika, ibicuruzwa bikorerwa muri ibyo bihugu bifungurirwa amayira nta musoro. Ibyo ni nk’imyenda, Ikawa, ibiribwa n’ibindi bikomoka ku buhinzi.

Muri Werurwe 2017, Ihuriro Smart (The Secondary Materials and Recycled Textiles Association), ryashyikirije Minisiteri y’Ubucuruzi muri Amerika ubusabe bw’uko u Rwanda, Tanzania na Uganda na Kenya bishyirwa ku rutonde rw’ibitemerewe kungukira muri gahunda ya AGOA.

Mu nama bagiranye n’abayobozi ba Amerika kuwa Kane, abahagarariye ibi bihugu uko ari bitatu bagaragaje ko batemeranywa n’Ikigo cy’ubucuruzi gisaba ko byakurwa mu byemerewe kungukira muri AGOA.

Umunyamategeko wa Smart, Lawrence Bogard yavuze ko EAC niramuka iciye caguwa, abari muri iri huriro bazahura n’igihombo gikomeye haba mu kubura akazi, no mu mafaranga yinjizwa.

Bogard yavuze ko nubwo Kenya iherutse gukomorerwa nyuma yo koroshya ibijyanye no guca caguwa, nayo ikwiye kugira ibyo ikurirwaho muri gahunda ya AGOA, kugeza ubwo igaragaje neza aho ihagaze.

Kenya ni kimwe mu bihugu bishobora guhura n’igihombo gikomeye igihe EAC yabaye ikuwe muri AGOA, dore ko nko mu mwaka ushize yacuruje ku isoko rya Amerika imyambaro ifite agaciro ka miliyoni 394 z’amadolari, mu gihe u Rwanda, Tanzania na Uganda byo byacurujeyo ibingana na miliyoni 43 z’amadolari.

Abari bahagarariye Amerika muri ibi biganiro byamaze hafi amasaha atatu, bakunze kugaruka kuri gahunda ya perezida Donald Trump, yo gushyira imbere inyungu z’iki gihugu.

Nk’uko The EastAfrican yabyanditse, Constance Hamilton wari uhagarariye Minisiteri y’ubucuruzi n’abandi bayobozi muri guverinoma ya Amerika bagaragaje ko batumva neza uburyo ibihugu bya EAC bivuga ko kongera imisoro kuri caguwa mu gihe cy’imyaka itatu bitandukanye no kuyica.

Hamilton kandi yagarutse ku Rwanda, arusaba gusobanura uburyo iyongerwa ry’imisoro kuva ku $0.20 kugera ku madolari 2.50 ku kilo bitanyuranyije n’amategeko agenga Umuryango mpuzamahanga w’Ubucuruzi, WTO; uwari uruhagarariye asubiza ko iri zamurwa rizamara umwaka umwe gusa.

Umwe mu bari bahagarariye Uganda we yagaragaje ko iki gihugu na Tanzania bitigeze bizamura imisoro kuri caguwa, ahubwo ko icyo byakoze ari ukuyivugurura ikava ku madolari 0.20 ikagera kuri $0.40.

Minisitiri w’Ubucuruzi muri Uganda akaba anayobora Inama y’abaminisitiri ba EAC, Amelia Kayambadde yasobanuye ko ibihugu bigize uyu muryango byafashe gahunda yo guca caguwa nk’inzira yo guteza imbere inganda z’imyenda zabyo.

Yagize ati” Guteza imbere inganda ni imwe mu nkingi z’ingenzi EAC yubakiyeho. Abakuru b’ibihugu bafashe umwanzuro ko gukora imyenda n’inkweto bikwiye gushyirwa ku mwanya w’imbere.”

Guteza imbere inganda zikora imyenda n’impu muri EAC byitezweho guhanga imirimo myinshi, iruta kure ishobora gutakara nyuma yo guhagarika ikurwa hanze ry’imyenda ya caguwa.

Si EAC ishobora guhombera mu kubuzwa amahirwe yo kohereza imyenda muri Amerika bahabwaga na AGOA, ahubwo n’inganda z’Abanyamerika zikorera muri ibi bihugu zizabihomberamo.
683|left>

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza