Depite Uwamariya yazamuye ikibazo cy’ubutaka buhingwa bugenda bumarwa n’imiturire

Yanditswe na Evariste Nsengimana
Kuya 10 Gicurasi 2018 saa 07:57
Yasuwe :
0 0

Uduce dutandukanye, cyane cyane uturi mu nkengero z’imijyi nk’uwa Kigali, dukomeje kubakwaho inzu, akenshi bikorwa n’abavuye mu mujyi, bakibasira ubutaka bugenewe ubuhinzi.

Imibare igaragaza ko Abanyarwanda basaga 70 % batunzwe n’ubuhinzi bubumbatiye 30 % by’ubukungu bw’igihugu, barimo ababukora cyangwa abakora imirimo ibushingiyeho ariko hari ikibazo cy’ubutaka buto n’ubuhari bukaba buri kugenda bwubakwaho.

Ku wa 7 Gicurasi 2018, ubwo Minisiteri y’Ubuhinzi n’Ubworozi (MINAGRI) n’abadepite bagize Komisiyo y’Ingengo y’Imari n’Umutungo by’Igihugu basesenguraga imbanzirizamushinga y’itegeko rigena ingengo y’imari ya Leta ya 2018/2019 n’imibare y’ikigereranyo cy’iya 2018/19 na 2020/21, Depite Uwamariya Devota yongeye kugaragaza ko hakenewe ingamba zihamye ku butaka bugenewe ubuhinzi bukomeje kubakwaho.

Yagize ati “Ku mikoranire ya Minagri na Mininfra, by’umwihariko Ikigo cy’igihugu gushinzwe imiturire, aho usanga ubutaka bwo guhinga burimo kugenda budushiraho bwubakwaho. Nkabaza nti, ‘ese mwaba mwaramaze kubarura ubutaka bwo guhingwa ku buryo bwakomwa ntibukomeze kugenda bushira bwubakwaho?’”

Mu magambo make, Minisitiri w’Ubuhinzi, Mukeshimana Gérardine, nta cyo yavuze cyihariye ku ngamba zo gukumira ko ubutaka buhingwa butakomeza kumarwa n’imiturire; yibanze ku kubyaza umusaruro mwinshi ubuto buhari.

Yagize ati “Tuzanibanda ku ikoranabuhanga ryongera umusaruro, cyane cyane ngira ngo twaberetse ko hafi 30 % by’abahinzi baba bafite ubutaka buto cyane. Ikoranabuhanga rero ryo kongera umusaruro ku buso buto nazo zirimo.”

Si ubwa mbere ikibazo cy’ubutaka buhingwa kigaragajwe nk’igihangayikishije; mu Ukwakira 2017 mu mwiherero w’abakora mu nzego zo guteza imbere imijyi n’imiturire, haganiriwe ku ngamba zafatwa kugira ngo imyubakire idakomeza gutwara ubutaka bwinshi bwagenewe guhingwaho.

Umukozi wa Minisiteri y’ubuhinzi ushinzwe ikoranabuhanga, Niyonsaba Evergiste, yari yavuze ko uburyo abantu bakomeje kubaka cyane cyane mu nkengero z’Umujyi wa Kigali biteye inkeke ku buryo hadafashwe ingamba ubutaka bwo guhinga bwasigara ari buke.

Yagize ati “Ahenshi berekeza ahari ubutaka buhingwa. Dukurikije ibarura twakoze, twasanze ubutaka bugenda bushira vuba vuba. Dufashe nk’amakuru ikigo cy’ubutaka cyaduhaye, hari ubutaka bwari bugenewe guhingwa, dusubiyeyo mu Mujyi wa Kigali nyuma y’imyaka ibiri muri Gasabo ubutaka bungana na 26,6 % twasanze bumaze kubakwaho kandi bwari bugenewe guhingwa, Nyarugenge ho hagiye 9.6 %, Kicukiro ho hagiye 70.5 % noneho tugera no muri Bugesera kandi urabona ko ari mu cyaro dusanga hagiye 11.7 %.”

Minisiteri y’ibikorwaremezo yatanze igisubizo ko hari gahunda yo gutuza abantu benshi ku butaka buto, akaba ari yo bazifashisha barengera ubuhingwaho.

Imibare y’Ikigo cy’ibarurishamibare yo mu 2017 igaragaza ko ubuso bw’ubutaka buhingwa mu turere twose bwari hegitari 897,650,4.

Mu ngengo y’imari y’umwaka wa 2018/19 isaga miliyari 2443,5 Frw, Minagri yagenewe asaga miliyari 125 Frw, azibanda ku guhangana n’imihindagurikire y’ibihe, ikoranabuhanga rigamije kongera umusaruro, guteza imbere ubworozi cyane cyane ubw’amatungo magufi n’ubwo kongera umukamo, kurwanya indwara, kongera ibyo u Rwanda rwohereza mu mahanga n’ibindi.

Imyubakireyatwaye ubutaka buhingwa hakurya ya Nyabarongo mu Karere ka Kamonyi

Indi nkuru wasoma : Minagri ihangayikishijwe n’ubutaka bwagenewe guhingwa bukomeje kubakwaho


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza