00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Hari icyizere ko amafaranga Abanyarwanda baba mu mahanga bohereza mu gihugu aziyongera

Yanditswe na Bukuru JC
Kuya 6 Nyakanga 2021 saa 06:25
Yasuwe :
0 0

Imyaka igiye kuba ibiri Isi ihanganye n’icyorezo cya Covid-19 cyahagaritse ibikorwa byinshi byafashaga mu kuzamura ubukungu. Ibyo byatumye ubukungu bwa benshi n’ubuzima biba bibi.

Mu bihugu biri mu nzira y’Amajyambere n’u Rwanda rurimo, hari abacungiraga ku mafaranga yoherezwa n’abo mu miryango yabo cyangwa inshuti ziba mu mahanga. Abo kenshi ni nabo babagobokaga mu bihe bibi, nyamara ntibyakunze mu gihe cya Covid-19 kuko imirimo yahagaze mu bice byose.

Inzobere mu bukungu zigaragaza ko aya mafaranga yoherezwa nubwo yagabanutse mu myaka ishize, ashobora kuziyongera mu minsi iri imbere.

Maniraguha Alain, Impuguke mu Bukungu ufite ibikorwa by’ubucuruzi mu Rwanda ariko akaba aba mu Bubiligi ari naho yigiye iby’ubukungu, yavuze ko ingamba ibihugu byinshi Abanyarwanda babarizwamo byafashe zigamije guhashya Covid-19 zitanga icyizere.

Ibyo ngo bivuze ko imirimo abari barayibuze cyangwa abakoraga nabi izasubukurwa, bakongera kwinjiza bagasagurira n’imiryango yabo mu Rwanda.

Ati “Mu myaka ibiri byagabanutse gusa uko icyorezo kigenda kigabanuka nko mu bihugu by’i Burayi, birumvikana ko amafaranga abantu bohereza azongera akazamuka kuko n’ubundi iyo mirimo izaba yongeye igasubukurwa noneho bakaba bakomeza kohereza amafaranga bafasha imiryango yabo cyangwa bashora imari.”

Abihera ku buryo ibihugu nk’iby’i Burayi byatangiye gutanga inkingo no gufungura ibikorwa byinshi by’ubucuruzi.

Kubera uko kwizera ko ubukungu buzazahuka, byatumye Maniraguha afungura urubuga E-Mpano.com rushamikiye kuri Sosiyete Nord Sud International iherereye mu Bubiligi, rugamije gufasha Abanyarwanda baba mu mahanga kugura ibicuruzwa birimo ibiribwa, bikohererezwa inshuti n’imiryango yabo bari mu Rwanda.

Yatekereje uru rubuga nyuma yo gusanga hari bamwe bohererezwa amafaranga akabapfira ubusa, bikaba byabashwanisha n’abayaboherereje n’ibindi.

Ati “Hari bamwe mu bohereza amafaranga bagiye binubira kohereza amafaranga ntakoreshwe neza icyo yagenewe cyangwa se ngo agirire akamaro abo yohererejwe. Ni iyo mpamvu E-mpano.com yashinzwe mu gukemura icyo kibazo. Aho kohereza amafaranga, Abanyarwanda baba mu mahanga bashobora kugura ibikoresho runaka kuri internet hanyuma bagafashwa mu kubigeza ku bo bakeneye ko bigezwaho mu Rwanda.”

Maniraguha yavuze ko iyo hoherejwe ibicuruzwa nk’ibiribwa birushaho kugirira akamaro ababyohererejwe.

Umuyobozi w’Ishyirahamwe ry’Ibigo by’Imari iciriritse mu Rwanda (AMIR), Nkuranga Aimable, yabwiye IGIHE ko icyizere gihari ko amafaranga yoherezwa avuye mu mahanga aziyongera mu minsi iri imbere kubera ibikorwa byo gukingira.

Kuba ayo mafaranga yakwiyongera, Nkuranga avuga ko ari inyungu ikomeye ku gihugu.

Ati “Bituma hari imishinga ikorwa itashoboraga gukorwa ayo mafaranga ataje. Niba ari umuntu uri i Burayi akohereza ngo bamwubakire inzu, agure isambu cyangwa atangize umushinga, biraza bigaha akazi abantu. Byongera amafaranga mu bigo by’imari abantu bakabona ku mafaranga.”

Nko mu 2018, Abanyarwanda baba mu mahanga bohereje mu gihugu miliyoni 184 z’amadolari. Icyakora umwaka ushize ayo mafaranga yaragabanutse cyane. Urugero muri Werurwe 2020, amafaranga Abanyarwanda baba mu mahanga bohereje yari miliyoni 18.9 z’amadolari avuye kuri miliyoni 22.5 z’amadolari mu gihe nk’icyo 2019 nkuko byagaragajwe icyo gihe na Banki Nkuru y’Igihugu.

Maniraguha yavuze ko ayo mafaranga Abanyarwanda baba mu mahanga bohereza ku ivuko, uretse gufasha mu mibereho myiza binafasha mu ishoramari no kumenyekanisha u Rwanda.

Ati “Bifasha no kumenyekanisha igihugu. Abanyarwanda bari hanze bagiye batanga ishusho nziza ku Rwanda no kugira ngo rumenyekane, ruvugwe neza runasurwe.”

Muri rusange, Ishami rya Loni rishinzwe ubukungu n’imibereho myiza ritangaza ko nibura buri mwimukira uba mu mahanga yohereza iwabo 15% by’amafaranga yinjiza. Ni amafaranga agera nibura ku bantu miliyoni 800 ku Isi.

Alain Maniraguha washinzwe E-mpano.com

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .