00:00:00 IGIHE NETWORK KN KINYARWANDA EN ENGLISH FR FRANCAIS

BNR yakuyeho ingamba zoroherezaga ibigo by’ubucuruzi kubera ingaruka za Covid-19

Yanditswe na Ndahayo Emmanuel
Kuya 19 Ugushyingo 2021 saa 11:24
Yasuwe :
0 0

Banki Nkuru y’Igihugu yategetse banki z’ubucuruzi gusubukura ibikorwa byazo nk’uko byari bisanzwe, ingamba zirimo kuvugurura inguzanyo n’ibindi byakozwe mu rwego rwo guhangana n’ingaruka z’icyorezo cya Covid-19 zigakurwaho.

Ubwo Covid-19 yageraga mu Rwanda, BNR yasabye banki gushyiraho uburyo bwo kuvugurura inguzanyo ku bigo by’ubucuruzi byagizweho ingaruka zikomeye n’iki cyorezo, mu rwego rwo kubiha umwanya uhagije wo kwisuganya mbere yo gusubukura kwishyura inguzanyo.

Nyuma y’uko ibikorwa by’ubucuruzi bisubukuwe mu ngeri nyinshi, BNR yasabye ko banki z’ubucuruzi zitazongera kuvugurura inguzanyo hashingiwe ku cyorezo cya Covid-19, ahubwo ko bigomba gukorwa nk’uko n’ubundi byari bisanzwe bikorwa mbere y’iki cyorezo, hashingiwe ku masezerano ndetse n’izindi ngamba zibigenga mu Rwanda.

Banki Nkuru y’Igihugu ivuga ko igihe banki z’ubucuruzi zari zifite cyo gukomeza gufasha ibigo by’ubucuruzi byifuza kuvugurura inguzanyo bitewe n’ingaruka za Covid-19, cyarangiranye na Nzeri uyu mwaka, nk’uko bikubiye mu ibaruwa Guverineri wa Banki Nkuru y’u Rwanda, John Rwangombwa, aherutse kugenera abayobozi ba banki z’ubucuruzi mu Rwanda.

Riragira riti “Iyi baruwa igamije kubibutsa ko ingamba zo gufasha ibigo by’ubucuruzi (relief measures) zarangiye, bityo banki zikwiye gukomeza gusuzuma inguzanyo zavuguruwe [nk’uko zari zisanzwe zibigenza mbere ya Covid-19].”

BNR ivuga ko iki cyemezo cyaturutse ku bugenzuzi bwakozwe, bugasanga inzego z’ubukungu nyinshi zarasubukuye ibikorwa byazo, bityo zifite ubushobozi bwo gukomeza kwishyura inguzanyo nk’uko byahoze.

Bati “Banki zikwiye guhora zigenzura inguzanyo zavuguruwe hashingiwe kuri Covid-19 zifite igihe cyo kwishyurwa [kiri hafi kurangira] cyangwa se zikiri mu gihe cyo
gusonerwa, harimo n’inguzanyo zatanzwe n’Ikigega Economic Recovery Fund.”

Icyakora hari impungenge ko iki cyemezo gishobora kugira ingaruka zikomeye ku bushobozi bwo kwishyura inguzanyo bwa bimwe mu bigo by’ubucuruzi, na cyane ko imibare yerekana ko inguzanyo zitishyurwa neza zikomeje kuzamuka.

Mu gihembwe cya gatatu cy’uyu mwaka, izi nguzanyo zageze kuri 6,6%, mu gihe zari kuri 5,1% mu gihembwe cya kabiri ndetse na 5,2% mu gihembwe cya mbere cy’uyu mwaka. Iki kibazo kandi gifite umurego muri banki ugereranyije n’ibigo by’imari iciriritse.

Muri banki, inguzanyo zitishyurwa neza zari ku kigero cya 7,5% mu gihembwe cya gatatu uyu mwaka, zivuye kuri 6,4% mu gihembwe cya kabiri. Mu bigo by’imari iciriritse, bisanzwe bitanga inguzanyo nto kandi zishyurwa ku nyungu nto, ikigero cy’inguzanyo zitishyurwa neza mu gihembwe cya gatatu cyageze kuri 5,2%, kivuye kuri 3,5% mu gihembwe cya kabiri cy’uyu mwaka.

Ubusanzwe, BNR iteganya ko ikigero cy’inguzanyo zitishyurwa neza kitagombye kurenga 5%.

Impuguke mu bijyanye n’imisoro mu kigo cya KPMG, Angello Musinguzi, yabwiye The New Times ko hakiri inzego zagizweho ingaruka zikomeye ku buryo zitabashije kwiyubaka mu gihe cyatanzwe, asaba ko zishobora kwitabwaho mu buryo bwihariye.

Ati “Kubera ingaruka za Covid-19, hari inzego z’ubukungu zagizweho ingaruka cyane ku buryo zishobora kutazasubira ku murongo mu gihe cy’umwaka umwe cyangwa ibiri.”

Ku ruhande rw’abakora muri banki z’ubucuruzi, batangaje ko iki cyemezo cyari gikwiye na cyane ko ubukungu burimo kuzanzamuka.

Umuyobozi Mukuru wa BPR, Maurice Toroitich, yavuze ko ubukungu bumaze kuzamuka bityo ibigo by’ubucuruzi byagatangiye kwishyura inguzanyo zabyo.

Ati “Bitewe n’uko ubukungu bwafuguwe muri rusange ndetse ibigo byinshi by’ubucuruzi bikaba bikomeje kwishyura inguzanyo zabyo, uretse ibigo bimwe na bimwe nka hoteli, ntekereza ko bikwiriye ko niba hari ibigo by’ubucuruzi bitarafungura ibikorwa byabyo ndetse no kwishyura inguzanyo, cyangwa se bikaba bifite ingorane mu kwishyura inguzanyo, ubwo bivuze ko bizafatwa nk’ibifite ikibazo cyo kwishyura inguzanyo neza noneho banki zigikemure mu buryo bukwiriye [nk’uko zari zisanzwe zikemura ibindi bibazo by’ibigo by’ubucuruzi bifite ubushobozi bucye bwo kwishyura inguzanyo byafashe].”

Ibi abihuriyeho na Robin Bairstow, Umuyobozi Mukuru wa I&M Bank, ndetse akanayobora Ishyirahamwe ry’amabanki mu Rwanda (RBA), wavuze ko ku ruhande rwabo “iki cyemezo ntacyo gitwaye kandi ko byari bizwi ko hari igihe kizagera inguzanyo zafashwe zikishyurwa."

Byitezwe ko ubukungu bw’u Rwanda buzazamuka ku kigero cya 5,1% muri uyu mwaka, ndetse ibikorwa hafi ya byose by’ubucuruzi bikaba byarafunguye.

BNR yahagaritse ingamba zashyiriweho ibigo by’ubucuruzi kubera ingaruka za Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .