Bill Gates yisubije umwanya w’umukire wa mbere ku Isi ahigitse Jeff Bezos bahanganye

Yanditswe na Evariste Nsengimana
Kuya 18 Ugushyingo 2019 saa 11:29
Yasuwe :
0 0

Umunyamerika Bill Gates, akaba ari nawe washinze ikigo cya Microsoft yongeye kwisubiza umwanya w’umuherwe wa mbere ku Isi awukuraho umunyamerika Jeff Bezos, washinze urubuga rwa Amazon wari uwumezeho igihe.

Bill Gates waherukaga kuyobora uru rutonde rw’abaherwe ku Isi mu 2017 akarukurwaho na Jeff Bezos mu 2018, yongeye kwisubiza uwo mwanya, aho umutungo mbumbe afite wageze kuri miliyari 110$ nk’uko bigaragazwa n’icyegeranyo cy’abaherwe (Bloomberg Billionaires Index).

Iki cyegeranyo gisobanura ko Jeff ufite umutungo mbumbe wa miliyari 108.7$ yakuwe kuri uyu mwanya bitewe n’uko mu mezi atatu ashize inyungu y’ikigo cye cya Amazon yagabanutseho 28% ugereranyije n’uko yanganaga mu myaka ishize.

Kigaragaza ko Bill Gates umutungo we wiyongereye bitewe n’uko imigabane ya Microsoft yiyongereyeho hafi 4% muri uyu mwaka gusa mu gihe iya Amazon yagabanutseho 2% ndetse ko mu Ukwakira Microsoft yabashije gutsindira isoko rya miliyari 10$ yari ihanganyemo na Amazon.

Kigaragaza kandi ko mu mpamvu zatumye umutungo wa Jeff usubira inyuma zifitanye isano n’igice cyawo [1/4] yahayeho umugore we MacKenzie Bezos batandukanye muri uyu mwaka.

Gusa ku rundi ruhande Bill Gates nawe hari miliyari 35$ yakuye mu kigo cye, azifashisha umuryango witwa Bill & Melinda Gates Foundation, washinzwe mu 1994.

Uru rutonde rugaragaza abaherwe 500 kurusha abandi abandi ku Isi rugaragaza ko ku mwanya wa gatatu hariho Umufaransa, Bernard Arnault, ufite umutungo mbumbe wa miliyari 103Frw. Warren Buffett yaje ku mwanya wa kane n’umutungo mbumbe wa miliyari 83$ mu gihe Mark Zuckerberg washinze Facebook yaje ku mwanya wa gatanu na miliyari 74.5$.

Umwaka ushize Jeff yari ayoboye urutonde rw’abaherwe n’umutungo mbumbe wa miliyari 141.9$ akurikiwe na Bill Gates amurusha miliyari 49$ naho Warren Buffet wari ku mwanya wa gatatu yarushwaga n’uwa mbere miliyari 60$.

Reba urutonde rwose hano

Bill Gates niwe mukire wa mbere ku Isi, yasubiranye uyu mwanya ahigitse Jeff Bezos

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza