00:00:00 IGIHE NETWORK KN KINYARWANDA EN ENGLISH FR FRANCAIS

Banki zungutse miliyari 56 Frw, inguzanyo zitishyurwa neza ziratumbagira: Ubukungu bw’u Rwanda mu 2020/2021

Yanditswe na Ishimwe Israel
Kuya 2 Ugushyingo 2021 saa 07:04
Yasuwe :
0 0

Banki Nkuru y’Igihugu [BNR] yagaragaje ko mu mwaka w’ingengo y’imari wa 2020/21, umusaruro mbumbe w’imbere mu gihugu wiyongereyeho 4,4 % uvuye kuri 2,3 % mu mwaka wabanje mu gihe urwunguko rw’Urwego rw’amabanki rwageze kuri miliyari 56 Frw ruvuye kuri miliyari 33 Frw.

Ni imibare ikubiye muri raporo ngarukamwaka ya BNR y’umwaka w’ingengo y’imari wa 2020/21 isobanura ibikorwa byakozwe kuva muri Nyakanga 2020 kugeza Kamena 2021.

Muri Nzeri uyu mwaka, Ikigo cy’Igihugu cy’Ibarurishamibare mu Rwanda (NISR) cyatangaje ko umusaruro mbumbe w’igihugu wazamutse ku gipimo cya 20,6% mu gihembwe cya kabiri cya 2021. Bisobanuye ko umusaruro mbumbe w’igihugu wageze kuri miliyari 2.665 Frw uvuye kuri miliyari 2.177 Frw mu gihembwe cya kabiri cya 2020.

BNR yatangaje raporo ya 2020/21, umwaka warangiye ku wa 30 Kamena 2021 nyuma y’amezi 18 umurwayi wa mbere agaragayeho COVID-19 mu Rwanda.

Ibi bihe byatumye ubukungu bw’Isi buhungabana ahanini kubera ingamba zafashwe mu kwirinda ikwirakwira rya COVID-19 zatumye hari ibikorwa bimwe na bimwe bifungwa.

Guverineri wa BNR, John Rwangombwa, yavuze ko iyi banki yashyize mu bikorwa politiki y’ifaranga yorohereza ishoramari igumisha igipimo cy’inyungu fatizo yayo kuri 4,5% mu mwaka wose mu gushyigikira ubukungu.

Ati “BNR kandi yemereye ibigo by’imari kuvugurura amasezerano y’inguzanyo ku bakiliya bagizweho ingaruka zikomeye n’icyorezo cya COVID-19, cyane cyane inguzanyo zo mu rwego rw’ubukerarugendo, ubwikorezi, inzu z’ubucuruzi n’uburezi ndetse n’imirimo ibishamikiyeho.’’

BNR yanavuguruye ingamba zifasha amabanki kubona amafaranga y’igihe gito, harimo ikigega cy’ingoboka kiyaguriza mu gihe gito (ELF), kugura impapuro mpeshwamwenda, ndetse igumisha kuri 4% igipimo cy’ubwizigame butegetswe ku mafaranga abitse. Izi ngamba zoroheje ikiguzi cyo kubona inguzanyo ku masosiyete y’ubucuruzi no ku bantu ku giti cyabo.

Raporo ya BNR yerekana ko muri rusange, ubukungu bwazamutseho 4.4% muri uyu mwaka, buvuye kuri 2,3% mu 2019/2020. Igipimo cy’inyungu fatizo ya BNR cyagumishijwe kuri 4,5%.

Ubukungu bw’igihugu bwazamutse kuri iki kigero mu gihe mu mwaka ushize wa 2020 gusa bwagabanutse bugera kuri 3,4%, ari nabwo bwa mbere byari bibayeho mu myaka 20 ishize. Ni igabanuka rifitanye isano n’ingaruka zatewe na COVID-19.

Mu 2020/2021 kandi inguzanyo zahawe abikorera zageze kuri 28,7% zivuye kuri 26,4% muri Kamena 2020. Iri zamuka ahanini rifitanye isano no kuba ibigo n’abantu benshi bashakaga amafaranga yo gushora mu bikorwa byabo byazahajwe na COVID-19.

Izamuka ry’inguzanyo zasabwe mu mabanki ryatumye urwunguko rw’uru rwego rugera kuri miliyari 56 Frw avuye kuri miliyari 33 Frw yo mu mezi atandatu ya 2020.

Raporo ya BNR yerekana ko inguzanyo zitishyurwa neza mu mabanki ziyongereye ziva kuri 5,5% muri Kanama 2020 zigera kuri 5,7% muri uyu mwaka. Mu bigo by’imari iciriritse, zaragabanutse ziva kuri 12.8% muri Kanama 2020 zigera kuri 6.6%.

Banki by’umwihariko zemerewe kuvugurura (igihe cyigijwe hejuru) kugeza ku nshuro enye, abakiliya bishyuraga neza mbere y’icyorezo.

BNR igaragaza ko banki zavuguruye inguzanyo za miliyari 1011 Frw cyangwa 37% by’inguzanyo zose zirimo miliyari 235 Frw ziterekeye COVID-19 na miliyari 776 Frw zerekeye COVID 19.

Miliyari 766,6 Frw (28,5% z’inguzanyo zose) zavuguruwe kubera icyorezo mu gihe miliyari 561,3 Frw (20,6% by’inguzanyo zose) zavuguruwe kubera COVID-19 zasubukuye kwishyura uko bisanzwe.

Nibura miliyari 215,3Frw (7,9% by’inguzanyo zose) zavuguruwe kubera COVID-19 ziracyari mu gihe cy’ubwihanganirwe. Inyinshi muri zo ziri muri hoteli, restaurants, amazi n’ingufu, ubwikorezi n’inzu byagizweho ingaruka n’icyorezo.

Amavugurura yakozwe muri izo nguzanyo ni yo yatumye igipimo cy’izitishyurwa cyari kuri 5,6% na 5,4% kugeza ku wa 30 Kamena 2021 kivuye kuri 5,6% na 5,4% kugeza ku wa 30 Kamena 2019 na 30 Kamena 2020 uko zikurikirana.

Ku ruhande rw’ibigo by’imari iciriritse na za SACCO byo byavuguruye inguzanyo zifite agaciro ka miliyari 48,4 Frw kugeza mu Ukuboza 2020.

Ivugururwa ry’inguzanyo ryafashije abagurijwe kwisuganya kandi abenshi muri bo batangiye gahunda yo kongera kwishyura inguzanyo. Kugeza mu mpera za Kamena 2021, amafaranga yose yarasigaye ku nguzanyo zavuguruwe yari miliyari 12,3 Frw.

Amafaranga yose y’urwego rw’imari iciriritse yazamutse ava kuri miliyari 113,8 Frw muri Kamena 2020 agera kuri miliyari 116,7 Frw mu mpera za Kamena 2021 (izamuka rya 20%) mu gihe igipimo cy’ukwihaza mu mari cyavuye kuri 34,5% mu mpera za Kamena 2020 kigera kuri 35,4% muri Kamena 2021.

Ku bw’ibyo, igiteranyo cyose cy’inguzanyo cyarazamutse kiva kuri miliyari 181,5 Frw muri Kamena 2020 kigera kuri miliyari 215,1 Frw zamenyekanishijwe kugeza ku wa 30 Kamena 2021.

- Ikoranabuhanga ryarimakajwe mu guhangana n’ingaruka za COVID-19

Kuva COVID-19 yakwaduka mu Rwanda, abaturage bashishikarijwe kurushaho guhererekanya amafaranga hifashishijwe ikoranabuhanga mu kwirinda kwanduzanya.

BNR igaragaza ko amafaranga yishyuwe hakoreshejwe ikoranabuhanga ku musaruro mbumbe w’imbere mu gihugu yageze kuri 95,5% avuye kuri 57,6% yo muri Kamena 2020.

Kubera icyorezo, ubukungu bw’Isi bwagabanutseho 3,2% mu 2020, riba igabanuka rikabije ryabayeho kuva mu bihe by’intambara ya kabiri y’Isi.

Iri hungabana ryageze ku mpande zose z’Isi. Mu Rwanda, BNR n’izindi nzego za Leta zafashe ingamba za ngombwa mu gukumira ingaruka z’ihungabana ry’ubukungu bw’u Rwanda n’urwego rw’imari by’umwihariko.

U Rwanda rwizeye ko ubukungu buzakomeza kwiyongera bitewe n’itangwa ry’urukingo rwa COVID-19, ingamba zitandukanye zafashwe na Leta zo kubuzahura ndetse n’izijyanye na politiki y’ifaranga zorohereza ishoramari.

Ingamba zafashwe ibikorwa bitandukanye bikongera gufungurwa, zatumye ubukungu bw'igihugu buzahuka
Hari icyizere ko ubukungu bw'u Rwanda buzongera kuzamuka muri uyu mwaka bitewe n'uko icyorezo cya Covid-19 kiri kugenza make
Mu 2020/2021, umusaruro mbumbe w’imbere mu gihugu wiyongereyeho 4,4 % uvuye kuri 2,3 % mu mwaka wabanje
Imishinga y'ubwubatsi iri mu yazahuye urwego rw'imari mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .