Kwamamaza

Banki ya Kigali yinjije miliyari 20.5 Frw mu 2015

Yanditswe kuya 23-02-2016 saa 06:46' na Rabbi Malo Umucunguzi


Banki ya Kigali, BK, yatangaje ko yinjije miliyari 20.5 z’amafaranga y’u Rwanda mu 2015, amafaranga yiyongereyeho 11.7% ugereranyije n’umwaka wabanje.

Iyi banki kandi yanagaragaje ko mu gihembwe cya kane cya 2015, inyungu yayo yiyongereyeho 2.7%, ikagera kuri miliyari 12.3 z’amafaranga y’u Rwanda, ugereranyije n’igihembwe cyabanje.

Nyuma y’inyungu yabonetse mu mwaka ushize, inama y’ubutegetsi ya BK yasabye ko abanyamigabane bahabwa 40% by’amafaranga yinjiye bingana na miliyari 8.2, ahwanye n’amafaranga 12.5 kuri buri mugabane, gusa bizabanza kwemezwa n’Inteko rusange iteganyijwe muri Gicurasi uyu mwaka.

Mu kiganiro n’abanyamakuru kuri uyu wa Mbere, ubuyobozi bwa BK bwavuze ko kugeza kuwa 31 Ukuboza 2015, Banki ya Kigali yari imaze gutanga serivisi 327 441 ku bakiliya basanzwe, na 29 518 ku banini.

Kugeza kandi mu mpera z’umwaka ushize BK yari ifite amashami agera ku 75 n’abayihagarariye 1 079, batanze serivisi 628 000 zifite agaciro ka miliyari 57.3 z’amafaranga y’u Rwanda.

Umuyobozi ushinzwe ibikorwa bya Banki ya Kigali, Lawson Naibo, yavuze ko Banki ya Kigali ishyize imbere kongera serivisi itanga n’aho izitangira.

Ati “Kongera umubare w’abaduhagarariye birajyana no kugira ngo abakiliya bacu babone serivisi zacu, nziza kandi mu buryo buboroheye.”

Umutungo wa BK wiyongereyeho 16,3% ugera kuri miliyari 561.2 z’amafaranga y’u Rwanda, mu gihe inguzanyo iyo banki yatanze ziyongereyeho 34.5%, zikagera kuri miliyari 313.9%, mu mwaka ushize.

Umuyobozi wa Banki ya Kigali, Dr james Gatera, yagaragaje ko ashimishijwe n’ibyagezweho mu mwaka ushize, aboneraho no gushimira Diane Karusisi ugiye gukomeza inshingano nk’Umuyobozi mushya wa BK, nyuma y’uko we aheruka kwegura ku mirimo ye.

Dr Gatera yavuze ko mu byo BK igomba gukora ari uguhangana n’andi mabanki muri Afurika y’u Burasirazuba, agaragaza icyizere afitiye ubuyobozi bushya mu kugeza iyi banki ku rundi rwego.

Umuyobozi mushya wa Banki ya Kigali, Dr. Karusisi yashimiye Dr Gatera wabaye ‘umutima’ wa Banki ya Kigali mu gihe kitari gito, anavuga ko ku bufatanye n’abakozi ba Banki ya Kigali bazabasha kuyigeza ku yindi ntera.

Mu byo ashyize imbere nk’umuyobozi wa BK, Dr Karusisi yagize ati “Ni ugukomeza ibyo uwo nsimbuye yakoze, kongera umusaruro wa banki, gutanga serivisi nziza ku bakiliya ba BK no gushyiraho izindi serivisi zizatuma bakora ibikorwa byabo mu buryo bworoshye.”

Karusisi yavuze ko mu byo aza gushyiramo ingufu, harimo uburyo bwo kubona amakarita abakiliya ba banki bakoresha muri iki gihe, aho byafataga iminsi myinshi kugira ngo aboneke, ariko ngo harakorwa ibishoboka kugira ngo zijye ziboneka vuba, hanongerwe ikoranabuhanga mu gutumanaho n’abakiliya.

Banki ya Kigali niyo yagizwe Banki ya mbere mu Rwanda mu 2015 na Euromoney, ihabwa igihembo cya African Banker Award 2015, inagirwa na Banki nziza mu Rwanda kuva mu Rwanda 2009-2014.

Iyi Banki iheruka no gutangiza ikigo BK Telecom kizajya gitanga serivisi z’ikoranabuhanga, hagamijwe kunoza uburyo abakiliya ba BK babona serivisi.

Dr Diana Karusisi, umuyobozi mushya wa BK
Dr James Gatera wari usanzwe uyobora BK
Dr Karusisi yagaragaje ko hari ibyo yiteguye gushyiramo ingufu muri BK
Lawson Naibo ushinzwe ibikorwa bya BK
Marc Holtzman uyobora inama y'ubutegetsi ya BK asuhuza abanyamakuru
Mack Holtzman yashimye ibyagezweho ku buyobozi bwa Dr Gatera
Ken Ofori-Atta umwe mu bagize inama y'ubutegetsi ya BK
Abanyamakuru bitabiriye iki gikorwa

Amafoto: Luqman Mahoro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Location: Ndamage Building 4th floor
P.O Box: 3477 Kigali- Rwanda
Phones:
+250 788 74 29 08, +250 788 49 69 15, +250 725 94 66 08
Email:
[email protected], [email protected]

Website Developped by

Uru Rubuga Ruheruka Gushyirwaho Amakuru Sunday 7 August 2016
Copyright © 2009 -2014 - IGIHE Ltd - All Rights Reserved