Banki y’Isi igiye kuguriza u Rwanda amafaranga asaga miliyari 19

Yanditswe na Philbert Girinema
Kuya 25 Ukwakira 2015 saa 04:19
Yasuwe :
0 0

Banki y’ Isi igiye guha u Rwanda ya miliyoni 26 z’ Amadolari ya Amerika, agera kuri 19 344 910 000 Frw azakoreshwa mu bikorwa remezo n’ ibindi bikoresho bizafasha mu bucuruzi ku mipaka imwe y’inzira zo ku butaka no ku kibuga cy’ indege.

Ibyo bikorwa remezo byitezweho kuba inyungu z’akarere u Rwanda ruherereyemo muri rusange.

Minisiteri y’Imari n’Igenamigambi yatangaje amasezerano y’ itangwa ry’iyi nguzanyo ashyirwaho umukono kuri uyu wa Mbere tariki 26 Ukwakira 2015.

Nyuma y’ icyo gikorwa, biteganyijwe ko Minisitiri w’Imari, Gatete Claver na Guverineri wa Banki Nkuru y’ Igihugu John Rwangombwa bazasobanura byimbitse ibijyanye n’inoti nshya ya 1000 iheruka gushyirwa ahagaragara.

Banki y’Isi isanzwe ari umufatanyabikorwa w’ u Rwanda mu bikorwa bitandukanye by’iterambere nk’aho mu mwaka ushize wa 2014 yagurije u Rwanda miliyoni 15 z’amadolari ya Amerika (asaga miliyari 10 z’amafaranga y’u Rwanda), yari agenewe gukoreshwa mu bikorwa byo kurwanya ihohoterwa rishingiye ku gitsina (GBV) binyujijwe muri gahunda ya Isange one Stop Center.

Minisitiri w’Imari n’Igenamigambi, Ambasaderi Claver Gatete, aherutse gutangaza ko Banki y’Isi ariwe muterankunga uyoboye abandi mu gufasha u Rwanda kugera ku iterambere rirambye.

Ibi Minisitiri Gatete yabitangarije abanyamakuru ku wa Kane tariki 14 Gicurasi 2015, ubwo yari aherekeje umuyobozi wa Banki y’Isi, Sri Mulyani Indrawati, wakiriwe na Perezida Kagame.

Ati “Banki y’Isi niyo muterankunga mukuru kurusha abandi bose bafasha u Rwanda mu iterambere. Bamaze kuduha amafaranga menshi mu bikorwa bitandukanye nk’ubuhinzi, ibikorwaremezo n’ibindi”.

Carolyn Turk, Uhagarariye Banki y’Isi mu Rwanda na Minisitiri w’Imari n’Igenamigambi, Claver Gatete ubwo bashyiraga umukono ku masezerano y'inguzanyo ya miliyoni 15 z’amadolari muri Kanama 2014

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza