Amajyaruguru: Abikorera basabwe kwirinda magendu hagamijwe imisoro ya miliyari 18.6 Frw

Yanditswe na IGIHE
Kuya 16 Nzeri 2018 saa 11:38
Yasuwe :
0 0

Inzego zitandukanye zasabye abikorera mu Ntara y’Amajyaruguru ubufatanye mu guhashya magendu kuko iri mu bikomeje gutuma imisoro yakirwa itaba myinshi, mu gihe Ikigo cy’Igihugu cy’Imisoro n’amahoro, RRA, cyihaye intego ko iyo ntara izavamo imisoro ya miliryari 18.6 Frw muri uyu mwaka.

Ibi byagarutsweho mu ku wa Gatanu tariki 14 Nzeri ubwo hizihizwaga umunsi w’abasora ku nshuro ya 16 mu Ntara y’Amajyaruguru, wabereye mu Karere ka Gicumbi. Uyu munsi wahuriranye n’isabukuru y’imyaka 20 RRA imaze ishinzwe.

Muri 2017/18 Intara y’Amajyaruguru yinjije imisoro y’imbere mu gihugu ingana na miliyari 16.6 Frw ku ntego ya miliyari 15.6 Frw, ikaba yarayigezeho ku 106.4%.

Muri iyi ntara kandi hakusanijwe imisoro n’amahoro bigenewe uturere bingana na miliyari 5Frw ku ntego ya miliyari 4.7Frw.

Muri uyu mwaka Intara y’Amajyaruguru ifite intego yo kwinjiza imisoro y’imbere mu gihugu ingana na miliyari 18.6 Frw n’imisoro n’amahoro bigenewe uturere bingana na miliyari 6.5 Frw.

Guverineri w’Intara y’Amajyaruguru Gatabazi Jean Marie Vianney yavuze ko hakenewe ubufatanye mu kurandura burundu magendu n’ibiyobyabwenge kuko biri mu bituma imisoro ikusanywa ikiri hasi.

Yakomeje agira ati “Kugirango magendu icike burundu, ni uko buri wese yumva ko ukora magendu ariwe utuma bya bikorwa bitanduka biteza umuturage imbere bitagerwaho.”

Yashimiye abikorera bo mu Rwanda muri rusange n’abo mu Ntara y’Amajyaruguru ku buryo bw’umwihariko, ku ruhare bafite mu bukungu bw’Igihugu kuko ariho ibikorwa byose by’iterambere bituruka.

Umuyobozi w’Urugaga rw’Abikorera (PSF) mu Ntara y’Amajyaruguru, Nsengiyumva François, ashishikariza abacuruzi bagiseta ibirenge mu gusora, kumva ko umusoro utuma igihugu cyiyubaka kikanubaka abaturage bacyo.

Yagize ati “Abacuruzi dukwiye kumva ko gusora bituma twubaka igihugu, igihugu nacyo kikubaka abaturage bacyo, bakaba abaturage batunze kandi batunganye, bityo natwe tukabona isoko ryaguye."

Komiseri Mukuru Wungirije wa RRA, Bizimana Ruganintwali Pascal, yasabye ubufatanye mu kubaka umuco mwiza wo kwaka no gutanga Fagitire ya EBM, kurwanya magendu no gukomeza guhuza ingufu mu bukangurambaga ku ruhare rw’imisoro mu iterambere ry’igihugu.

Yavuze ko zimwe mu ntego zatumye gukusanya imisoro mu Rwanda bihagaze neza ari ubukangurambaga no kwigisha abasora, kunoza amategeko y’imisoro hagamijwe korohereza abasora no gushyira imbere ikoranabuhanga nka EBM, E-Tax n’ibindi.

Gusa yagize ati “Zimwe mu mbogamizi RRA igihura nazo harimo ubwitabire bukiri hasi ku basora bamwe na bamwe nk’abakoresha EBM nabi, n’izamuka rya magendu ku bicuruzwa nka Caguwa, inzoga za GINS, imitobe, ibitenge...”

Ubwo RRA yashingwaga mu 1998, imisoro yakirwaga yari muri miliyari 62.8Frw byanganaga na 36.3% by’ingengo y’imari icyo gihe.

Nyuma y’imyaka 20, amafaranga akusanywa yikubye hafi inshuro 20. Mu mwaka wa 2017/18 hakusanyijwe miliyari 1,234.2 zingana na 58.3% by’ingengo y’imari.

Ku ntego RRA yari yahawe mu mwaka ushize wa 2017/18 yo gukusanya miliyari 1,215.2, yayirengeje ku kigero cya 103.1% kuko hinjiye miliyari 1,252.6.

Uyu mwaka wa 2018/19 RRA ifite intego yo kwakira miliyari 1,369.4 ndetse n’imisoro n’amahoro byagenewe uturere bingana na miliyari 60.2.

Komiseri Mukuru wungirije muri RRA, Bizimana Ruganintwali Pascal
Guverineri w'Intara y'Amajyaruguru, Gatabazi JMV
Nsengiyumva François uyobora PSF mu Ntara y'Amajyaruguru
Abayobozi bahurije ku nyungu ziri mu gutanga umusoro neza kandi ku gihe
Abikorera bitabiriye umunsi w'abasora i Gicumbi mu Ntara y'Amajyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza