Amabanki yose akorera mu Rwanda yasabwe kongera imari shingiro yayo

Yanditswe na Philbert Girinema
Kuya 16 Ukuboza 2015 saa 10:32
Yasuwe :
0 0

Amabwiriza mashya ya Banki Nkuru y’Igihugu (BNR), asaba amabanki yose akorera ku butaka bw’u Rwanda kongera imari shingiro yayo, kugirango arusheho gutekanisha imari y’abaturage acunze no kubahiriza amahame mpuzamahanga agenga urwego rw’amabanki.

Muri aya mabwiriza buri Banki itegetswe kongera ingano y’amafaranga iteganyiriza ibihe by’igihombo n’ihungabana ry’ubukungu ho 2.5%, bisobanuye ko amafaranga adakorwaho banki zibitsa muri Banki Nkuru y’Igihugu azahita ava ku 8% by’imari shingiro yayo yari asanzwe ,akagera ku 10.5%.

Iyi nyongera yazamuye ibindi bipimo ku buryo bukumira za banki kuba zakoresha amafaranga zagujije ahandi ku kigero kirenze ingano y’ayazo bwite. Akumira kandi ko amabanki akomoka hanze y’igihugu yahungabanywa n’ibibazo bikomotse ku cyicaro gikuru cyayo mu bihugu akomokamo.

Igikenewe ni uko abanyamigabane bashora amafaranga muri za banki kugirango zishobore gukora neza zubahiriza aya mabwiriza.

Ni impinduka abasesengura berekana ko ziri mu murongo mwiza ariko zishobora kugora amwe mu mabanki adahagaze neza ku isoko, kandi akabangamira ibigo by’imari byari mu nzira zo kubaka ubushobozi bwatuma zubaka amabanki.

Ikindi ni ingaruka byagira kuri serivisi amabanki aha abakiriya bayagana kuko bizatuma aha umwanya n’uburyo afite mu kubahiriza ibyo asabwa na Banki Nkuru y’Igihugu, bigasubiza inyuma urwego yoroshyagamo guha serivisi abakiriya bayo.

BNR ivuga ko ibi bidakwiye gufatwa nk’ikibazo kuko izi ngamba zigamije gutekanisha imari ya rubanda amabanki acunze kandi yashyizweho hitawe kuri byinshi.

Visi Guverineri wa Banki Nkuru y’igihugu ,Monique Nsanzabaganwa, yabwiye KFM ko hakozwe inyigo igaragaza igisabwa kugirango u Rwanda rwubahirize amabwiriza mashya agenga amabanki ku Isi ,kandi ntacyo bizahungabanya amabanki yo mu gihugu.

Yagize ati “Twashatse abahanga badukorera inyigo yo kutubwira ngo dushatse gushyira mu bikorwa aya mabwiriza mashya agenga Isi yose, biradusba iki , ntabwo yagaragaje ibibazo, ibyo amabanki azasabwa kongeraho cyangwa guhindura ntabwo ari ibintu binini.”

Amabanki yasabwe guhita atangira kubahiriza aya mabwiriza mu buryo bw’igerageza ,ariko azahinduka itegeko guhera muri Mutarama mu mwaka wa 2017.

Visi Guverineri wa Banki Nkuru y’igihugu ,Monique Nsanzabaganwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244