Kwamamaza

Afurika itakaza miliyari 35 z’amadolari buri mwaka mu gutumiza ibiribwa

Yanditswe kuya 27-08-2016 saa 14:00' na Ezechiel Mbananabo


Nubwo ubuhinzi butanga akazi ku Banyafurika barenga 80%, imibare mishya y’ Ikigega Mpuzamahanga cy’Iterambere ry’Ubuhinzi (IFAD) igaragaza ko umugabane wa Afurika utakaza miliyari 35 z’amadolari buri mwaka mu gutumiza ibiribwa hanze yawo, ukinjiza 10% gusa by’umusaruro uva mu buhinzi ku Isi.

Ni mu gihe nyamara wihariye kimwe cya kane cy’ubutaka buberanye n’ubuhinzi nk’uko iki kigega gikomeza kibitangaza.

Kanayo F. Nwanze, Umuyobozi Mukuru wa IFAD, yavuze ko amafaranga Afurika itakaza mu gutumiza ibiribwa hanze yagakwiye kuba akoreshwa mu guhanga indi mirimo myinshi kandi iteye imbere mu buhinzi nk’uko the Newtimes yabitangaje.

Uyu muyobozi biteganyijwe ko yitabira inama mpuzamahanga ya Tokyo yiga ku iterambere rya Afurika (Tokyo International Conference on African Development) ibera i Nairobi muri Kenya kuva kuri uyu wa Gatandatu tariki ya 27 Kanama, aho biteganyijwe ko aza kugeza ikiganiro ku bayobozi ba Afurika yerekana ko ubushobozi bwatuma Afurika itera imbere ari bwinshi kuri uyu mugabane, ariko ko ishoramari rikenewe mu guteza imbere urwego rw’ubuhinzi.

Yagize ati “Abayobozi ba Afurika batuma abaturage babo bacika intege bitewe n’ishoramari rikijegajega mu bishorwa mu buhinzi n’ibikorwaremezo,ndetse babura na politiki yo gufasha uru rwego.

Yakomeje agira ati “ Iyaba agace gato k’amafaranga akoreshwa mu gutumiza ibiribwa hanze ya Afurika ashyirwa mu guhanga imirimo mu bice by’ibyaro, ntibyatuma igice kinini cy’urubyiruko rw’Isi rugira ahazaza heza ku mugabane gusa ahubwo na Afurika yagira ubushobzi bwo kwihaza mu biribwa.”

TICAD itegurwa ku bufatanye n’Ishami ry’Umuryango w’Abibumbye ryita ku iterambere, UNDP, Komisiyo y’Umuryango wa Afurika Yunze Ubumwe (AUC), Banki y’isi n’abandi bafatanyabikorwa baturutse mu bihugu byose bya Afurika, igamije kuzamura iterambere rya Afurika riyobowe n’uyu mugabane.

Nubwo Afurika iza ku mwanya wa kabiri ku Isi nk’agace gafite ubukungu buzamuka cyane, Abanyafurika barenga miliyoni 300 bari munsi y’umurongo w’ubukene.

Abenshi batuye mu byaro, kandi babeshejweho n’ubuhinzi. Ubushomeri bwo bugera hafi kuri 40%.

Nwanze yavuze ko kuzamuka k’ubukungu byonyine bidahagije.

Ati “Niba dushaka umugabane wihagije mu biribwa, ufite imibereho ihamye, tugomba kumenya ko iterambere ryibanda ku baturage. Ibyo bashaka si impapuro,barashaka amahirwe y’ubukungu.Mu nama ya TICAD uyu mwaka, ndizera ko dushobora kurenga ibiganiro ku bushobozi bwa Afurika, tukungurana ibitekerezo ku bikenewe bifatika kugira ngo abaturage ba Afurika bagere kuri ubwo bushobozi.”
U Rwanda ruhagaze rute mu gutumiza ibiribwa hanze?

U Rwanda rutumiza mu mahanga ibikomoka ku buhinzi bitandukanye birimo isukari n’ibinyampeke kurusha uko rubyohereza.

Imibare ya Minisiteri y’Ubuhinzi n’Ubworozi, yerekana ko rutakaza abarirwa muri miliyoni 200 z’amadolari mu gutumiza ibiribwa hanze, nk’uko Umunyamabanga wa Leta ushinzwe ubuhinzi, Tony Nsanganira abitangaza.

Aganira na NewTimes muri iki cyumweru, Nsanganira yavuze ko ibyo u Rwanda rutakaza mu gutumiza ibiriwa hanze bikomeje kwiyongera, ariko ko bari gukora cyane kugira ngo imibare igabanuke.

Yagize ati “Dutumiza cyane ibiribwa byatunganyijwe kubera ko inganda zacu zitarabasha gukora ibyo dukeneye byose. Turacyakeneye kugira ibyo dutumiza hanze kandi dutakaza amamiliyoni ku bikomoka ku buhinzi nk’isukari, ingano, umuceri… bidutwara hagati ya miliyoni 150 na 200 z’amadolari buri mwaka.”

Raporo ya Minisiteri y’Ubuhinzi n’Ubworozi ku kwihaza mu biribwa ya 2015, yerekana ko ubucuruzi bw’ibinyampeke bwagaragaje icyuho mu myaka ya 2013 na 2014.

Icyo cyuho kingana na toni 268000 mu 2014. Umusaruro w’ibinyampeke mu 2014 mu gihugu wabarirwaga muri toni 583000.

Nsanganira yavuze ko bari gukorana na Ministeri y’Ubucuruzi n’Inganda harebwa uburyo inganda zobona ibikoresho zikanongera umusaruro w’ibiribwa.

Ku bijyanye n’isukari ngo hashyizweho uruganda rwa kabiri ruyikora mu rwego rwo kongera iyabonekaga ikagera kuri toni 100,000, ku buryo bizatuma u Rwanda ruzaba rwihagije ku isukari mu 2018.

Inama ya TICAD irasozwa kuri iki cyumweru tariki ya 28 Kanama 2016.

Kanayo F. Nwanze, Umuyobozi Mukuru wa IFAD, yavuze ko amafaranga Afurika itakaza mu gutumiza ibiribwa hanze yagakwiye kuba akoreshwa mu guhanga indi mirimo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved