Kwamamaza

‘Abaturage b’u Rwanda’ bari muri 5 bari gutorwamo ’Umunyafurika w’Umwaka’

Yanditswe kuya 26-10-2016 saa 15:56' na Rabbi Malo Umucunguzi


Abaturage b’u Rwanda bari ku rutonde rw’abantu batanu bari guhatanira igihembo cy’umunyafurika w’umwaka gitangwa n’ikinyamakuru gitangaza ibijyanye n’ubukungu n’imari, Forbes, (Forbes Africa Person of the Year, POY), igihembo kigiye gutangwa ku nshuro ya gatandatu.

Iki gihembo gihabwa umuntu uba waragize uruhare rufatika mu bijyanye n’ibikorwa bibyara inyungu mu mwaka urangiye.

Forbes POY mu 2016 agomba gutorwa hagati y’abaturage b’u Rwanda nk’igihugu (The people of Rwanda), Perezida wa Tanzania John Pombe Magufuli, Perezida w’Ibirwa bya Maurice, Ameenah Gurib; Umunyafurika Afurika y’Epfo, Thuli Madonsela n’umushoramari nawe wo muri Afurika y’Epfo, Michiel le Roux.

Forbes yatangaje ko Abaturage b’u Rwanda bagiye muri uru rutonde kubera “impinduka igihugu cyakoze kandi kigashyira imbere uburinganire.’’

U Rwanda rukomeza gutera intambwe ikomeye mu bijyanye n’uburinganire, ndetse muri uyu mwaka wa 2016 rwaje ku mwanya wa gatanu ku Isi mu kugabanya icyuho hagati y’abagabo n’abagore, rukaba n’urwa mbere ku Isi mukugira abagore benshi mu Nteko Ishinga Amategeko.

Perezida Magufuli ari na we kuri ubu uyoboye abandi bose mu majwi kuko ubu afite amahirwe ya 84% ubwo twandikaga iyi nkuru, yashyizwe ku rutonde rutoranywamo Umunyafurika w’Umwaka “kubera uruhare yagize mu kwihutisha ubukungu bw’igihugu.

Kuva yajya ku butegetsi mu Ugushyingo 2015, Magufuli yahereye ku mavugurura mu ngendo z’abayobozi, ndetse yirukana atababariye abayobozi badindizaga iterambere ry’igihugu binyuze mu nzego za leta, cyane ahera mu bijyanye n’imisoro no ku cyambu cya Dar Es Salaam, hafatwa nk’isoko ikomeye y’amashillingi igihugu gikoresha.

Undi mukuru w’Igihugu uri kuri uru rutonde ni Perezida wa Mauritius, Ameenah Gurib, “uri gukora ibishoboka mu kurengera ibidukikije mu gihugu cye.’’
Gurib kandi yaherukaga ku rutonde rwa Forbes muri Kamena, ubwo yazaga ku mwanya wa 96, ku rutonde rw’abantu bavuga rikijyana ku Isi mu mwaka wa 2016.

Harimo kandi Umunyafurika y’Epfo wahoze ayoboye ibikorwa byo kurwanya ruswa, Thuli Madonsela na we agaragara kuri uru rutonde, aho Forbes igaragaza uko yagezweho n’iterabwoba ryo kwicwa kubera akazi ke.

Madonsela usanzwe ari Umuvunyi Mukuru, muri iyi minsi yumvikana cyane mu guhata ibibazo Perezida wa Afurika y’Epfo, Jacob Zuma, ahanini ku byaha bya ruswa n’itonesha mu gushyira abayobozi mu butegetsi bwa Leta ndetse no mu bigo bikomeye, bakamushinja kuba yaraguzwe n’umuryango w’abaherwe wa Gupta, ufatwa nk’inshuti ze.

Madonsela yagize akazi gakomeye mu guteza impinduka mu miyoborere ya Afurika y’Epfo, aho yagaragaje amafuti ari gukorwa mu ishyaka ANC riri ku butegetsi, ndetse amaperereza ye agenda atuma abayobozi barimo n’abakomeye begura ku myanya yabo.

Uru rutonde runariho Umushoramari wo muri Afurika y’Epfo, Michiel le Roux washinze Capitec Bank “watumye urwego rw’amabanki rugera ku banyafurika y’Epfo.’’

Gutora byatangiye biri gukorwa hifashishijwe urubuga Forbes yagennye, uwegukanye igihembo akazamenyekana kuwa 17 Ugushyingo, mu birori bizabera i Nairobi muri Kenya.

Mu begukanye iki gihembo bwa mbere mu 2011 ni guverineri wa Banki Nkuru ya Nigeria, Sanusi Lamido Sanusi, mu 2012 gihabwa Guverineri wa Banki Nkuru ya Kenya, James Mwangi, mu 2013 gitwarwa na Akinwumi Adesina wari Minisitiri w’ubuhinzi muri Nigeria (Ubu ni Perezida wa banki Nyafurika Itsura amajyambere), mu 2014 gihabwa umuherwe wo muri Nigeria, Aliko Dangote, mu 2015 gihabwa umushoramari wo muri Tanzania, Mohammed Dewji.

Umushoramari wo muri Afurika y’Epfo, Michiel le Roux washinze Capitec Bank
Perezida w’Ibirwa bya Maurice, Ameenah Gurib
Perezida wa Tanzania, John Pombe Magufuli
Thuli Madonsela, Umuvunyi Mukuru muri Afurika y'Epfo
Umugore uri mu murima w'icyayi mu Gisakura mu Ntara y'Iburengerazuba

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved